Xlimaktum Samuel

25 Titaxtulh kilhtamaku, Samuel nilh. Putum israelitas tamakxtumikgolh xlakata nalakgtasakgo, chu maknukgolh* anta kRamá, niku xwi xchik. Alistalh David taktalh kxakaskakni xtiyat Parán.

2 Ama kilhtamaku anta kMaón xlama chatum chixku tiku lhuwa tuku xkgalhi chu xʼanimales xwilakgolh kkachikin Carmelo.* Xkgalhi akgtutu mil borregos chu akgtum mil cabras. Chu xkamakgsitma xborregos anta kCarmelo. 3 Uma chixku tiku calebita xwanit, xwanikan Nabal, chu xpuskat xwanikan Abigaíl. Xla chatum puskat tiku liwana xlakapastaknan chu lu stlan xtasiya, pero xchixku lixkajni xlikatsi chu xtlawa tuku nitlan. 4 Akxni xlama kxakaskakni tiyat, David katsilh pi Nabal xkamakgsitma xborregos. 5 Wa xlakata David kawanilh kgalhkaw ksoldados: «Kapitit kkachikin Carmelo, kaputsatit Nabal chu kawanitit pi kkatsiputun la kitaxtunima. 6 Kawanitit: “Lhuwa kata kalatapa, tlan kakitaxtunin* chu tlan kakakitaxtunilh putum tiku xalak minchik chu putum tuku tapakgsiniyan. 7 Kkgaxmatnit pi la uku kamakgsitpat miborregos, akxni mimapuchwayaninanin kinkatatawilakgon, ni kkamaʼakglhuwiw, chu nitu kkamakglhtiw putum kilhtamaku akxni xwilakgolh kkachikin Carmelo. 8 Kakakgalhskinti milakskujnin chu xlakan nawanikgoyan. Wa xlakata ktasaskiniyan pi tlan kakamakgamakglhtinanti tiku akxtum kintaʼankgo xlakata kchinitaw kʼakgtum kilhtamaku akxni anan lhuwa tapaxuwan.* Katlawa litlan, kakamaxki milakskujnin chu minkgawasa David kaxatukawa tuku tlan nakilamaxkiyaw”».

9 Wa xlakata ksoldados David talakakxtukgolh chu maxkikgolh Nabal xtamakatsinin David. Akxni wanikgolh uma tamakatsin, 10 Nabal kakgalhtilh xlakskujnin David: «¿Chu tiku uma David? ¿Chu tiku lakpuwanit pi litaxtu xkgawasa Jesé? La uku lhuwa kskujnin tsalanikgo xmalanakan. 11 ¿Tuku xlakata nakkamaxki lakchixkuwin tiku ni kkatsi niku minkgonitancha, kinkaxtalanchu, kinchuchut chu liwa nema kkalakkaxtlawaninit tiku kamakgsitmakgo kiborregos?».

12 Ksoldados David taspitkgolh chu wanikgolh putum tuku Nabal xkawaninit. 13 David lakapala kalimapakgsilh ksoldados: «¡Chatunu chatunu katiyatit miʼespadajkan!». Wa xlakata xputumkan tampulakgtawakakgolh xʼespadajkan chu nachuna David. Max akgtati ciento lakchixkuwin tatalakakxtukgolh chu max akgtiy ciento lakchixkuwin tamakgxtakgkgolh xlakata nakakuentajtlawakgo tuku xkgalhikgo.

