Takgalhtawakga 13
Tuku nalilakgapasaw xaxlikana takanajla
¿Pi paks takanajla tlan akxilha Dios, o kaj akgtum? (1)
¿Tuku xlakata anan lhuwa takanajla nema wankgoy pi kstalaninanin Cristo? (2)
¿La tlan nakalakgapasa tiku xaxlikana kstalaninanin Cristo? (3-7)
1. Jesús kaj akgtum takanajla xaxlikana malakatsukilh. Wa xlakata uku kaj akgtum xaxlikana takanajla nema xkakninanin Jiova xliʼanat (Juan 4:23, 24; Efesios 4:4, 5). Wa Biblia masiyay pi ni lhuwa tiku amakgolh ktiji xatitsu nema linan klatamat (Mateo 7:13, 14).
2. Biblia xwanitta pi akxni xnikgolh apóstoles tsinu tsinu xtamaknukgolh kcongregación xla kstalaninanin Cristo, tamasiyat nema nixaxlikana chu talismanin nema ni xtamasiy Cristo. Xʼamakgolh laktaxtukgoyacha lakchixkuwin tiku xkamalakgaspitkgolh tiku xkanajlakgoy xlakata niaj kstalanikgolh Cristo wata wa xkastalanika (Mateo 7:15, 21-23; Hechos 20:29, 30). Wa xlakata tipalhuwa takanajla wankgoy pi na kstalaninanin Cristo. ¿La tlan nakalakgapasaw tiku xaxlikana kstalaninanin Cristo?
3. Tuku tlakg litalakgapaskgoy wantiku xaxlikana kstalaninanin Cristo, wa xlakata xaxlikana lapaxkikgoy (Juan 13:34, 35). Nitu kamasiyanimaka natatlankaninikgoy tiku atanu xcolor. Nani kamasiyanikan nasitsiniy amakgapitsi tiku xaʼalakatanu kachikin (Hechos 10:34, 35). Wa xlakata ni makgtanukgoy kguerra. Tiku xaxlikana kstalaninanin Cristo laʼakxilha lakomo linatalan (1 Juan 4:20, 21).
4. Atipatu tuku kalilakgapaskan xaxlikana takanajla wa pi lu lakgachixkuwilikgoy Biblia. Akxilhkgoy Biblia pi xTachiwin Dios chu kanajlakgoy tuku anta wan (Juan 17:17; 2 Timoteo 3:16, 17). Xlakan akxilhkgoy xTachiwin Dios tlakg xlakaskinka nixawa xtalakapastakni chu xtakanajla xla lakchixkuwin (Mateo 15:1-3, 7-9). Litakgoxikgoy nalilatamakgoy chali chali chuna la wan Biblia. Ni lichiwinankgoy xtamapakgsin Dios chu atanu tuku tlawakgoy (Tito 1:15, 16).
5. Wantiku lilatamakgoy xaxlikana takanajla na xlimalankitkan xtukuwani Dios (Mateo 6:9). Jesús kamasiyanilh amakgapitsi xtukuwani Dios, Jiova, chu wantiku xaxlikana kstalaninanin Cristo nachuna xlitlawatkan (Juan 17:6, 26; Romanos 10:13, 14). ¿Tiku tama kristianos nema masiyakgoy xtukuwani Dios kminkachikin?
6. Tiku xaxlikana kstalaninanin Cristo xlichiwinatkan xTamapakgsin Dios. Jesús chuna tlawalh. Wa punchuna xlichiwinan xlakata xTamapakgsin Dios (Lucas 8:1). Na kamapakgsilh xtamakgalhtawakgen pi xlikalanka Katiyatni xlichiwinankgolh tamakatsin nema xla masiyalh (Mateo 24:14; 28:19, 20). ʼakgchuwinanit nawan xlikatlanka nkatuxawat yuma xatlan tamakatsin xla tapakgsin lakimpi paks nakgaxmatkgoy yuma talulokgtat xlipaks akgmakgat chixkuwin; akxniku nchu nachin xlikgasputni katuxawat». Kstalaninanin Cristo kanajlakgoy pi kaj watiya xTamapakgsin Dios nalimin unu kKatiyatni latamat niku ni anan takglhuwit chu ni katiʼanalh lijikua (Salmo 146:3-5).
7. Xtamakgalhtawakgen Jesús ni anta tapakgsikgoy kakilhtamaku xakalixkajni (Juan 17:16). Ni makgtanukgoy kpolítica nipara makgtanukgoy ktalakapastakni nema malakatsukiy taʼakglhuwit. Na ni lilatamakgoy tayat nema tlawakgoy nixatlan xala kakilhtamaku (Santiago 1:27; 4:4). ¿Pi lakgapasa akgtum takanajla anta kminkachikin nema tlawakgoy uma tuku kalilakgapaskan xaxlikana kstalaninanin Cristo?
[Dibujos xla página 27]
Wantiku kstalaninanin Cristo xaxlikana lapaxkikgoy, lakgachixkuwilikgoy Biblia chu lichiwinankgoy xTamapakgsin Dios