Tuku natlawaya xlakata tlan nakitaxtu mintamakgaxtokgat akxni xlimakgtiy tamakgaxtokgnita

Herman tiku nilh xpuskat chu Linda, tiku xchixku lakxtlawalh xtamakgaxtokgat lu paxuwakgo xlakata lalakgapaskgolh. Linda lu lakgati Herman. Pero xlakan wankgo pi tamakgaxtokgkan xlimakgtiy tanu taʼakglhuwit limin nixawa la xapulana.b

Komo wix xlimakgtiy tamakgaxtokgnita, ¿la makgkatsiya? Chatum puskat tiku wanikan Tamara, chu tamakgaxtokgpa akxni akgtutu kata lakxtlawalh xtamakgaxtokgat xchixku wan: «Akxni xapulana tamakgaxtokga lakpuwana pi uma putum kilhtamaku nawan. Pero, nialh chuna katilakpuwanti akxni natamakgaxtokga xlimakgtiy, xlakata katsiya la kgalhsputli xapulana mintamakgaxtokgat».

Pero lhuwa tiku xlimakgtiy tamakgaxtokgkgonit, tekgskgonit tapaxuwan. Chu tlan kitaxtunikgonit, ¡chu wix na tlan nakitaxtuniyan! ¿La natlawaya xlakata tlan nakitaxtuniyan? Kaʼakxilhwi pulaktutu taʼakglhuwit nema tawila chu la kinkamakgtayayan xtastakyaw Biblia.c

XAPULANA TAʼAKGLHUWIT: XAPULANA MINTAMAKGAXTOKGAT NATLAWA PI NI NAPAXUWAYATIT LA UKU.

Ellen tiku xalak kSudáfrica wan: «Min kilhtamaku klakapastaka xapulana kintamakgaxtokgat, chuna kmakgkatsi akxni kan niku xaktaʼan chu niku xakanaw paxialhnanaw. Min kilhtamaku ktamalakxtumi xapulana kinchixku tiku ktamakgaxtokga uku». Komo tiku tatamakgaxtokgti wa xtamakgaxtokgnit chu komo lichuwinan tiku xtatamakgaxtokgnit max nitlan nalimakgkatsiya.

MAX TLAN XTLAWA UMA: Liwana kalakpuwanti pi tiku tatamakgaxtokgti nila lakapala nialh nalakapastaka tiku xapulana xtawi. Lhuwa latamanin wankgo pi tiku tamakgaxtokgparakgo limapakuwikgo xtukuwani tiku xapulana xtawilakgolh. ¿Tuku natlawaya xlakata uma ni nalakxtlawa mintamakgaxtokgotkan? Biblia wan: «Kalaʼakgatekgsnitit chatunu chatunu» (1 Pedro 3:8, La Palabra de Dios para Todos).

Ni kamasta talakaskin pi kaj xlakata nalalakgsitsiyatit natlawa pi ni nalichuwinanatit xapulana mintamakgaxtokgatkan. Komo tiku tatamakgaxtokgti lichuwinamputun tiku xtawi kaʼakgatekgsni chu kakgaxmatni. Ni kalakpuwanti komo kaj tamalakxtumiman. Juan, tiku akgkaw kata tamakgaxtokga xlichatiy xpuskat wan: «Kathy nikxni kiwanilh pi ni xaklichuwinalh xapulana kimpuskat. Xlakpuwan pi chuna tlakg tlan xkilakgapasli». Komo nalichuwinanatit xapulana mintamakgaxtokgatkan max asta nakamakgtayayan tlan nalatalalipinatit.

Kaj watiya kaʼakxilhti tlan xtayat tiku tatamakgaxtokgparanita. Tiku tatamakgaxtokgparanita ni xtalakxtum tiku xapulana xtawila, pero max kgalhi atanu lakwan tayat. Wa xlakata kaliskujti xlakata tlan natawila mintamakgaxtokgat nema kgalhiya uku, «ni katamalakastuk[t]i wantu tlawakgo amakgapitsin» (Gálatas 6:4, Hua Xasasti Talaccaxlan, 1999). Edmond tiku xlimakgtiy tamakgaxtokgli wan: «Xtachuna la nakgalhiya chatiy miʼamigos nikxni katitalakxtumikgolh, nachuna kitaxtu akxni xlimakgtiy natamakgaxtokga».