14 Pero chatum kskujni, makatsinilh Abigaíl, xpuskat Nabal. Wanilh: «Kakgaxpatti, David kamalakgachalh makgapitsi makatsininanin lata kxakaskakni tiyat xlakata nawani kimalanakan pi tlan xkitaxtunilh, pero xla pixlanka kakgalhtilh chu kawanilh tuku nitlan. 15 Umakgolh lakchixkuwin lu tlan kinkalikatsinikgon. Nikxni kinkamaʼakglhuwikgon, chu nitu kinkamakglhtikgon putum kilhtamaku nema xakkatawilaw niku xakkamapuchwayanimakgow borregos. 16 Xlakan la akgtum patsaps kinkalitaxtunikgon, kakuwani chu katsisni. Putum kilhtamaku akxni akxtum xakkatawilakgow chu xakkamapuchwayanimakgow borregos kinkakuentajtlawakgon. 17 La uku kalaksakti tuku natlawaya. Xlakata uma lu nitlan nakitaxtuni malana chu putum tiku xalak xchik. Xlakata xla chatum chixku tiku ni liʼakxilhputu* chu nila tachuwinankan».

18 Abigaíl tunkun tiyalh akgtiy ciento kaxtalanchu, patiy laklanka xalu niku xtajuma vino, tankitsis borrego nema xkakaxtlawakanita, akgkitsis canasta* xatachuchu talhtsi, akgtum ciento xaskakni pasas chu akgtiy ciento xaskakni higos chu putum umakgolh kamakukilh xburros. 19 Alistalh xla kawanilh kskujnin: «Kapulatit, akit nakkastalaniyan». Pero nitu wanilh Nabal, xchixku.

20 Akxni xla xkgewi xburro chu xtaktama kxlakgpatu sipi niku ni xtasiya, David chu ksoldados na xtaktamakgolh niku xla xʼama, wa xlakata tatanokglhkgolh. 21 David xkilhwama: «Akit kkuentajtlawanilh putum tuku xkgalhi kxakaskakni tiyat uma chixku, pero nitu litaxtunit. Niti makglhtilh tuku xkgalhi, chu xla nitlan kilikatsini maski akit tlan klikatsinilh. 22 Komo chali akxni nina xkgakgakgo ni kkamakgnikgonita lakchixkuwin* xalak xchik, Dios palha kakamalakgaxokgelh xtalatlawananin David».*

23 Akxni Abigaíl akxilhli David, lakapala taktalh kxburro chu tatsokgostalh chu takilhputalh kxlakatin David. 24 Alistalh tlakg talakatsuwinilh chu wanilh: «Kimalana, akit kakilimawaka. Ktasaskiniyan pi kakimaxki talakaskin naktachuwinanan. Kakgaxpatti xtachuwin uma miskujni. 25 Katlawa litlan, kimalana, ni kuenta katlawani Nabal.* Xla chatum chixku tiku ni liʼakxilhputu chu likatsi chuna la kilhchanima xtukuwani. Wanikan Nabal chu lu xatonto. Pero akit, miskujni, ni kkaʼakxilhli lakchixkuwin tiku kimalana kamalakgachalh. 26 Chu la uku, kimalana, kmalaknuniyan kxlakatin Jehová, xastakna Dios, chu kmilakatin, pi wa Jehová malakgachokgoman xlakata ni miʼakstu natlawaputuna tuku xaʼakgstitum chu ni nalipina kuenta xlakata nakamakgniya tiku nitu linkgo kuenta. Mintalatlawananin chu putum tiku tlawaniputunkgoyan tuku nitlan kalitaxtukgolh la Nabal. 27 Chu la uku, kimalana, kamasta talakaskin pi lakchixkuwin tiku akxtum taminkgoyan namakgamakglhtinankgo uma tamaskiwin* nema miskujni limininitan. 28 Katlawa litlan, katapati miskujni komo nitlan mamakgkatsininitan. Kimalana, akit kkatsi pi Jehová natlawa pi minchik* putum kilhtamaku natawila. Xlakata wix talatlawanana kxguerras Jehová chu xliputum milatamat ni tekgsnikanita tuku nitlan. 29 Kimalana, akxni wi tiku naputsastalaniyan chu namakgniputunan, Jehová miDios liwana nakuentajtlawa milatamat, xtachuna la akxni wi tiku liwana makgchi tuku kgalhi nema lhuwa xtapalh. Pero xlatamat mintalatlawananin makgat nakamakan chuna la limaklakaskinkan akgtum lixkgontalatni xlakata namakgosukan akgtum chiwix. 30 Chu akxni Jehová namakgantaxti putum tuku laktlan malaknuninitan chu xpulalina Israel nalitaxtuya, 31 nitu nalilakgaputsaya chu ni nalakpuwana pi ni xtlawa tuku tlawanita* xlakata miʼakstu tlawaputu tuku xaʼakgstitum chu xlakata kamakgni latamanin maski nitu xlinkgo kuenta. Kimalana, akxni Jehová nasikulunatlawayan kalakapastakti miskujni».

