Xlimaktum Samuel
4 Putum tuku xwan Samuel xkalakgchan putum israelitas.
Amakgolh kilhtamaku Israel taxtulh xlakata xkatalatlawakgolh filisteos. Israelitas tawilakgolh kxpaxtun Ebenézer, chu filisteos, anta kʼAfec. 2 Chu filisteos tistum tayakgolh xlakata xkatalatlawakgolh israelitas. Pero tatalachipat lu nitlan kitaxtulh, chu kamakgatlajaka israelitas. Filisteos kamakgnikgolh max akgtati mil lakchixkuwin anta niku xlatalachipamakgo. 3 Akxni soldados taspitkgolh anta niku xwilakgolh, lakchixkuwin xalak Israel wankgolh: «¿Tuku xlakata Jehová mastalh talakaskin pi filisteos xkinkamakgatlajakgon* la uku? Kamaxtuw arca xla talakkaxlan nema tapakgsini Jehová anta kSiló chu kaliw xlakata nakinkalakgmaxtuyan kxmakankan kintalatlawananinkan». 4 Wa xlakata kamalakgachakgolh lakchixkuwin kSiló chu xlakan linkgolh arca xla talakkaxlan nema tapakgsini Jehová, tiku kapulalin lhuwa soldados, tiku wi kxlaktawilh kxʼakgspun* querubines. Hofní chu Finehás, chatiy xlakgkgawasan Elí, na xkataʼankgo lakchixkuwin tiku xlinkgo arca xla talakkaxlan nema tapakgsini xaxlikana Dios.
5 Akxni arca xla talakkaxlan nema tapakgsini Jehová lichanka niku xwilakgolh israelitas, xputumkan pixlanka tsukukgolh katasakgo* chu asta tiyat tachikilh. 6 Akxni filisteos kgaxmatkgolh chuna la pixlanka xkatasamaka, wankgolh: «¿Tuku xlakata katasamaka anta niku wilakgolh hebreos?». Akxni katsikgolh pi arca xla talakkaxlan nema tapakgsini Jehová xwi anta niku xwilakgolh israelitas, 7 filisteos pekuankgolh. Xwankgo: «¡Dios chinit niku wilanaw!». Nachuna xwankgo: «¡Kgoxotanin akinin! ¡Nikxni chuna xlanit uma! 8 ¡Kgoxotanin akinin! ¿Tiku nakinkalakgmaxtuyan kxmakan uma Dios tiku ni anan xtachuna? Wa uma Dios tiku tipalhuwa tuku nitlan kalimakgnilh egipcios kxakaskakni tiyat. 9 Filisteos, ni kapekuantit chu la lakchixkuwin kalikatsitit. Komo nichuna natlawayatit, nakaskujnaniyatit hebreos chuna la xlakan kaskujnanikgonitan. ¡La lakchixkuwin kalikatsitit chu katalatlawanantit!». 10 Wa xlakata filisteos talatlawanankgolh chu kamakgatlajakgolh israelitas, chu chatunu chatunu tsalakgolh kxchikkan. Lhuwa tiku nikgolh: kamakgnika puxamakaw mil soldados israelitas tiku katantun xʼankgo. 11 Nachuna, filisteos linkgolh arca nema tapakgsini xaxlikana Dios chu chatiy xlakgkgawasan Elí, Hofní chu Finehás, nikgolh.
12 Chatum chixku xalak xtribu Benjamín lakapala taxtucha niku xlatalatlawamaka chu watiya ama kilhtamaku chalh kSiló, xataxtitni xlin klhakgat chu xʼakwaka tiyat. 13 Akxni uma chixku tanulh kkachikin, Elí xwi klaktawilh nema xwi kxpaxtun tiji. Xkgalhkgalhima, chu lu xlilakgaputsama arca nema tapakgsini xaxlikana Dios. Akxni uma chixku tanulh kkachikin, chu makatsininalh tuku xlanit, putum kachikin lu pixlanka tsukulh katasa. 14 Akxni Elí kgaxmatli chuna la pixlanka xkatasamaka kgalhskininalh: «¿Tuku xlakata lu pixlanka katasamaka?». Uma chixku lakapala lakgalh Elí xlakata namakatsini tuku xlanit. 15 (Elí xkgalhi 98 kata chu nialh xlakawanan). 16 Alistalh chixku wanilh Elí: «¡Akit tiku aku kchilh ktatalachipat! La uku ktsalataxtucha anta». Akxni kgaxmatli uma, Elí kgalhskilh: «¿Tuku lalh, kinkgawasa?». 17 Wa xlakata makatsinina wanilh: «Israelitas katsalanikgonit filisteos, kachikin makgatlajaka. Nachuna nikgonit chatiy milakgkgawasan, Hofní chu Finehás, chu filisteos linkgonit arca nema tapakgsini xaxlikana Dios».
18 Akxni chixku lichuwinalh arca nema tapakgsini xaxlikana Dios, Elí chakgenia alh, tamokgosli klaktawilh nema xwi lakatsu kmalakcha. Taʼakglhtampixtukxli chu nilh xlakata lu kgolota xwanit chu lu kgelanka xwanit. Tipuxam kata juez xlitaxtunit kʼIsrael. 19 Chu xpuwiti,* xpuskat Finehás, xʼama kgalhi chatum skgata chu nialh makgas xʼama malakachini. Akxni katsilh pi xlinkanit arca nema tapakgsini xaxlikana Dios chu pi xputiatlat chu xchixku xnikgonit, takilhputalh chu tsukulh katsanajwanan xlakata xʼama kgalhi kskgata, chu malakachininalh. 20 Xlakata xla xnimaja, lakpuskatin tiku xyakgolh kxpaxtun wanikgolh: «Ni kapekuanti, kgalhinita chatum kgawasa». Pero xla ni kakgalhtilh chu ni kuenta katlawanilh. 21 Kgawasa limapakuwilh Icabod,* xlakata wa: «Tuku xmaxki lilanka Israel makgat linkanit». Wa umakgolh tachuwin xlakata xlinkanit arca nema tapakgsini xaxlikana Dios chu xlakata tuku xkaʼakgspulanit xputiatlat chu xchixku. 22 Wa uma tuku wa: «Tuku xmaxki lilanka Israel makgat linkanit, xlakata linkanit arca nema tapakgsini xaxlikana Dios».