Xlimaktiy Samuel
12 Wa xlakata Jehová wanilh Natán pi xlakgalh David. Akxni Natán lakgchalh David, wanilh: «Xwilakgolh chatiy lakchixkuwin kʼakgtum kachikin. Chatum xkgalhi lhuwa tumin chu achatum limaxkgen xwanit. 2 Tiku xkgalhi lhuwa tumin xkgalhi lhuwa borregos chu wakax, 3 pero tiku limaxkgen xwanit kajwatiya xkgalhi tantum aktsu borrego nema xtamawanit. Xla kuenta xtlawa, chu borrego kstakma kxchik uma chixku chu xlakgkgawasan. Tuku aktsu xkgalhi uma chixku xla xliwayan, xkgotnan kxvaso chu kxmakxpan klhtata. La chatum xtsumat xliʼakxilha. 4 Akgtum kilhtamaku, chixku tiku xkgalhi lhuwa tumin makgamakglhtinalh chatum chixku tiku xlakgapaxialhnama, pero ni maklakaskilh nipara tantum xborrego chu nipara tantum xwakax xlakata xkaxtlawanilh tuku xwalh. Wata chipalh xborrego chixku tiku limaxkgen xwanit chu uma likaxtlawanilh liwat tiku xlakgapaxialhnama».
5 Akxni David kgaxmatli uma, lu sitsinilh chixku chu wanilh Natán: «¡Kwaniyan kxlakatin Jehová xastakna Dios, chixku tiku tlawalh uma lakgchan nani! 6 Chu, xlakata tlawalh uma chu ni limasiyalh talakgalhaman, makgtati xlilakgaxokgot chuna la xtapalh aktsu borrego».
7 Alistalh Natán wanilh David: «¡Wix uma chixku tiku lichuwinamaw! Wa uma tuku wan Jehová, Dios xalak Israel: “Akit klaksakni xlakata mapakgsina xlitaxtu kʼIsrael chu klakgmaxtun kxmakan Saúl. 8 Kmakamaxkiputun xchik mimalana chu kmakamaxkiputun xlakpuskatin mimalana. Na kmakamaxkin xchik Israel chu Judá. Chu ni kajwatiya uma, na tlakg lhuwa atanu tuku xaktlawaputun mimpalakata. 9 ¿Tuku xlakata lakgmakganti xtachuwin Jehová akxni tlawa tuku nitlan kxlakatin? ¡Urías tiku hitita xwanit limakgni espada! Chu akxni xlimakgninitata xʼespadajkan ammonitas, tatamakgaxtokgti xpuskat. 10 La uku putum kilhtamaku naʼanan lanka taʼakglhuwit* kminchik, xlakata kilakgmakganti akxni makglhti xpuskat Urías tiku hitita xwanit chu tatamakgaxtokgti”. 11 Wa uma tuku wan Jehová: “La uku naktlawa pi anta kminchik naʼanan laklanka taʼakglhuwit. Chu kmilakatin nakmakglhtiyan milakpuskatin chu achatum* tiku nakmaxki, chu akxni kakuwaniku* nakatatalakgxtumi. 12 Wix tsekg tlawa putum uma, pero akit naktlawa uma kxlakatin putum Israel chu akxni kakuwani”».*
13 Chu David wanilh Natán: «Klakgalhinanit kxlakatin Jehová». Natán kgalhtilh David: «Jehová, tapatiyan mintalakgalhin. Ni katini. 14 Maski chuna, xlakata nipara tsinu limasiyaninita Jehová pi maxkiya kakni, aktsu skgata tiku aku nalakachin naniy».
15 Alistalh Natán taspitli kxchik.
Chu Jehová tlawalh pi aktsu skgata nema David takgalhilh xpuskat Urías xtatatlalh. 16 David tasaskinilh Dios pi xmakgtayalh aktsu skgata. Nialh wayalh* chu talakchuwatanulh, chu tantaskaka xtama kkatutsu. 17 Lakgkgolotsin tiku xwilakgolh kxchik talakatsuwinikgolh chu makiputunkgolh pero xla ni lakaskilh chu ni xkatawayamputun. 18 Xliʼakgtujun kilhtamaku, aktsu skgata nilh. Pero xlakskujnin David xpekuankgo chu ni xwaniputunkgo pi aktsu skgata xninit. Xwankgo: «Akxni aktsu skgata xlamajku, xtachuwinanaw mapakgsina chu ni xkinkakgaxmatniputunan. ¿La nawaniyaw la uku pi aktsu skgata ninit? Max x’akstu natlawanikan tuku nitlan».
19 Akxni David akxilhli pi xlakskujnin tsekg xlatachuwinamakgo, lakpuwa pi aktsu skgata xninit. David kakgalhskilh xlakskujnin: «¿Nilh aktsu skgata?». Xlakan kgalhtikgolh: «Chuna, nilh». 20 Alistalh David takilh. Paxli, limaktlawaka aceite, lakgpalilh klhakgat chu alh kxchik Jehová xlakata nakakninani. Alistalh alh kxchik, skilh pi xliminika liwat chu wayalh. 21 Xlakskujnin kgalhskinkgolh: «¿Tuku xlakata chuna tlawa? Akxni aktsu skgata xlamajku, ni xwayana chu ankgalhin xtasaya. Pero akxni nilh aktsu skgata, taki chu wayanti». 22 Xla kgalhtinalh: «Akxni xlamajku aktsu skgata, ni xakwayan chu ankgalhin xaktasama xlakata xaklakpuwan “Nixkatsi komo Jehová nakilakgalhaman chu namaxki talakaskin nalatama aktsu skgata”. 23 Pero xlakata la uku ninita, ¿tuku xlakata ni nakwayan? ¿Tlan naktlawa pi nalatamapara? Akit naklakgan, pero xla nialh kintilakgtaspitli».
24 Alistalh David tsukulh makgoxomixi xpuskat, Bat-Seba. Alh chu tatalakgxtumilh, chu titaxtulh kilhtamaku kgalhilh chatum aktsu skgata tiku limapakuwika Salomón.* Chu Jehová lu xpaxki. 25 Xlakata Jehová xpaxki, wanilh palakachuwina Natán pi xlimapakuwika Jedidías.*
26 Joab chuntiya talatlawalh Rabá nema xkatapakgsini ammonitas chu akgchipalh kachikin nema xtapakgsini mapakgsina. 27 Wa xlakata Joab malakgachanilh makatsininanin David xlakata nawani: «Ktalatlawanit Rabá chu kʼakgchipanit kachikin xla chuchut.* 28 La uku, kakamamakxtupi amakgapitsi soldados, katalatlawa kachikin chu wix kamakgatlaja, xlakata ni akit nakʼakgchipa chu ni akit nakilimalankikan».*
29 Wa xlakata David kamamakxtumilh putum soldados chu alh kRabá, talatlawalh chu akgchipalh. 30 Chu makglhtilh Malcam* corona nema xʼakwi. Uma corona nema xlitatlawanit puxamakutati kilo* xla oro chu nachuna xalakstlan chiwix, akwilika David. Xla na lilh lhuwa tuku xtapalh nema xʼanan kkachikin. 31 Nachuna, kamaxtulh latamanin xalak kachikin xlakata nakamalakchukunikgo chiwix, namaskujukgo tuku lichukunankan xalikan chu hachas, chu xlakata natlawakgo ladrillos. Wa uma tuku katlawanilh putum xkachikinin ammonitas. Xaʼawatiya, David chu putum ksoldados taspitkgolh kJerusalén.