«Kapitit chu kakamakgtayatit latamanin [...] kistalaninanin nawankgo»

1-6. Kalichuwinanti makgapitsi liʼakxilhtit xlakata nalimasiyaya pi xtatayananin Jehová lichuwinankgo Dios kaxanikawa.

REBECCA, chatum xtatayana Jehová xalak Ghana, xlichuwinan Dios kʼescuela. Wa xlakata ankgalhin xlin makgapitsi likgalhtawakga chu xlichuwinan Dios akxni xtaxtu krecreo. Chu asta tsukulh kalimakgalhtawakge Biblia makgapitsi laktsuman tiku xkatakgalhtawakga.

² Kʼisla xla Madagascar, lakatsu kʼÁfrica, akgtum tamakgaxtokgat tiku precursores litaxtukgo, xtlawankgo 25 kilómetros maski lu xchichinan akxni xʼankgo limakgalhtawakgenankgo Biblia kʼakgtum lakgamakgat kachikin.

³ Makgapitsi xtatayananin Jehová xalak Paraguay chu xalak atanu 15 kachikinin, kaxtlawakgolh akgtum lanka barco niku tlan xtawilakgolh 12 latamanin xlakata tlan xkalinikgolh tamakatsinin tiku wilakgolh kxkilhtun kgalhtuchokgo Paraguay chu Paraná. Uma barco xkamaxki talakaskin natalan xlakata nalichuwinankgo xatlan tamakatsinin xla xTamapakgsin Dios kkachikinin niku lu tuwa chankan.

⁴ Xtatayananin Jehová xalak Alaska liwana maklakaskinkgolh kilhtamaku akxni lhkaknan. Kʼumakgolh papaʼ minkgo paxialhnankgo latamanin xalak atanu países. Niku chinkgo barcos natalan wilikgolh carritos niku xʼanan likgalhtawakga ktipalhuwa tachuwin. Chu xlakata natalan xʼankgolh niku tlakg lakgamakgat, maklakaskinkgolh avioneta xlakata nakalitachuwinankgo xalaktlan tamakatsinin aleutianos, atabascanos, chimesianos chu tlingit.

⁵ Chatum tala xalak Texas tiku wanikan Larry, xwi niku kakuentajtlawakan tiku linkgoya kata, wa xlakata anta xlichuwinan Dios. Lhuwa tuku xtlawa maski nila xtlawan chu xwi ksilla de ruedas. Putum xkalitachuwinan xalaktlan tamakatsinin chu xkawani pi tlan natlawampara kkilhtamaku nema aku mima (Is. 35:5, 6).

⁶ Makgapitsi xtatayananin Jehová, akgtutu kilhtamaku ankgolh kʼakgtum aktsu barco lata kMandalay asta kxnorte Myanmar xlakata naʼankgo kʼakgtum asamblea. Xlakata lu xlichuwinamputunkgo Dios, linkgolh makgapitsi likgalhtawakga xlakata nakamaxkikgo tiku na xʼankgo kbarco. Chu makgatunu niku xtachokgo barco, natalan xtaktakgo chu lakapala xʼankgo makgpitsikgo likgalhtawakga. Akxni xtaspitkgo, xkalitachuwinankgo Dios atanu latamanin tiku aku xtawakakgonit kbarco.

7. ¿La lichuwinankgo xTamapakgsin Dios xtatayananin Jehová, chu tuku makgantaxtiputunkgo?

⁷ Umakgolh liʼakxilhtit masiya pi xtatayananin Jehová liwana lichuwinamakgo xTamapakgsin Dios kxlikalanka katiyatni (Hech. 28:23). Katachuwinankgo latamanin kxchikkan, ktiji, kteléfono chu tlawakgo cartas. Na katachuwinankgo akxni ankgo kʼautobús, akxni tlawankgo kparque o akxni jaxkgo niku skujkgo. Tipalhuwa tuku maklakaskinkgo xlakata tlan nakalitachuwinankgo latamanin xalaktlan tamakatsinin kaxanikawa niku lamakgolh (Mat. 10:11).

8, 9. 1) ¿Tuku xlakata lu kaks malakawaninan tuku tlawakgo xtatayananin Jehová? 2) ¿Tuku takgalhskinin kililakpuwanatkan chu la tlan natekgsaw xatakgalhtin?

