¿Tuku xlakata natlawayaw oración kxtukuwani Jesús?

ORACIÓN wa tuku na xlichuwinan Jesús akxni xmasiya. Kxkilhtamaku Jesús, xpulalinanin takanajla xtlawakgo oraciones «kxchastunin xatilanka tiji». ¿Tuku xlakata chuna xtlawakgo? «Xlakata lakchixkuwin» xkaʼakxilhkgolh. Xlakan xlakaskinkgo pi amakgapitsin kaks xlilakawankgolh tuku xtlawakgo. Lhuwa tiku xtlawakgo laklhman oraciones chu watiya watiya tuku xwankgo. Max xlakpuwankgo pi xtalakaskin «lu lhuwa tachuwin nawankgo» xlakata Dios xkakgaxmatnilh (Mateo 6:5-8). Jesús liwana masiyalh pi umakgolh talismanin nitu xlitaxtu chu chuna kamakgtayalh latamanin tiku tlan xlikatsikgo xlakata xkatsikgolh tuku ni xlitlawatkan xwanit akxni xtlawakgolh xʼoracionkan. Pero ni kajwatiya kawanilh tuku ni xlitlawatkan xwanit.

Jesús kinkamasiyanin pi akxni tlawayaw oración kilimasiyatkan pi lakaskinaw katamasantujlilh xtukuwani Dios, kamilh xTamapakgsin chu kalalh xtalakaskin. Na masiyalh pi tlan naskiniyaw Dios pi kakinkamakgtayan kkilatamatkan (Mateo 6:9-13; Lucas 11:2-4). Nachuna, maklakaskilh liʼakxilhtit xlakata xkinkamasiyanin pi talakaskin makglhuwa naskinaw, nalimasiyayaw takanajla chu nataktujuyaw komo lakaskinaw pi Dios kakinkakgaxmatnin (Lucas 11:5-13; 18:1-14). Chu Jesús ni kajwatiya wa tuku xlitatlawat, wata masiyalh la xlitatlawat (Mateo 14:23; Marcos 1:35).

Xlikana pi tuku Jesús masiyalh kamakgtayalh xtamakgalhtawakgen tlakg tlan xtlawakgolh xʼoracionkan. Pero Jesús kgalhkgalhilh asta xaʼawatiya tsisni akxni latamalh unu kkatiyatni xlakata xkamasiyanilh pulaktum tuku lu xlakaskinka xlakata oración.

«Lu talakgpalilh la xtlawakan oración»

Xaʼawatiya katsisni, Jesús lu kamakgpuwantinilh xʼapóstoles tiku ni xmakgxtakgkgo. Xlakgchanit kilhtamaku xlakata xkalitachuwinalh pulaktum tuku xasasti. Kawanilh: «Akit tiji chu xaxlikana chu latamat. Kaj kimpalakata tlan lakgankan xaTlat». Alistalh katlawanilh uma tamalaknun: «Putum tuku wixin naskinatit kkintukuwani, naktlawa, xlakata xaTlat nalimalankikan xpalakata xaKgawasa. Komo wixin wi tuku naskinatit kkintukuwani, naktlawa». Chu akxni xmasputumaja xtakgalhchuwin kawanilh: «Asta uku wixin nitu skinitantit kkintukuwani. Kaskintit chu namakglhtinanatit, xlakata xatakgatsin nawan mintapaxuwankan» (Juan 14:6, 13, 14; 16:24).

¡Lu tlan tuku kawanilh! Maktum diccionario nema lakputsanani Biblia wan pi uma «lakgpalilh la xtlawakan oración makgasa». Pero Jesús ni xwamputun pi lata uma kilhtamaku wa xtlawanika oración chu ni wa Dios. Wata xmalakima xasasti tiji xlakata tlan natalakatsuwinikan Jehová Dios.

Xlikana, Dios putum kilhtamaku kakgaxmatninit xʼoraciones kskujnin tiku ni makgxtakgkgo (1Samuel 1:9-19; Salmo 65:2). Pero lata Dios katatlawalh akgtum talakkaxlan Israel, putum tiku xlakaskin pi xkgaxmatnika xʼoración, xlikanajlat xwanit pi Israel wa kachikinin nema Jehová xlaksaknit. Titaxtulh kilhtamaku, lata xkilhtamaku Salomón, xlitakanajlat xwanit pi templo wa tuku Dios xlaksaknit xlakata anta xtlawanika tamakamastan (Deuteronomio 9:29; 2 Crónicas 6:32, 33). Pero uma takaknin ni putum kilhtamaku makgapalalh. Chuna la tsokgwililh apóstol Pablo, Limapakgsin nema kamaxkika Israel chu tamakamastan nema xtlawakgo ktemplo kaj akgtum «xmastilenkg tuku aku xʼama min pero nina wa xaxlikana tasikulunalin» xwanit (Hebreos 10:1, 2). Pero tuku kaj mastilenkg xlikgantaxtut xwanit (Colosenses 2:17). Wa xlakata, lata kkata 33 akxni xminita Jesús, nialh talakaskilh xkgalhakgaxmatka Limapakgsin nema maxkika Moisés xlakata tlan xtalalinka Jehová. Wata talakaskin nakgalhakgaxmataw Jesucristo, tiku xlichuwinankanit kLimapakgsin (Juan 15:14-16; Gálatas 5:14-16; Gálatas 3:24, 25).

