Lucas

1 Lhuwa latamanin tsukukgonit tsokgkgo putum tuku xlanit nema akinin na kanajlayaw. 2 Amakgapitsi tiku na akxilhkgolh tuku lalh chu tiku xlichuwinankgo xtamakatsin Dios, kinkalitachuwinankgon uma. 3 Wa xlakata Teófilo tiku lu xlakaskinka litaxtuya, klakputsananinit putum umakgolh chu klakkaxwilinit naktsokgwili putum uma, chuna la titaxtunit lata kxkilhtsukut. 4 Chuna ktlawanit xlakata liwana nakanajlaya pi xlikana tuku katsininita.

5 Kxkilhtamaku Herodes* xmapakgsina Judea, xlama chatum sacerdote tiku xwanikan Zacarías, xtapakgsi kʼgrupo xla sacerdotes nema xlitapakuwi Abías. Chu xpuskat* tiku xwanikan Elisabet xminacha kxfamilia Aarón. 6 Xchatiykan xaʼakgstitum xlitaxtukgo kxlakatin Dios, putum xmakgantaxtikgo chuna la xwan limapakgsin chu putum tuku Jehová wanit pi xlitatlawat. 7 Pero ni xkgalhikgo kamanan, xlakata Elisabet nila xkgalhi skgata, chu xchatiykan lu xlinkgoya kata.

8 Akxni Zacarías xtlawama xtaskujut xla sacerdote kxlakatin Dios, xlakata grupo niku xmakgtapakgsi kalakgchalh namakgantaxtikgo tuku xkalakgayawakanit ktemplo, 9 chuna la makgasa xtlawakgo* sacerdotes, lakgchalh Zacarías namakamasta incienso kxtemplo Jehová. 10 Chu putum latamanin xalak kachikin xyakgolh kkilhtin,* xtlawamakgolh oración ama kilhtamaku akxni xlakgchan makamastakan incienso. 11 Xʼángel Jehová tasiyanilh Zacarías, anta xya kxpakgastakat* xpumakamastakan incienso. 12 Pero Zacarías nialh katsilh tuku natlawa akxni akxilhli, chu lu pekualh. 13 Pero ángel wanilh: «Ni kapekuanti, Zacarías, xlakata Dios kgaxmatli tuku tasaskininita, mimpuskat Elisabet nakgalhi chatum kgawasa, chu nalimapakuwiya Juan. 14 Nakgalhiya lhuwa tapaxuwan, chu lhuwa lu nalipaxuwakgo akxni nalakachin, 15 xlakata lanka nalitaxtu kxlakatin Jehová. Pero ni tsinu nawa* vino, nipara tuku likgachikan, chu espíritu santo nalitatsama lata akxni nina alakachin,* 16 chu xla nakamakgtaya lhuwa israelitas nalakgtaspitkgo xDioskan Jehová. 17 Nachuna, xla naʼan kxlakatin Dios, nakgalhi xlitliwakga xtachuna la Elías. Xlakata natlawa pi xnakujkan natlatni nalitaxtukgo xtachuna xla kamanan, chu tiku ni kgalhakgaxmatnankgo nakgalhikgo xliskgalalakan tiku xaʼakgstitum, xlakata namakaxni akgtum kachikin Jehová».

18 Zacarías wanilh ángel: «¿La* tlan nakkanajla uma? Xlakata akit lu klina kata, chu nachuna kimpuskat». 19 Ángel kgalhtilh: «Akit Gabriel chu kskuja kxlakatin Dios, kimalakgachaka xlakata nakmakatsiniyan umakgolh xatlan tamakatsinin. 20 Pero ¡kaʼakxilhti!, nila katichuwinanti asta ama kilhtamaku akxni nakgantaxtukgo uma, xlakata ni kanajla kintachuwin nema nakgantaxtu kkilhtamaku chuna la laklhkawilikanit». 21 Pero latamanin chuntiya xkgalhkgalhimakgolh Zacarías, chu kaks lilakawankgolh xlakata lu xmakgapalama ktemplo. 22 Akxni xla taxtulh, nila xkatachuwinan, chu katsikgolh pi xʼakxilhnit lanka milagro nema nitu xtachuna ktemplo. Kaj xmakan xmatsuwi xlakata xkgokgonit. 23 Akxni makgalhsputulh xasanto xtaskujut, xla alh kxchik.

