Lantla tlan nalakgapasa Dios

Tlan nalakgapasa Jiova akxni nalikgalhtawakgaya Biblia. Lumakgasa Dios kalaksakxtulh lakchixkuwin xpalakata natsokgwilikgoy xla xtalakapastakni. Uma tatsokgni litalakgapasa Biblia. Lanchiyu tlan nalakgapasaw Dios akxni nalikgalhtawakgayaw Biblia, uma kgalhiy xtachiwin Jiova o xtamakatsinin, wa xpalakata litalakgapasa Xtachiwin Dios. Likanajlat tuku wan Biblia xpalakata Jiova nikxni akgsaninan. “Dios ni akgsaninan.” (Hebreos 6:18.) Uma wamputun pi Xtachiwin Dios kgalhiy xaxlikana (Juan 17:17).

Waʼ Biblia akgtum tamaskiwin lulhuwa xtapalh, chu kinkamaxkinitan Dios. La akgtum tatsokgni xla chatum xatlat tiku katsokgnani xkaman tiku kapaxkiy. Kinkalixakgatliyan xtamalaknun pi Dios natlaway luxakastlan Katiyatni niku nalatamakan: akgtum paraiso. Kinkawaniyan tuku Dios tlawalh, tuku tlawama chu tuku aku natlaway xpalakata xkaman tiku xatalipaw. Nachuna kinkamakgtayayan lantla nalakkaxtlawayaw kintakglhuwitkan chu nateakgsaw tapaxawan (2 Timoteo 3:16, 17).

Xtatayananin Jiova wa xʼamigo Dios; namakgtayakgoyan xpalakata naʼakgateakgsa tuku masiyay Biblia. Manwa kakawani pi likgalhtawakgaputuna Biblia. Namasiyanikgoyan chu nituku katimatajikgon (Mateo 10:8). Nachuna tlan napina kxlitamakxtumit kstalaninanin Kristo. Uma katlawakan anta nak putakaknin, kawanikan XChik Reino. Pi napina anta nak putamakxtumit, min takatsin xlakata Dios pala nalhuwantilha.

Wantuku tlawanit Dios tlan nalilakgapasa. Kaʼukxilhti, kBiblia wan: “Dios tlawalh akgapun chu katiyatni” (Génesis 1:1, NM). Akxni Jiova tlawalh “akgapun”, natlawalh Chichini. ¿Tuku kinkalimasiyaniyan Dios wa uma? Pi Jiova kgalhiy lanka litliwakga. Manwa tlan tlawalh tuku lutliwakga la Chichini. Nachuna kinkamasiyaniyan pi Jiova luskgalala, talakaskilh liskgalala xpalakata nalitlawakan Chichini, pi mastay lhkakna chu xkgakganat, chu nikxni mixa.

Paks tuku katlawanit Jiova masiyaninan pi kinkapaxkiyan. Kalilakapastakti paks xatipalhuwa tawakat nema anan anta nak Katiyatni. Jiova tlan xkintikamaxkin kajtipatum tawakat o nituku. Kinkamaxkinitan luxatipalhuwa tawakat tanuj tanuj tasiyakgoy, laklanka, laktsu, chu xkolorkan chu tanuj tanuj takgalhwanankgoy. Uma limasiyay pi Jiova kinkapaxkiyan, pi lakgatiy mastay, pi ni lhuwa tuku skin chu tlaway tukutlan (Salmo 104:24).