Skgalalh katawila xlakata «xatsinksni lapanit» ni natlawaniyan tuku nitlan

1. ¿Tuku tlawalh chatum ángel tiku xʼamigo Jehová xwanit?

XWI chatum ángel tiku xapulana xʼamigo Jehová xwanit. Pero akgtum kilhtamaku tsukulh lakaskin pi latamanin wa xkakninanikgolh nixawa Dios. Xlakata chuntiya xlakapastakma uma, tlawalh talakgalhin (Sant. 1:14, 15). Talalakatawakalh Jehová chu litaxtulh «xmakilhtsukina taʼakgsanin» (Juan 8:44). Ni katsiyaw la xwanikan akxni nina xlakataya Jehová, pero la uku waniyaw Satanás.

2, 3. ¿Tuku xlakata limapakuwikan «Satanás», «Akgskgawini», «luwa» chu «dragón» xtalamakgasitsin Jehová?

² Satanás wa tiku tlakg ni akxilhputun Jehová chu latamanin. Biblia kinkamakgtayayan nakatsiyaw la lu nitlan likatsi. Akgtum liʼakxilhtit, limapakuwi Satanás, nema wamputun «Lakatayana». Chuna limapakuwi xlakata ni akxilhputun xtamapakgsin Jehová chu talalakatawaka. Satanás ni lakaskin pi Jehová namapakgsinan.

³ Anta kʼApocalipsis o Revelación 12:9, uma xtalamakgasitsin Jehová limapakuwikan «Akgskgawini». ¿Tuku xlakata? Xlakata uma tukuwani wamputun «Tiku wan taʼakgsanin», tiku limawaka tuku ni xaxlikana amakgapitsin. Chu Satanás limawakanit pi Jehová xaʼakgsanina. Na litalakgapasa «xapulana luwa» xlakata limaklakaskilh tantum luwa xlakata naʼakgskgawi Eva. Chu na lilakgapaskan «xalanka dragón» xlakata xla la xaluku lapanit chu lixkajni likatsi. Xla ni lakaskin pi Jehová namakgantaxti tuku wanit natlawa. Nachuna lakaskin pi putum kskujnin Dios kanikgolh.

4. ¿Tuku naʼakxilhaw kʼuma artículo?

⁴ Liwana katsiyaw pi Satanás wa tiku ni akxilhputun Jehová chu xkachikin. Satanás lakaskin pi nialh naskujniyaw Jehová. Wa xlakata Biblia kinkawaniyan: «Skgalalh natawilayatit, sampi wa Akgskgawini, xtachuna xatsinksni lapanit, lama [...] [kkilakgstipankan, TNM], putsama wanti nachipay, naway» (1 Ped. 5:8). Kʼuma artículo naʼakxilhaw pulaktutu tuku xlakata kuenta kilitlawatkan xlakata Satanás ni nakinkatlawaniyan tuku nitlan.

SATANÁS TLIWAKGA

5, 6. 1) Kalichuwinanti liʼakxilhtit nema limasiya pi ángeles lu lakgtliwakga. 2) ¿Tuku xlakata Biblia wan pi Satanás kgalhi litliwakga xlakata namakgninan?

⁵ Ángeles lu lakgtliwakgan (Sal. 103:20). Tlakg lakgskgalalan chu tlakg lakgtliwakgan nixawa akinin. Ángeles tiku tlan likatsikgo limaklakaskinkgo xlitliwakgakan xlakata natlawakgo tuku tlan. Akgtum liʼakxilhtit, kilhtamaku nema lichuwinan Biblia, chatum ángel makgnilh 185,000 soldados kʼakgtum katsisni. Chatum chixku nila chuna xtlawalh chu lhuwa soldados tuwa chuna xtlawakgolh (2 Rey. 19:35). Atanu kilhtamaku, chatum ángel katamakxtulh kpulachin xʼapóstoles Jesús. Malakkilh malakcha chu katamakxtulh apóstoles chu malakchuwapa chu tiku xkakuentajtlawamakgolh ni akxilhkgolh (Hech. 5:18-23).

