Apocalipsis
12 Alistalh kakxilhli kʼakgapun akgtum lanka limasiy nema wi tuku kilhchanima: chatum puskat xlilhakgananit chichini; chu kxtampin xtantun xwi papaʼ chu kxʼakgxakga xlin akgtum corona nema akgkutiy staku xlitatlawanit. 2 Chu xʼama kgalhi kskgata, chu pixlanka* xkatasama xlakata lu xkatsanajwama xlakata xʼamaja kgalhi kskgata.
3 Chu kakxilhli kʼakgapun atanu lanka limasiy nema wi tuku kilhchanima: tasiyalh tantum xatsutsokgo lanka luwa nema makgapekuanan, xkgalhi akgtujun akgxakga chu akgkaw akgalokgot chu akgatunu akgxakga xkgalhi akgtum corona; 4 chu kstajan kalixwatalilh kaj ni lhuwa* staku xalak akgapun, chu katamakaktilh kkatiyatni. Chu lanka luwa nema makgapekuanan anta tamakgxtakgli kxlakatin puskat tiku xʼama malakachini kskgata, skgalalh xwi xlakata xkgotwaputun skgata nema xʼama lakachin.
5 Chu puskat malakachinilh skgata, aktsu kgawasa, tiku nakalimapakgsi putum kachikinin xlixtokgo xalikan. Chu aktsu kgawasa lakapala linika Dios chu kxpumapakgsin. 6 Chu puskat tsalalh kxakaskakni tiyat, anta niku Dios lakkaxwilininit chu anta niku namawikan akgtum mil akgtiy ciento tutupuxam kilhtamaku.
7 Analh akgtum guerra anta kʼakgapun. Miguel* chu xʼángeles talatlawakgolh lanka luwa nema makgapekuanan. Chu lanka luwa nema makgapekuanan chu xʼángeles na talatlawanankgolh, 8 pero kamakgatlajaka, chu nialh analh niku tlan xtamakgxtakgkgolh kʼakgapun. 9 Wa xlakata lanka luwa nema makgapekuanan tamakaktika kkatiyatni, wa xapulana luwa nema wanikan Akgskgawini chu Satanás, tiku kaʼakgskgawima putum tiku lamakgolh kkatiyatni chu xʼángeles nachuna akxtum katamakaktikancha. 10 Chu kkgaxmatli pixlanka tachuwin kʼakgapun nema xwan:
«¡La uku kiDioskan mastanita lakgtaxtut, chu xlitliwakga tlan kitaxtunit, chu xTamapakgsin lakkaxwilikanita chu xCristo tsukunita mapakgsinan! ¡Xlakata tiku xkalimawaka tuku nitlan kinatalankan makaminka kkatiyatni, tiku kalimawaka tuku nitlan tantaku chu tantaskaka kxlakatin kiDioskan! 11 Xlakan makgatlajakgolh xpalakata xlitliwakga xkgalhni Borrego chu xlakata tamakatsin nema lichuwinankgolh chu ni paxkikgolh xlatamatkan, wa xlakata ni pekuanikgolh linin. 12 Wa xlakata, ¡kapaxuwatit, akgapun chu tiku wilatit anta! Pero ¡kgoxota katiyatni chu pupunu! Xlakata Akgskgawini kalakgtaktanitan chu lu sitsinit, xlakata katsi pi nialh lhuwa kilhtamaku kgalhi».
13 Chu akxni lanka luwa nema makgapekuanan katsilh pi xtamakaktikanit kkatiyatni, putsastalanilh puskat tiku xmalakachininit aktsu kgawasa. 14 Pero puskat maxkika akgtiy xpakgan tantum xalanka águila chu kgosli kxakaskakni tiyat anta niku luwa ni naʼakxilha chu anta namawikan akgtum kilhtamaku, akgtiy kilhtamaku chu itat kilhtamaku.*
15 Chu luwa kilhtaxtulh chuchut xtachuna la kgalhtuchokgo kxchakgen puskat xlakata xlimajikswilh. 16 Pero katiyatni milh makgtaya puskat. Katiyatni takgalhpitsilh chu kgotwalh kgalhtuchokgo nema xkilhtaxtunit lanka luwa nema makgapekuanan. 17 Wa xlakata lanka luwa nema makgapekuanan lu sitsinilh puskat chu alh katatlawa guerra xkamanan* nema xwilakgolhku. Umakgolh wa tiku kgalhakgaxmatkgo xlimapakgsin Dios chu kalakgayawakanit nalichuwinankgo Jesús.