⁸ ¿Chu wix? ¿Na makglichuwinana Dios kliwaka 235 países? Komo chuna, makgtayanampat xlakata tlakg natalichuwinan xTamapakgsin Dios kxlikalanka katiyatni. Uma lu kaks malakawaninan. Maski malakgachokgoputunkanit kintaskujutkan, kinkaputsastalanikanan o atanu tuku tuwa titaxtuyaw, xtatayananin Jehová lu liskujmaw xlakata “liwana nakalitachuwinanaw” xTamapakgsin Dios latamanin xalak tanu tanu kachikinin.

⁹ Akxni akxilhaw la tlakg lichuwinamaka xtachuwin Dios max nalakpuwanaw: «Maski tipalhuwa tuku tuwa titaxtuyaw chu Satanás lakaskin pi nialh kalichuwinaw Dios, ¿tuku xlakata kintaskujutkan chuntiya talakgatumima?». Xlakata tlan nakgalhtiyaw uma takgalhskinin, kililakpuwanatkan tuku lalh kxapulana siglo. Xtatayananin Jehová chuntiya tlawamaw taskujut nema tsukulh makgasa.

Akgtum taskujut nema xʼama lhuwan chu xʼama makgapala

10. ¿Tuku taskujut tlakg xlakaskinka xʼakxilha Jesús, chu tuku liwana xkatsi?

¹⁰ Jesucristo lu xlakaskinka xʼakxilha nalichuwinan xalaktlan tamakatsinin xla xTamapakgsin Dios. Wa makilhtsukilh congregación xla kstalaninanin Cristo nema asta la uku chuntiya anan. Xla wa: «Na kiliʼanat alakatanu kachikinin xlakata naklichuwinan xatlan tamakatsinin xla xTamapakgsin Dios, xlakata wa uma kilimalakgachakanit» (Luc. 4:43). Pero Jesús xkatsi pi ni xʼama masputu taskujut nema xmakilhtsukima, xlakata chuna la wa akxni nina xniy, tamakatsinin xʼama talakgatumi “klaklanka kachikinin” (Mar. 13:10). Wa xlakata, ¿tiku xʼamakgo makgantaxtikgo uma taskujut, chu la xʼamakgo tlawakgo?

11. ¿Tuku taskujut kalakgayawalh Jesús xtamakgalhtawakgen, chu tuku kamalaknunilh?

¹¹ Akxni xlakastakwananita, Jesús katasiyanilh xtamakgalhtawakgen chu kawanilh: «Kapitit chu kakamakgtayatit latamanin xliputum kachikinin xlakata kistalaninanin nawankgo, kakamunutit kxtukuwani xaTlat chu xaKgawasa chu kxtukuwani espíritu santo, kakamasiyanitit namakgantaxtikgo putum tuku kkalimapakgsinitan. Chu ¡kaʼakxilhtit!, kkatawilan chali chali asta kxlisputni kakilhtamaku» (Mat. 28:19, 20). Akxni wa «kkatawilan», Cristo xkawanima pi xʼama kamakgtaya akxni xlichuwinankgolh Tamapakgsin chu akxni xkamakgtayakgolh amakgapitsin na kstalaninanin Cristo xlitaxtukgolh. Xlikana pi xʼamakgo maklakaskinkgo tamakgtay, xlakata Jesús xkawaninita: «Ni katikaʼakxilhputunkgon putum kachikinin» (Mat. 24:9). Na kawanilh pi xʼamakgo kgalhikgo atanu tamakgtay. Akxni nina xʼan kʼakgapun, kamalaknunilh pi xʼama kamaxki espíritu santo nema xkamaxkilh litliwakga xlakata xlichuwinankgolh Dios «kxlikalanka katiyatni» (Hech. 1:8).

12. ¿Tuku takgalhskinin tawila, chu tuku xlakata lu xlakaskinka nakatsiyaw xatakgalhtin?