⁶ Chuna la akxilhaw, ángeles tiku ni makgxtakgkgo Dios, limaklakaskinkgo xlitliwakgakan xlakata natlawakgo tuku tlan. Pero Satanás limaklakaskin xlitliwakga xlakata natlawa tuku nitlan. Chu xla kgalhi lhuwa litliwakga. Wa xlakata Biblia limapakuwi «xapuxku yunu nkatuxawat» chu «xmalana» kakilhtamaku (Juan 12:31; 2 Cor. 4:4). Na wan pi kgalhi «limapakgsin xla linin» (Heb. 2:14). Uma ni wamputun pi wa kamakgni putum latamanin. Pero ¿tuku xlakata Biblia wan pi kgalhi limapakgsin xlakata namakgninan? Pulana, xlakata xla tlawa pi latamanin xalakluku nawankgo chu lixkajni nalikatsikgo. Xlipulaktiy, xlakata Satanás tlawalh pi Adán chu Eva xlakgalhinankgolh chu wa xlakata putum lakgalhinanaw chu niyaw (Rom. 5:12). Wa xlakata Jesús wa pi Satanás makgnina (Juan 8:44). Xlikana, Satanás lu tliwakga.

7. Kalichuwinanti liʼakxilhtit xalak Biblia nema limasiya pi demonios lu lakgtliwakga.

⁷ Akxni talalakatayayaw Satanás, na talalakatayayaw tiku stalanikgo. Tiku stalanikgo Satanás wa demonios, ángeles tiku talalakatawakakgolh Dios (Apoc. 12:3, 4). Anta kBiblia wilakgolh liʼakxilhtit nema limasiya pi xlakan tlakg lakgtliwakga nixawa akinin chu tlan lhuwa nakinkamakgapatinankgoyan (Mat. 8:28-32; Mar. 5:1-5). Putum kilhtamaku kalakapastakwi pi Satanás chu xdemonios lu lakgtliwakga (Mat. 9:34). Kajwatiya komo Jehová nakinkamakgtayayan tlan nakatlajayaw.

SATANÁS LU LIXKAJNI LIKATSI

8. 1) ¿Tuku tlawaputun Satanás? (Kaʼakxilhti xapulana dibujo.) 2) ¿Tuku akxilhnita nema limasiya pi kakilhtamaku na lu lixkajni likatsi chuna la Satanás?

⁸ Satanás lu lixkajni likatsi. Chuna la akxilhwi kpárrafo akgtati xla uma artículo, Biblia wan pi xla la tantum león nema jili wan, xlakata lu tsinksma. Xla mapakgsinamaja kkakilhtamaku, pero ni kajwatiya uma lakaskin (1 Juan 5:19). Na kamasputuputun tiku xatalaksakni nema lamakgolhku kKatiyatni chu tiku litaxtukgo amakgapitsi borrego (Juan 10:16; Apoc. 12:17). Wa xlakata tlawanit pi kakaputsastalanika tiku xaxlikana kstalaninanin Cristo lata kxapulana siglo asta la uku.

9, 10. 1) ¿Tuku tlawalh Satanás xlakata natlawani tuku nitlan kachikin Israel? 2) ¿Tuku xlakata Satanás lu xtlawaniputun tuku nitlan Israel? 3) ¿Tuku lakpuwana pi makgkatsi Satanás akxni chatum kskujni Jehová tlawa lanka talakgalhin?

⁹ Tantum león nema tsinksma ni lakgalhaman tuku namakgni, nipara akxni nina makgni chu nipara akxni makgninit. Xtachuna, Satanás ni kalakgalhaman tiku katlawani tuku nitlan. Kalilakpuwaw akxni xtlawaniputun tuku nitlan kachikin Israel. Xla tlawalh pi makgapitsi israelitas la Zimrí xtlawakgolh talakgxtumit xalimaxana chu amakgapitsi la Guehazí, xtiyakgolh tuku ni xlakan. Uma lhuwa tapatin limilh. Chu xlikana pi Satanás lu lipaxuwalh xlakata xtlajananit (Núm. 25:6-8, 14, 15; 2 Rey. 5:20-27).

¹⁰ ¿Tuku xlakata Satanás lu xmasputuputun Israel? Xlakata xkatsi pi Mesías anta xʼama minacha. Chu xkatsi pi wa xʼama malakgsputu chu Mesías xʼama limasiya pi wa Jehová tiku lakgchan namapakgsinan (Gén. 3:15). Satanás ni xlakaskin pi israelitas tlan xtalalinkgolh Jehová, wa xlakata tlawalh tuku xwi kxmakan xlakata xlakgalhinankgolh. Xla ni lakgalhamalh David akxni tlawalh talakgxtumit xalimaxana. Na ni lakgalhamalh Moisés akxni nialhla tanulh kTiyat nema xKawanikanit pi Nakamaxkikan. Satanás lu lipaxuwa akxni chatum kskujni Jehová tlawa lanka talakgalhin. Chu limaklakaskin uma xlakata nalilakawani Jehová (Prov. 27:11).