Akgtum «xlakaskinka tukuwani nixawa atanu tukuwani»

Jesús lakkaxwililh tuku tlakg tlan xlakata tlan natalakatsuwiniyaw Jehová. Tlan nawanaw pi xla la chatum tliwakga amigo nema kinkamakgtayayan xlakata Dios nakinkakgaxmatniyan chu nakinkakgalhtiyan kiʼoracioneskan. ¿Tuku xlakata Jesús tlan kinkamakgtayayan?

Xlakata putum akinin lakgalhinanin, nila tuku tlawayaw o nila tuku makamastayaw nema naxapa kintalakgalhinkan chu natlawa pi tlan natalalinaw Jehová, Dios tiku xasanto (Romanos 3:20, 24; Hebreos 1:3, 4). Pero Jesús tlan xapalh xtalakgalhinkan latamanin akxni makamastalh xlatamat nema ni xkgalhi talakgalhin (Romanos 5:12, 18, 19). Xlakata uma tamakamastan, putum tiku chuna lakaskin tlan nakgalhi akgtum tlan talakapastakni kxlakatin Jehová chu “ni napekuan akxni natachuwinan”. Pero talakaskin nalimasiya pi kanajlani xtamakamastan Jesús chu natlawa oración kxtukuwani (Efesios 3:11, 12).

Akxni tlawayaw oración kxtukuwani Jesús, limasiyayaw pi kanajlaniyaw pulaktutu tuku Cristo lakgayawakanit xlakata nakgantaxtu xtalakaskin Dios: 1) Wa «xBorrego Dios» chu xtamakamastan xapa kintalakgalhinkan. 2) Jehová malakastakwanilh Jesús chu la uku «sacerdote tiku tlakg kgalhi limapakgsin» chu tlawa pi nalitamakgtayayaw xtamakamastan. 3) Kajwatiya Jesús «tiji» xlakata tlan natalakatsuwiniyaw Jehová akxni tlawaniyaw oración (Juan 1:29; 14:6; Hebreos 4:14, 15).

Akxni tlawayaw oración kxtukuwani Jesús, maxkiyaw kakni. Uma chuna xlilat, xlakata Jehová lakaskin pi «kxtukuwani Jesús natalakgatsokgostakgo putum [tuku anan] chu putum xliwanatkan kxlakatin amakgapitsin pi Jesucristo Malana litaxtu xlakata nalimalankikan Dios tiku xaTlat» (Filipenses 2:10, 11). Chu tuku tlakg xlakaskinka wa pi akxni tlawayaw oración kxtukuwani Jesús, malankiyaw Jehová, tiku makamastalh xKgawasa kimpalakatakan (Juan 3:16).

Xlakata naʼakgatekgsaw la xlilakaskinka tuku Jesús lakgaya, kBiblia tipalhuwa la litalakgapasa chu litapakuwi. Putum uma kinkamakgtayayan nakatsiyaw pi tlan makglhtinanaw lhuwa tasikulunalin xlakata tuku Jesús tlawanit, tlawama chu aku natlawa kimpalakatakan. (Kaʼakxilhti recuadro «Tuku lu xlakaskinka lakgaya Jesús»). Jesús maxkikanit «tlakg xlakaskinka tukuwani nixawa atanu tukuwani», uma wamputun pi kgalhi putum limapakgsin kʼakgapun chu kKatiyatni (Filipenses 2:9; Mateo 28:18).a

Ni kaj akgtum talismanin

Chuna la katsinitaw, kilitlawatkan oración kxtukuwani Jesús xlakata Jehová nakinkakgaxmatniyan (Juan 14:13, 14). Pero ni wamputunaw tachuwin: «kxtukuwani Jesús», kaj xlakata chuna lismaninitaw. ¿Tuku xlakata nichuna kilitlawatkan?

Kalilakpuwanti uma liʼakxilhtit. Akxni wix makglhtinana xcarta chatum stana, max niku sputa tsokgwilikanit tachuwin: «Kmalakgachaniyan tapakgachipat». Pero ¿lakpuwana pi xlikana kxnaku taxtucha tiku tsokgwililh uma? o ¿kaj chuna tlawalh xlakata chuna talismani? Akxni akinin tlawayaw kioracionkan kxtukuwani Jesús, ni kiliʼakxilhatkan la akgtum talismanin. Ni katlawaw la chatum stana tiku tsokgwili tlan tachuwin kaj xlakata chuna talismani. Maski “ankgalhin kilitlawatkan oración”, ni katlawaw kaj xlakata chuna lismaninitaw, wata katlawaw oración «xliputum kinakujkan» (1 Tesalonicenses 5:17; Salmo 119:145).

¿Tuku kilitlawatkan xlakata ni nawanaw tachuwin: «kxtukuwani Jesús», kaj la akgtum talismanin? Kalilakpuwaw la likatsi Cristo. Kalilakpuwaw putum tuku Jesús tlawanit kimpalakatakan chu tuku aku ama tlawa. Akxni tlawayaw oración, kapaxtikatsiniw Jehová chu kamalankiw xlakata maklakaskinit xKgawasa. Komo chuna natlawayaw, tlakg nalipawanaw tuku Jesús malaknulh: «Komo wi tuku naskiniyatit xaTlat, xla nakamaxkiyan kkintukuwani» (Juan 16:23).