Xlimaktiy Samuel
9 David wa: «¿Ananku kxchik Saúl, tiku tlan naklimasiyani tapaxkit nema ni makgxtakgnan, xpalakata Jonatán?». 2 Xwi chatum skujni xalak xchik Saúl tiku xwanikan Zibá, wa xlakata matasaninanka. Mapakgsina David kgalhskilh: «¿Wix Zibá?». Xla kgalhtilh: «Chuna, akit miskujni». 3 Mapakgsina wanipa: «¿Ananku kxchik Saúl, tiku tlan naklimasiyani tapaxkit nema ni makgxtakgnan?». Zibá kgalhtilh mapakgsina: «Lamajku chatum xkgawasa Jonatán, tiku luntu».* 4 Mapakgsina kgalhskilh: «¿Niku wi?». Zibá kgalhtilh: «Kxchik Makir xkgawasa Amiel, kLo-Debar».
5 Mapakgsina David tunkun limapakgsinalh pi xʼanka tiyakan kxchik Makir xkgawasa Amiel, kLo-Debar. 6 Alistalh Mefibóset, xkgawasa Jonatán, xkgawasa Saúl, tanulh niku xwi David. Akxni chalh kxlakatin, tatsokgostalh chu lakgtakilhputalh. David wanilh: «¡Mefibóset!», chu xla kgalhtilh: «Unu wi miskujni». 7 David wanilh: «Ni kapekuanti, xlakata naklimasiyaniyan tapaxkit nema ni makgxtakgnan, xpalakata Jonatán. Nakmaxkiparayan putum xtiyat mintata* Saúl chu ankgalhin nawayana* kkimesa».
8 Alistalh xla lakgtakilhputapa chu wanilh: «Akit chuna la tantum xanin chichi, ¿tuku xlakata limasiyaniya talakgalhaman* uma miskujni?». 9 Alistalh mapakgsina matasaninalh Zibá, kskujni Saúl chu wanilh: «Putum tuku xtapakgsini Saúl chu putum xchik kmakamaxki xtanat mimalana. 10 Wix, minkamanan chu milakskujnin nachanananatit kxkapukuxtun chu namakiyatit xtachanan xlakata tlan nawayankgo tiku kakuentajtlawamakgo xtanat mimalana. Pero Mefiboset, xtanat mimalana ankgalhin nawayan kkimesa».
Ama kilhtamaku, Zibá xkgalhi kgalhkukitsis xkamanan chu kgalhpuxam xlakskujnin. 11 Zibá tunkun wanilh mapakgsina: «Uma miskujni natlawa putum tuku nalimapakgsi kimapakgsina tiku kgalhi lhuwa kakni». Lata ama kilhtamaku, Mefibóset wayalh kxmesa David* chuna la chatum xkgawasa mapakgsina. 12 Mefibóset na xkgalhi chatum xaʼaktsu xkgawasa tiku xwanikan Micá. Putum tiku xalak xchik Zibá xlakskujnin Mefibóset litaxtukgolh. 13 Chu Mefibóset tiku luntu xwanit, xlama kJerusalén xlakata ankgalhin xwayan kxmesa mapakgsina.