11. ¿Tuku xlakata max Satanás xʼakgskgawiputun Sara?

¹¹ Satanás tlakg ni xakxilhputun familia niku xʼama min Mesías. Akgtum liʼakxilhtit, kalakapastakwi tuku lalh akxni Jehová wanilh Abrahán pi xʼama tlawa pi «akgtum lanka kachikin» xlitaxtulh (Gén. 12:1-3). Akxni Abrahán chu Sara xwilakgolh kʼEgipto, mapakgsina xalak uma kachikin lilh Sara xlakata xtatamakgaxtokgli. Pero Jehová lakgmaxtulh (kalikgalhtawakga Génesis 12:14-20). Atanu mapakgsina xalak Guerar nachuna tlawalh akxni Isaac nina xlakachin (Gén. 20:1-7). ¿Wa Satanás tiku tlawalh pi umakgolh mapakgsinanin xlakgatikgolh Sara? Biblia ni wan. Pero kalakapastakwi pi Sara xmakgxtakgnit tuku lu tlan xkgalhi kxkachikin Ur xlakata anu anu xʼalh tawila kchiki xaxuwa. Satanás max xliʼakgskgawiputun tuku lu tlan xkgalhikgo mapakgsinanin chu xtlawaputun pi Sara xmakgxtakgli xchixku chu Jehová. Satanás lu xlakgatilh pi Sara ni xmakgtapakgsilh kfamilia niku xʼama min Mesías. Nipara tsinu xlilakgaputsa pi xʼama laktlawa xtamakgaxtokgat uma puskat, chu xʼama tlawa pi nitlan xlichuwinanka chu nialhla xtalalilh Jehová. ¡Lu nitlan likatsi Satanás!

12, 13. 1) ¿Tuku tlawalh Satanás akxni lakachilh Jesús? 2) ¿La lakpuwana pi kaʼakxilha Satanás lakgkgawasan chu laktsuman tiku skujnanikgo Jehová la uku?

¹² Akglhuwa ciento kata titaxtulh lakachilh Jesús. Satanás ni lakgatilh pi aktsu skgata lu stlan chu xapaxkina xwanit. Xkatsi pi uma skgata kxfamilia Abrahán xminitancha chu Mesías xʼama litaxtu. Nachuna, Jesús xʼama masputu putum tuku tlawanit Akgskgawini (1 Juan 3:8). ¿Lakpuwa Satanás pi lu nitlan komo xmakgnilh chatum aktsu kgawasa? Ni. Xla ni wa kuenta tlawa tuku tlan chu tuku nitlan. Wata lakapala tuku tlawalh xlakata xmakgnilh Jesús. ¿Tuku tlawalh?

¹³ Akxni mapakgsina Herodes katsilh pi xlakachinit «xreykan judíos», lu sitsilh chu xmakgniputun (Mat. 2:1-3, 13). Wa xlakata limapakgsinalh pi xkamakgnika putum laktsu lakgkgawasan tiku xkgalhikgo akgtiy kata o tlakg laktsujku xwankgonit kBelén chu kachikinin nema xwilakgo lakatsu (kalikgalhtawakga Mateo 2:13-18). Jesús ni makgnika ama kilhtamaku. Pero, ¿tuku kinkamasiyaniyan uma xlakata Satanás? Pi xla ni xlakaskinka akxilha latamat, nipara wa xlatamatkan laktsu kamanan. Xlikana, Satanás litaxtu la xatsinksni león. Putum kilhtamaku kalakapastakwi pi xla lu lixkajni likatsi.

SATANÁS KINKAʼAKGSKGAWIPUTUNAN

14, 15. ¿La kaʼakgskgawi Satanás latamanin?

¹⁴ Jehová lu xapaxkina (1 Juan 4:8). Kajwatiya la Satanás tlan tlawa pi latamanin ni nakgalhakgaxmatkgo Dios wa akxni kaʼakgskgawi. ¿La tlawa? Tlawa pi latamanin ni naʼakxilhkgo pi «lakaskinkgo tuku xla Dios». Uma wamputun pi tlawa pi latamanin ni naʼakxilhkgo pi talakaskin xʼamigos Dios nalitaxtukgo (Mat. 5:3, TNM). Satanás kaʼakgskgawinit lhuwa latamanin xlakata ni nakatsinikgo tuku xaxlikana xlakata Dios (2 Cor. 4:4).

