Génesis
26 Ama kilhtamaku, analh tatsinksni kpaís, uma ni wa tatsinksni nema analh kxkilhtamaku Abrahán. Wa xlakata Isaac alh kʼGuerar, niku xwi Abimélec, xmapakgsinakan filisteos. 2 Jehová tasiyanilh chu wanilh: «Ni kapit kʼEgipto. Katamakgxtakgti kpaís niku akit nakwaniyan. 3 Kalatapa kʼuma tiyat chuna la tiku xalak atanu país, chu akit ni ktimakgxtakgni chu naksikulunatlawayan. Wix chu minkamanan nakkamaxkiyan putum umakgolh tiyat. Nakmakgantaxti tamalaknun nema ktlawanilh mintlat Abrahán akxni kwanilh: 4 “Naktlawa pi minkamanan lhuwa nawankgo chuna la staku xalak akgapun chu nakkamaxki putum umakgolh tiyat. Chu putum kachikinin xalak katiyatni namakglhtinankgo akgtum tasikulunalin* xpalakata minkamanan”. 5 Chuna naktlawa xlakata Abrahán kgaxmatli kintachuwin chu chuntiya makgantaxtilh tuku kskin, tuku klakkaxwilinit pi xlitatlawat chu kilimapakgsin». 6 Wa xlakata Isaac chuntiya latamalh kʼGuerar.
7 Akxni lakchixkuwin xalak uma kachikin xkgalhskinkgo xpalakata Rebeca, xla xkawani: «Xla kintala». Xpekuan nakawani pi xpuskat xwanit. Xlakata lu lilakgatit xwanit, xla xlakpuwan: «Lakchixkuwin xalak uma kachikin nakimakgnikgo xpalakata Rebeca». 8 Titaxtulh kilhtamaku, Abimélec, xmapakgsinakan filisteos, xlakaxtuya kventana chu akxilhli pi Isaac xʼakgpixtima* Rebeca. 9 Abimélec matasaninalh Isaac chu wanilh: «¡Xla mimpuskat! ¿Tuku xlakata wanti: “Xla kintala”?». Isaac kgalhtilh: «Xakpekuan pi xkimakgnika xpalakata». 10 Chu Abimélec wanilh: «¿Pero tuku kilatlawaninitaw? ¡Katiwa chixku xalak uma kachikin tlan xtatamalh mimpuskat, chu xkilalimawakaw kuenta!». 11 Wa xlakata Abimélec kalimapakgsilh putum kachikin chu wa: «¡Katiwa tiku natlawani tuku nitlan uma chixku chu xpuskat, nani!».
12 Chu Isaac tsukulh chananan anta, chu uma kata makgalanalh liwaka akgtum ciento nixawa tuku xchanit, xlakata Jehová ksikulunatlawama. 13 Uma chixku chuntiya lhuwa tuku tsukulh kgalhi chu lu rico litaxtulh. 14 Tsukulh kakgalhi borregos, lhuwa wakax chu lhuwa kskujnin. Pero filisteos tsukukgolh lakgsitsilakanikgo.
15 Wa xlakata filisteos putapukgolh pozos nema xpuwaxkgonit kskujnin Abrahán akxni xla xlamajku. 16 Chu Abimélec wanilh Isaac: «Makgat kapit latapaya xlakata tlakg lhuwa tuku kgalhinita nixawa akinin». 17 Wa xlakata Isaac taxtulh niku xlama, chu alh latama kxakapuskan* xtiyat Guerar chu anta tamakgxtakgli. 18 Isaac kapuwaxpa pozos nema xkapuwaxkanit akxni xlamajku Abrahán, xtlat, nema filisteos xputapukgonit akxni xninita Abrahán. Nachuna, kawilinilh watiya tukuwani nema xkawilininit xtlat.
19 Akxni xpuwaxnamakgo kxakapuskan,* kskujnin Isaac tekgskgolh akgtum pozo niku xwi xasakgsi chuchut. 20 Pero mapuchwayaninanin* xalak Guerar tsukukgolh katalatlawakgo xmapuchwayaninanin Isaac chu xkawanimakgo: «¡Chuchut kilakan!». Wa xlakata Isaac limapakuwilh Ésec* uma pozo, xlakata xtataʼakglhuwikgonit. 21 Chu tsukuparakgolh puwaxkgo atanu pozo, pero na tsukuparakgolh litaʼakglhuwikgo. Wa xlakata limapakuwilh Sitná* uma pozo. 22 Alistalh alakatanu alh chu puwaxpa atanu pozo, pero nialh litaʼakglhuwikgolh. Wa xlakata, limapakuwilh Rehobot* chu wa: «La uku Jehová kinkamaxkinitan tilanka tiyat chu tlawanit pi nalhuwanaw kʼuma país».
23 Chu lata anta, alh kBeer-Seba. 24 Uma katsisni tasiyanilh Jehová chu wanilh: «Akit xDios mintlat Abrahán. Ni kapekuanti, xlakata akit ktawilan. Naksikulunatlawayan chu nakmalhuwi minkamanan xpalakata kiskujni Abrahán». 25 Wa xlakata, Isaac tlawalh akgtum pumakamastan anta chu tsukulh mapakuwi xtukuwani Jehová. Anta yawalh xchik xaxuwa, chu kskujnin puwaxkgolh akgtum pozo.
26 Titaxtulh kilhtamaku, Abimélec taxtucha kʼGuerar xlakata naʼan akxilha Isaac. Xtaʼankgo Ahuzat, kstakyawana, chu Ficol, xapuxku ksoldado. 27 Isaac kgalhskilh: «¿Tuku xlakata kilakgtanitantit? ¿Ni kiwanitit pi makgat xakmilh latama xlakata ni xkiʼakxilhputunatit?». 28 Chu xlakan wanikgolh: «Liwana kakxilhnitaw pi Jehová makgtayaman. Wa xlakata klakpuwaw nakminaw kawaniyan: “Katlawa litlan, katlawaw akgtum talakkaxlan,* wix chu akinin. Kakilamaxkiw talakaskin nakkatatlawayan uma talakkaxlan: 29 wix ni kintilatlawaniw tuku nitlan chuna la akinin ni kkatlawaninitan tuku nitlan. Kalakapastakti pi ankgalhin tlan kkalikatsininitan chu ni kkatataʼakglhuwin akxni taxtupi kkachikin. La uku wix tiku sikulunatlawanitan Jehová”». 30 Wa xlakata xla katlawanilh xakgama liwat, chu xlakan wayankgolh chu kgotnankgolh. 31 Lichali tsisa takikgolh chu wi tuku lalitayanikgolh. Alistalh, akxni xlakan taspitkgolh, Isaac ni katataʼakglhuwilh.
32 Watiya uma kilhtamaku, kskujnin Isaac ankgolh makatsinikgo xlakata pozo nema xpuwaxkgonit. Wanikgolh: «¡Ktekgswi chuchut!». 33 Chu xla limapakuwilh pozo Sibá. Wa xlakata asta la uku kachikin wanikan Beer-Seba.
34 Akxni Esaú xkgalhi tipuxam kata, tatamakgaxtokgli Judit, xtsumat Beerí tiku hitita xwanit, na tatamakgaxtokgli Basemat, xtsumat Elón tiku na hitita xwanit. 35 Chu xlakan kaliminikgolh talipuwan Isaac chu Rebeca.