24 Titaxtulh makgapitsi kilhtamaku, Elisabet xpuskat nialh xʼakstu latamalh,* chu akgkitsis papaʼ ni taxtulh kxchik, chu wa: 25 «Chuna kilikatsininit Jehová umakgolh kilhtamaku. Xla kiʼakxilhnit xlakata nakimapanuni tuku nitlan kxlakgstipankan latamanin».

26 Xliʼakgchaxan papaʼ lata nialh xʼakstu xlama Elisabet, Dios malakgachalh ángel Gabriel, kʼakgtum kachikin xla Galilea nema xwanikan Nazaret, 27 niku xlama chatum tsumat* tiku xʼama tatamakgaxtokga chatum chixku tiku xminacha kxfamilia David, xwanikan José, chu uma tsumat xwanikan María. 28 Chu akxni tanulh, ángel wanilh María: «Tlen, tiku lu sikulunatlawakanit, Jehová akxtum tawilan». 29 Pero María ni katsilh tuku natlawa chu tsukulh lilakpuwan tuku xlakata chuna xwanikanit. 30 Wa xlakata ángel wanilh: «Ni kapekuanti, María, xlakata tlan akxilhan Dios. 31 Chu ¡kaʼakxilhti!, nakgalhiya skgata chu namalakachiniya chatum aktsu kgawasa, chu nalimapakuwiya Jesús. 32 Xla lanka nalitaxtu chu nalimapakuwikan xKgawasa Tiku xala talhman, chu Jehová Dios, namaxki xlaktawilh David, xtlat,* 33 chu namapakgsinan kxchik Jacob putum kilhtamaku, chu xTamapakgsin nikxni katilakgsputli».

34 Pero María wanilh ángel: «¿La* nakgantaxtu uma, xlakata nitu ktatalakgxtumima chixku?». 35 Ángel kgalhtilh: «Espíritu santo nalakgminan chu xlitliwakga Tiku xala talhman nalitlapayan xmastilenkg. Chu wa xlakata tiku nalakachin nalimapakuwikan santo, xKgawasa Dios. 36 Chu ¡kaʼakxilhti!, Elisabet tiku xalak mifamilia na nakgalhi xkgawasa, maski lina kata, uku xliʼakgchaxan papaʼ lima, tiku xlimapakuwikan pi nila xkgalhi skgata; 37 xlakata putum tuku Dios wan kgantaxtu». 38 Wa xlakata María wa: «¡Kaʼakxilhti! ¡Kskujni Jehová! Kakinkgantaxtunilh tuku lichuwinanita». Akxni chuna wa, ángel alh.

39 Wa xlakata María taxtulh ama kilhtamaku chu lakapala alh kkasipijni, kʼakgtum kachikin xla Judá, 40 chu tanulh kxchik Zacarías chu tachuwinalh Elisabet. 41 Akxni Elisabet kgaxmatli pi María tachuwinalh, kskgata Elisabet tatsuwilh kxpan, chu litatsamalh espíritu santo 42 chu pixlanka* wa: «¡Wix tiku tlakg sikulunatlawakanita nixawa amakgapitsi lakpuskatin, chu tasikulunatlawanit skgata nema lipina kmimpan! 43 ¿Tiku klitaxtu xlakata namin kilakgapaxialhnan xtse kiMalana? 44 Xlakata ¡kaʼakxilhti!, akxni kkgaxmatli pi chuwinanti, skgata nema klin kkimpan lipaxuw tatsuwilh. 45 Kapaxuwalh puskat tiku kanajlalh tuku litachuwinanka, xlakata Jehová putum namakgantaxti tuku malaknunilh».

46 Chu María wa: «Kilatamat malanki Jehová, 47 chu kinaku lu lipaxuwa xlakata Dios kiLakgmaxtuna 48 xlakata xla akxilhnit kskujni tiku nitu litaxtu. Chu ¡kaʼakxilhti!, lata uku chu kilhtamaku nema aku mima, putum latamanin nawankgo pi xatasikulunatlawan akit, 49 xlakata Tiku kgalhi litliwakga tlawanit tuku nila tamakanajla kimpalakata, chu xasanto xtukuwani 50 chu tiku pekuanikgo putum kilhtamaku nakgalhikgo xtalakgalhaman. 51 Xla litlawanit putum uma xatliwakga xmakxpan; tlawanit pi katsalakgolh putum tiku xtlankajwanankgo kxnakujkan. 52 Kamapanunit mapakgsinanin kxlaktawilhkan, chu kamalankinit tiku taktujukgo;* 53 chu tiku xtsinksmakgolh kalimakgalhkgasalh tuku xatlan chu tiku lhuwa tuku xkgalhikgo nitu katamalakgachalh. 54 Xla minit makgtaya kskujni Israel, chu akxni chuna tlawa lakapastaka tuku xmalaknunit. 55 Xla malaknulh pi xʼama limasiyani talakgalhaman Abrahán chu xkamanan* putum kilhtamaku, chu wa uma tuku kawanilh xalakgmakgan kinatlatnikan». 56 María max akgtutu papaʼ anta tatamakgxtakgcha Elisabet chu alistalh taspitli kxchik.

