¿Tlan lipawankan takanajla? La linkan latamat

Silvia, chatum puskat tiku skuja kʼakgtum pumakuchin, wan: «Lhuwa tiku xaktakgalhtawakgamakgolh kʼuniversidad xwankgo pi xkgalhikgo xtakanajlakan, pero akxni xaktlawayaw examen klhkaxtakgo xtakgalhtin chu xmaklakaskinkgo drogas. Xtakanajlakan ni xtlawa pi tlan xlikatsikgolh».

Lionel, xla wan: «Kincompañeros ni ankgo kxtaskujutkan chu wankgo pi tatatlakgo maski ni xlikana. Xlakan ni xlakaskinka xʼakxilhkgo takanajla kaj xwankgo pi xkgalhikgo xtakanajlakan».

Takanajla kaj tsinu kalakgpalini xtayatkan latamanin. Lhuwa wankgo «pi lu kanajlakgo, pero tuku tlawakgo limasiyakgo [pi ni] kalakgpali xlitliwakga takanajla» (2 Timoteo 3:5, Dios habla hoy, 1994). Tiku kapulalin kxtakanajlakan ni tlan liʼakxilhtit kamasiyanikgo, chu ni kawanikgo tuku wan Biblia xlakata tlan latamat nalinkgo. Wa xlakata lhuwa latamanin lakpuwankgo pi Dios ni kuenta tlawa la limakgolh xlatamatkan.

¿TUKU MASIYA BIBLIA?

Biblia masiya pi Dios makgkatsi chu kuenta tlawa la linaw kilatamatkan chu xlakaskinka akxilha. Akxni israelitas ni xkgalhakgaxmatkgo «nitlan xmamakgkatsinikgo» (Salmo 78:40). Tawila «tapaxuwan anta kʼakgapun» akxni chatum lataman lakgpali xlatamat chu limasiya pi xlikana nitlan limakgkatsi (Lucas 15:7). Akxni akxilhaw xalakswan xtayat kinTlatkan Jehová xalak akgapun, tapaxkit nema kgalhiniyaw tlakg taliwaka, tuku paxki na napaxkiyaw chu nema xkajni na xkajniyaw (Amós 5:15).

¿TUKU TLAWAKGO XTATAYANANIN JEHOVÁ?

Xtatayananin Jehová «masiyakgo pi lu kilipaxkitkan kifamiliareskan chu kamakgtayakgo latamanin xaskujnin nawankgo chu ni naʼakgskgawinankgo» chuna lichuwinalh periódico The Deseret News, de Salt Lake City (Utah, Estados Unidos). Chu na xtatsokgnit: «Tiku anta tapakgsikgo chuna linkgo xlatamatkan la wan Biblia. Xkulikan, lhuwa wakan kuchu, takgaman niku maklakaskinkan tumin, tlawakan talakgxtumit xalimaxana chu tiku tatalakgxtumi xtachixku o xtapuskat, lakpuwankgo pi umakgolh tlawa pi nialhla natalalinaw Dios».

¿La kamakgtayanit xtatayananin Jehová xlakata lakgapaskgonit xtayat Dios? Silvia wan: «Anta niku makuchinankgokan lhuwa takgalhan anan. Lu ni tuwa nachuna natlawaya. Xlakata kkatsi la akxilha Jehováa takgalhan kimakgtaya ni chuna naktlawa. Tlan nakwan pi kpaxuwa chu lu tlan kmakgkatsi». Silvia lakpuwan pi tuku masiyanikanit kxtakanjla makgtayanit kxlatamat.