¹⁵ Satanás katsi pi Jehová lakaskin kajwatiya kakakninaniw (Éx. 20:5). Wa xlakata kaʼakgskgawi latamanin chu tuku tlakg limaklakaskin wa ni xaxlikana takanajla. Lu lipaxuwa akxni tlawa pi latamanin kakakninanikgolh xfamiliajkan tiku nikgonita, tuku anan kakilhtamaku, animales chu atanu tuku nakakninanikgo chu ni wa Jehová. Tiku chuna tlawakgo lakpuwankgo pi Dios lakgati uma, pero tuku kanajlakgo chu xtalismaninkan nitu litaxtu. Kxkilhtamaku palakachuwina Isaías chuna xtlawamakgo israelitas. Xlakata nakamakgtaya, Jehová tamalakxtumilh nixaxlikana takanajla la taway nema nixatlan. Kawanilh pi ni xtalakaskin kxokgokgolh tuku nila xwakgolh. Chu na kawanilh: «Liwana kakinkgaxpatnitit, chu kawatit tuku tlan» (Is. 55:2).

16, 17. 1) ¿Tuku xlakata Jesús wanilh Pedro: «Kakintatampuxtuni Satanás»? 2) ¿Tuku limaklakaskin Satanás xlakata nakinkaʼakgskgawiyan?

¹⁶ Satanás na tlan kaʼakgskgawi kskujnin Dios tiku ni makgxtakgkgo. Akgtum liʼakxilhtit, kalakapastakwi tuku titaxtulh Jesús akxni kawanilh kstalaninanin pi nialh makgas xʼama niy. Pedro lu xpaxki Jesús chu wa xlakata wanilh pi akstu xlakgalhamanka. Pero Jesús wanilh: «Kakintatampuxtuni Satanás» (Mat. 16:22, 23). ¿Tuku xlakata chuna wanilh? Xlakata Jesús xkatsi pi xtalakaskin xnilh xlakata xkalakgmaxtulh latamanin chu xlimasiyalh pi Satanás xaʼakgsanina. Lu xlakaskinka xwanit ama kilhtamaku. Chu ni xʼanan kilhtamaku xlakata akstu xlakgalhamanka. Xlikana pi Satanás lu xlakgatilh pi Jesús nialh skgalalh xtawi.

¹⁷ Kʼuma xalixkajni kakilhtamaku lu nialh makgas wi. Wa xlakata na lu xlakaskinka kilhtamaku lamaw. Pero Satanás lakaskin pi kalakpuwaw pi nitu lama chu tlakg xlakaskinka kakxilhwi nalipaxuwayaw uma kakilhtamaku. Lakaskin pi nalakpuwanaw pi lhuwaku tsankga xlakata namin lisputni o pi ni katimilh. Pero uma ni nixlikana. Skgalalh katawilaw chu putum kilhtamaku kalakapastakwi pi xlisputni kakilhtamaku lamaw (Mat. 24:42).

18, 19. 1) ¿Tuku lakaskin Satanás kakanajlaw? 2) ¿La kinkamakgtayayan Jehová?

¹⁸ Satanás na lakaskin pi kakanajlaw pi Jehová ni kinkapaxkiyan chu nikxni kintikatapatin kintalakgalhinkan. Pero uma na ni xlikana. Biblia wan: «Dios, makgantaxtina, na ni katipatsankgalh paks ntu ntlawanitantit, chu mintaskujutkan xla tapaxkit wa ntu wixin masiyunitantit kxtukuwini» (Heb. 6:10). Chuna la katsimaw, Jehová lu xlakaskinka akxilha putum tuku tlawayaw xpalakata (kalikgalhtawakga 1 Corintios 15:58). Tiku Jehová ni paxki chu ni katitapatilh wa Satanás. Wa xlakata ni kamastaw talakaskin pi Satanás nakinkaʼakgskgawiyan.

¹⁹ Kʼuma artículo akxilhwi la Satanás lu tliwakga, ni lakgalhamanan chu kinkaʼakgskgawiputunan. Pero tlan natlajayaw xlakata Jehová kinkamakgtayayan. Biblia kinkawaniyan tuku liʼakgskgawinan Satanás xlakata skgalalh natawilayaw (2 Cor. 2:11). Pero ni kaj talakaskin nakatsiyaw tuku liʼakgskgawinan. Talakaskin natalalakatawakayaw. Wa xlakata Biblia wan: «Na kalakgapaxtokgtit [o katatlankaninitit] Akgskgawini, chuna nakatsalaniyan» (Sant. 4:7). Kʼartículo nema aku mima naʼakxilhaw la ni napatiyaw pulaktutu tuku liʼakgskgawinan Satanás.