57 Alistalh chalh kilhtamaku akxni Elisabet xlakachilh kskgata, chu kgalhilh chatum kgawasa. 58 Chu xtalakatsunin chu tiku xalak xfamilia kgaxmatkgolh pi Jehová lu xlakgalhamanit, chu lu tapaxuwakgolh. 59 Xliʼakgtsayan kilhtamaku minkgolh xlakata xʼakstilichukunikgolh kxuwa xlichixku* aktsu kgawasa, chu xʼamaka wilinikan Zacarías chuna la xtukuwani xtlat. 60 Pero xtse* wa: «¡Ni!, nawanikan Juan». 61 Wa xlakata, wanikgolh: «Nitiku xalak mifamilia chuna wanikan». 62 Wa xlakata limakawanikgolh xmakankan xlakata nakgalhskinkgo xtlat la xlakaskin nawanikan. 63 Wa xlakata xla skilh niku tlan xtsokgnalh chu tsokgli: «Xtukuwani Juan». Wa xlakata, putum kaks lakawankgolh. 64 Tunkun talakkilh xkilhni chu talakgxkutli ksimakgat, chu tsukulh chuwinan, chu xmalankima Dios. 65 Chu tsukukgolh pekuankgo putum xtalakatsunin, chu tsukuka lichuwinankan putum uma klakgatum xkasipijni Judea. 66 Chu putum tiku kgaxmatkgolh uma, xlilakpuwankgo kxnakujkan chu xwankgo: «¿Tuku nalitaxtu uma aktsu kgawasa?». Xlakan xʼakxilhkgo pi Jehová ksikulunatlawama aktsu kgawasa.

67 Wa xlakata, Dios maxkilh espíritu santo Zacarías, xtlat aktsu kgawasa, chu xla makatsininalh xtachuwin Dios chu wa: 68 «Kamalankika Jehová, xDios Israel, xlakata lakgalhamanit xkachikin chu limininit lakgtaxtut. 69 Xla malakatsukinit chatum tliwakga kilakgmaxtunakan kxchik David kskujni, 70 wa uma tuku xla xmalaknunit chuna la tilichuwinankgolh xasantos xpalakachuwinanin xalamakgasa. 71 Xla wa pi xʼama kinkalakgmaxtuyan kxmakan kintalamakgasitsinkan chu putum tiku ni kinkaʼakxilhputunkgoyan. 72 Xla nakinkalakgalhamanan chuna la tikamalaknunilh xalakgmakgan kinatlatnikan chu xla nalakapastaka xasanto xtalakkaxlan. 73 Wa uma tamalaknun nema timaxkilh Abrahán, xamakgan kintlatkan. 74 Akxni Dios kinkalakgmaxtunitana nawan kxmakan kintalamakgasitsinkan, xla nakinkamaxkiyan talakaskin pi ni anan tapekua nakakninaniyaw, 75 ni namakgxtakgaw chu natlawayaw tuku xaʼakgstitum putum kilatamatkan. 76 Pero wix, aktsu kgawasa, nawanikana xpalakachuwina Tiku xala talhman, xlakata kxlakatin Jehová napina chu nakaxtlawanitilhaya xtiji, 77 xlakata Dios nakatapati xtalakgalhinkan chu chuna nakalakgmaxtu, 78 xlakata xtalakgalhaman Dios, naʼakxilhaw xkgakganat kʼakgapun nema namakgskgo chuna la akxni aku xkgakgama 79 xlakata nakalimini xkgakganat tiku wilakgolh niku kapukswa chu tiku wilakgolh niku xmastilenkg linin kaʼakgchipanit chu nakinkamasiyaniyan tuku kilitlawatkan xlakata tlan nakgalhiyaw takaksni».

80 Chu aktsu kgawasa stakli chu tliwakga wa chu anta latamalh kxakaskakni tiyat asta akxni chalh kilhtamaku nakalitachuwinan Dios kachikin Israel.