Xlimaktum Samuel
8 Akxni Samuel kgololh, jueces kalimaxtulh xlakgkgawasan kʼIsrael. 2 Xapuxku xkgawasa xwanikan Joel, chu xlichatiy, Abías. Xchatiykan jueces xlitaxtukgo kBeer-Seba. 3 Pero xlakgkgawasan ni stalanikgolh xliʼakxilhtit. Xʼakgskgawinankgo xlakata xkgalhikgolh tuku lhuwa xtapalh, xmastakgo talakaskin pi xkakgalhxokgoka* chu ni xaʼakgstitum la xlakputsanankgo.
4 Titaxtulh kilhtamaku, putum lakgkgolotsin xalak Israel tamakxtumikgolh chu lakgankgolh Samuel kRamá. 5 Wanikgolh: «Kaʼakxilhti, wix kgolota chu milakgkgawasan ni stalanikgonit miliʼakxilhtit. Wa xlakata kalaksakti chatum mapakgsina xlakata nakinkalakputsananiyan, chuna la kgalhikgo amakgapitsin kachikinin». 6 Pero Samuel lu sitsilh* akxni wanika «Kakinkamaxki chatum mapakgsina xlakata nakinkalakputsananiyan». Alistalh tlawanilh oración Jehová, 7 chu Jehová kgalhtilh: «Katlawa putum tuku waninitan kachikin, xlakata ni wix lakgmakgankgonitan. Wata akit tiku ni lakaskinkgo pi kakkamapakgsilh. 8 Tlawamaparakgolh tuku tlawakgonit lata akxni kkatamakxtulh kʼEgipto. Ankgalhin kimakgxtakgkgo chu kakninanikgo atanu dioses. Chu wa uma tuku tlawanimakgon la uku. 9 Wa xlakata kakakgaxpatni, pero liwana kakawani tuku ama kakitaxtuni. Kakawani tuku tlan nakaskini tiku nakamapakgsi».
10 Wa xlakata Samuel katachuwinalh latamanin tiku kskinimakgo chatum mapakgsina chu kawanilh putum tuku Jehová wanilh. 11 Kawanilh: «Wa uma tuku tlan nakaskiniyan tiku mimapakgsinakan nawan: nakalin milakgkgawasankan xlakata nakawilikgo kxputlaw nema litlawakgo guerra chu nakgetawilakgo xkawayujkan, chu makgapitsi nakgosnankgo* kxlakatin xputlaw. 12 Amakgapitsin xanapuxkun ksoldados nakalimaxtukgo: xpuxkukan akgtum mil soldados chu xpuxkukan tipuxamakaw. Chu amakgapitsin nakamalakgwaxni xtiyat chu nakamamakini xtachanan, nakamatlawi tuku litlawakgo guerra chu tuku namaklakaskinkgo xputlawkan. 13 Nakalin milaktsumankan xlakata natlawakgo limuksun, natlawakgo liwat chu natlawakgo kaxtalanchu. 14 Natatamakgxtakga tlakg xalaktlan mimpukuxtukan, niku yakgolh uvas chu olivos, chu nakamaxki xlakskujnin. 15 Natatamakgxtakga xadiezmo putum tuku namakgalakgo mimpukuxtukan niku chanitantit talhtsi chu niku chanitantit uvas, chu nakamaxki napuxkun tiku skujnanikgo chu xlakskujnin. 16 Nakalin milakskujninkan chu tlakg xalaktlan miʼanimaleskan chu miburroskan, chu nakamaskuju. 17 Natatamakgxtakga xadiezmo miʼanimaleskan, chu wixin xlakskujnin nalitaxtuyatit. 18 Nachan kilhtamaku akxni lu nitlan nalimakgkatsiyatit xlakata mapakgsina nema laksaknitantit. Pero akxni chuna nala, Jehová ni katikakgalhtin».
19 Pero israelitas ni kgaxmatniputunkgolh Samuel chu wankgolh: «¡Maski chuna, kkgalhiputunaw chatum mapakgsina! 20 Chuna nalitaxtuyaw chuna la amakgapitsin kachikinin chu kimapakgsinakan nakinkalakputsananiyan, nakinkapulalinan chu nakatalatlawa kintalamakgasitsinkan». 21 Akxni kgaxmatli putum tuku wankgolh israelitas, Samuel makatsinilh Jehová. 22 Chu Jehová wanilh Samuel: «Kakakgaxpatni chu kalaksakti chatum mapakgsina xlakata nakamapakgsi». Alistalh Samuel kawanilh lakchixkuwin xalak Israel: «Chatunu chatunu wixin kataspittit kminkachikinkan».