32 Akxni kgaxmatli uma, David wanilh Abigaíl: «¡Katamalankilh Jehová, Dios xalak Israel, tiku uma kilhtamaku malakgachan xlakata xkintatanokglhti! 33 ¡Kasikulunatlawaka xlakata liwana lakapastaknana! Dios kasikulunatlawan xlakata kilakgmaxtu ni kiʼakstu naktlawaputun tuku xaʼakgstitum chu nakkamakgni latamanin tiku ni linkgo kuenta. 34 Kmalaknuniyan kxlakatin Dios xalak Israel, Jehová, xastakna Dios, tiku lakgmaxtunitan xlakata ni naktlawaniyan tuku nitlan, pi komo ni tunkun xtat kintachuwinana, akxni kxkgakgalh nialhti lama xwa nipara chatum chixku* xalak xchik Nabal». 35 Alistalh David makgamakglhtinalh tuku xla xlinit chu wanilh: «Kapit kminchik chu nitu kalilakgaputsa. Kkgaxmatnit tuku kiwaninita chu naktlawa tuku kiskinipat».

36 Alistalh, Abigaíl lakgtaspitli Nabal, tiku xwi kxchik chu xtlawanit akgtum lanka taway chuna la chatum mapakgsina. Nabal* lu xpaxuwama, chu lu xkgachi. Wa xlakata nitu wanilh asta akxni xkgakgalh. 37 Pero lichali akxni Nabal nialhtu xkgachi, xpuskat wanilh putum tuku xlanit. Chu xnaku taxlajwanilh chu xmakni nialhla tatsuwilh chuna la akgtum chiwix. 38 Max akgkaw kilhtamaku alistalh Jehová tlawalh pi Nabal xnilh.

39 Akxni David katsilh pi Nabal xninit, wa: «¡Katamalankilh Jehová! Nabal kimamaxanilh, pero Jehová kinkgalhmakgtayanit. Ni mastalh talakaskin pi xaktlawalh tuku nitlan chu tlawalh pi wa Nabal xʼakgspulalh tuku nitlan xtlawanit». Alistalh David malakgachanilh akgtum tamakatsin Abigaíl xlakata kskinilh pi xtatamakgaxtokgli. 40 Kskujnin David chankgolh kkachikin Carmelo chu wanikgolh Abigaíl: «David kinkawanin pi xakkaputsan xlakata tatamakgaxtokgputunan». 41 Tunkun xla kalakgtatsokgostalh chu wa: «Unu kwi, chu tlan kskujni naklitaxtu, xlakata nakkatuchakge kskujnin kimalana». 42 Abigaíl tunkun tayalh, kgetawilalh xburro chu kgalhkitsis xlakskujnin katantun kstalanitilhakgo, kataʼalh xlakskujnin David chu xpuskat litaxtulh.

43 David na xtatamakgaxtokgnita Ahinoam tiku xalak Jezreel xwanit. Wa xlakata xchatiykan xlakpuskatin litaxtukgolh.

44 Pero Saúl xtamamakgaxtokgnit xtsumat Mical, xpuskat David, Paltí, xkgawasa Lais, tiku xalak Galim xwanit.