¹² Pero ¿tuku tlawakgolh apóstoles chu kstalaninanin Cristo xalak pulana siglo? ¿Xlakaskinka akxilhkgolh tuku kalakgayawaka umakgolh lakchixkuwin chu lakpuskatin? ¿Liwana lichuwinankgolh Dios maski ni lhuwa xwankgonit chu xkaputsastalanimaka? ¿Xlikana kamakgtayalh espíritu santo chu kgalhikgolh atanu tamakgtay? Tekgsaw xatakgalhtin umakgolh chu atanu takgalhskinin klibro xla Hechos. Lu xlakaskinka nakatsiyaw xatakgalhtin. ¿Tuku xlakata? Xlakata chuna la lichuwinalh Jesús, lichuwinankan Dios chu kamakgtayakan amakgapitsin kstalaninanin nalitaxtukgo xʼama tatlawa asta «kxlisputni kakilhtamaku». Xaxlikana kstalaninanin Cristo, tiku lamaw kxaʼawatiya kilhtamaku, na kilitlawatkan uma taskujut. Wa xlakata lu xlakaskinka nakatsiyaw tuku lichuwinan libro xla Hechos.

Tuku lichuwinan Hechos

13, 14. 1) ¿Tiku tsokgwililh libro xla Hechos, chu la katsilh tuku tsokgwililh? 2) ¿Tuku lichuwinan libro xla Hechos?

¹³ ¿Tiku tsokgwililh uma libro? Maski kʼuma libro ni min xtukuwani tiku tsokgwililh, tuku lichuwinan masiya pi wa Lucas tiku tsokgwililh (Luc. 1:1-4; Hech. 1:1, 2). Lata makgasa katsikan pi tuku lichuwinan uma libro wa tsokgwililh makuchina «tiku lu paxkikan» (Col. 4:14). Uma libro lichuwinan tuku lalh 28 kata: lata akxni Jesús taspitpa kʼakgapun, kkata 33, asta akxni Pablo tamaknuka kpulachin kRoma, lakatsu kkata 61. Xlakata Lucas maklakaskilh tachuwin xlakan chu akinin, masiya pi xmin kilhtamaku Lucas akxilhli tuku tsokgwililh (Hech. 16:8-10; 20:5; 27:1). Lucas liwana xtsokgwiliputun tuku lalh, wa xlakata max kakgalhskilh Pablo, Bernabé, Felipe chu amakgapitsin tuku lalh.

¹⁴ ¿Tuku lichuwinan Hechos? Evangelio nema tsokgwililh Lucas lichuwinan tuku wa chu tuku tlawalh Jesús, chu klibro xla Hechos lichuwinan tuku tlawakgolh xtamakgalhtawakgen Jesús. Tlan wanaw pi uma libro lichuwinan xlakaskinka taskujut nema tlawakgolh lakchixkuwin chu lakpuskatin tiku latamanin xkalilakgapaskgo pi «ni xkgalhtawakgakgonit chu ni xlakaskinka xlitaxtukgo» (Hech. 4:13). Uma libro lichuwinan la kilhtsukulh chu staktilhalh congregación. Masiya la kstalaninanin Cristo xalak pulana siglo xlichuwinankgo Dios (Hech. 4:31; 5:42). Lichuwinan la espíritu santo makgtayanan xlakata tlakg natalichuwinan xalaktlan tamakatsinin (Hech. 8:29, 39, 40; 13:1-3; 16:6; 18:24, 25). Chuna la amakgapitsi libros xalak Biblia, libro xla Hechos na lichuwinan la xTamapakgsin Cristo namasantujli xtukuwani Dios. Na lichuwinan la talakgatumilh xalaktlan tamakatsinin xla Tamapakgsin maski lu xmalakgachokgoputunkan (Hech. 8:12; 19:8; 28:30, 31).

15. ¿La nakinkamakgtayayan komo nalakputsananiyaw libro xla Hechos?

¹⁵ Xlikana pi tlan limakgkatsiyaw chu tatliwakglha kintakanajlakan akxni likgalhtawakgayaw libro xla Hechos. Komo nalilakpuwanaw la kstalaninanin Cristo xalak pulana siglo ni pekuankgolh akxni lichuwinankgolh Dios lu xlakaskinka naʼakxilhaw tuku tlawakgolh. Nachuna, xtakanajlakan chu la ni pekuankgolh nakinkamakgtayayan nastalaniputunaw xliʼakxilhtitkan. Komo chuna natlawayaw namakgantaxtiyaw taskujut nema Jesús kinkalakgayawan akxni wa: «Kapitit chu kakamakgtayatit latamanin xlakata kistalaninanin nawankgo». Uma likgalhtawakga nakinkamakgtayayan liwana nalakputsananiyaw libro xla Hechos.

Akgtum libro nema nakinkamakgtayayan akxni nakgalhtawakgayaw

16. ¿Tuku pulaktutu makgantaxtiputun uma likgalhtawakga?

¹⁶ Uma likgalhtawakga pulaktutu tuku makgantaxtiputun: 1) masiya pi Jehová limakgtayanan xʼespíritu santo xlakata natalichuwinan xTamapakgsin chu nakamakgtayakan latamanin kstalaninanin Cristo nalitaxtukgo, 2) tlawa pi tlakg nalichuwinamputunaw Dios chuna la tlawakgolh xapulana kstalaninanin Cristo chu 3) kinkamakgtayayan namaxkiyaw kakni xkachikin Jehová chu nakakgalhakgaxmatniyaw natalan tiku pulalinkgo taskujut chu kakuentajtlawakgo congregación.

17, 18. ¿La tapitsinit uma likgalhtawakga, chu la makgtayanan tuku limin akxni lakputsananiyaw Biblia?

¹⁷ ¿La tapitsinit uma likgalhtawakga? Tapitsinit kpulaktsayan secciones, pulakatunu lichuwinan tuku min klibro xla Hechos. Ni lichuwinan akgatunu versículos, wata kinkamasiyaniyan la nalitamakgtayayaw uma libro xalak Biblia chu kinkamasiyaniyan la nalilatamayaw. Niku tsuku akgatunu capítulo limin tsinu tuku tlakg xlakaskinka natalichuwinan chu niku takilhtinit.

¹⁸ Nachuna, limin makgapitsi tuku nakinkamakgtayayan akxni nalakputsananiyaw Biblia. Limin lu lakstlan dibujos nema nakinkamakgtayayan nalilakpuwanaw tuku lalh. Kmakgapitsi capítulos min akgtum recuadro nema kinkalichuwinanan makgapitsi kskujnin Dios tiku tlan nakastalaniyaw xliʼakxilhtitkan, tuku lanit makgasa, talismanin o atanu tiku kalichuwinankan klibro xla Hechos.

19. ¿Tuku takgalhskinin tlan xlilakpuwaw?

¹⁹ Uma libro nakinkamakgtayayan kiʼakstukan nakinkalakputsananikanan. Maski lhuwa o nina lhuwa kilhtamaku makglichuwinamaw xTamapakgsin Dios, tlan xwa nalilakpuwanaw tuku tlakg xlakaskinka akxilhaw kkilatamatkan, la lichuwinamaw Dios chu la kamakgtayamaw latamanin kstalaninanin Cristo nalitaxtukgo (2 Cor. 13:5). Kalilakpuwaw: «¿Chuntiya lu xlakaskinka kakxilha naklichuwinan Dios?» (1 Cor. 7:29-31). «¿Chuntiya xatapaxuwan klichuwinan Dios chu kkanajla pi xaxlikana tuku klichuwinama?» (1 Tes. 1:5, 6). «¿Kmakgtlawa uma taskujut chuna la kmatlani?» (Col. 3:23).

20, 21. ¿Tuku xlakata talakaskin lu namalakapaliyaw la lichuwinamaw Dios, chu tuku kililakkaxwilitkan?

²⁰ Lakapala talakatsuwima xlisputni kakilhtamaku chu kalipekua wi xlatamatkan latamanin, wa xlakata kintaskujutkan lu xlakaskinka. ¿Lhuwa latamanin nakgaxmatputunkgo chu namakgamakglhtinamputunkgo xatlan tamakatsinin? (Hech. 13:48). Ni katsiyaw, pero tuku katsiyaw wa pi lu xlakaskinka nakamakgtayayaw latamanin xlakata nina chin lisputni (1 Tim. 4:16).

²¹ Lu xlakaskinka na natlawayaw tuku tlawakgolh natalan xalak pulana siglo. Komo liwana nalakputsananiyaw uma likgalhtawakga, natlawa pi xatapaxuwan chu ni xatapekua nalichuwinanaw xalaktlan tamakatsinin, chu nalakkaxwiliyaw chuntiya “liwana nalichuwinanaw xTamapakgsin Dios” (Hech. 28:23).