¿La natlawaya xlakata xapulana mintamakgaxtokgat ni namakgalipuwan tiku tatamakgaxtokgnita la uku? Jared wan: «Kwanilh kimpuskat pi xapulana kintamakgaxtokgat xtachuna la akgtum lu stlan libro nema ktsokgwi kinchatiykan. Lakgachunin max naklakapastaka la xaktalalin kimpuskat pero uma ni wamputun pi wa klakapastaka chali chali, wata ktsokgmaw atanu libro xlakata akinin na tlan klatalalinaw chu xatapaxuwan klamaw».

XLIPULAKTIY TAʼAKGLHUWIT: MIʼAMIGOS NI KATSIGKO LA NATALALINKGO TIKU AKU TATAMAKGAXTOKGTI.

Javier wan: «Akxni ktamakgaxtokgwi kiʼamigos xlakputsananikgo kimpuskat komo tlan o nitlan tuku xtlawa», tamakgaxtokgli akxni akgchaxan katata xtitaxtunit la lata xlakxtlawanit xtamakgaxtokgat xpuskat. Leo wan: «Makgapitsin xwanikgo kimpuskat pi lu xlakapastakkgo xapulana xchixku chu lu xpaxkikgo..., ¡chu kkilakatin chuna xwanikgo!».

MAX TLAN XTLAWA UMA: Kamakgkatsi la makgkatsikgo xʼamigos tiku tamakgaxtokga. Juan wan: «Akit klakpuwan pi kiʼamigoskan lilipuwankgo chu nitlan limakgkatsikgo akxni katatanokglhaw xlakata tanuja tiku tawilaw, xlakan lakapastakkgoyku tiku xtawilaw». Chuna la wan Biblia: «Xaliʼankgalhin namasiyunikgoy ntlan xtakatsin xlipaks nchixkuwin» (Tito 3:2). Kakamaxki kilhtamaku pi mi amigos chu mi familiares tlan natalalinkgo tiku tatamakgaxtokgpara. Chuna la mintamakgaxtokgat talakgpalinit max miʼamigos nalakgpalikgo xtayatkan. Javier tiku lichuwinawa wan pi titaxtulh kilhtamaku xlakan tsukulh katalalimparakgo xʼamigoskan. Pero wan: «Nachuna kliskujmaw nakkaputsayaw xasasti amigos uma na kinkamakgtayanitan».

Akxni katawilakgo miʼamigos, kuenta katlawa tuku makgkatsi tiku tamakgaxtokga. Akgtum liʼakxilhtit, komo kgalhchuwinampatit chu nalichuwinankgo tiku xtawila xapulana katlawa pi tiku tawila la uku ni nalimakgkatsi pi akstu wi. Proverbio xalak Biblia wan: «Tiku ni pulana lakapastaka tuku wan snun tlawanan la komo akgtum kuchilo, pero tiku skgalala, tuku wan mapaksanan» (Proverbios 12:18, Traducción en lenguaje actual).

XLIPULAKTUTU TAʼAKGLHUWIT: NI LIPAWANA TIKU AKU TATAMAKGAXTOKGTI XLAKATA TIKU PULANA XTAWILA AKGSKGAWIN.

Andrés wan: «Akit lu xakpekuan xlakata xaklakpuwan pi xkiʼakgskgawilh kimpuskat» chuna la xapulana tiku kimakgxtakgli. Alistalh tatamakgaxtokgli Rita, tiku uku xpuskat, tiku na xtamakgaxtokgnita. Andrés wan: «Min kilhtamaku akstu xkintlawanikan takgalhskinin komo tlan chixku xakwa la xapulana xchixku Rita. Akit xaklakpuwan pi xmilh kilhtamaku xkimakgxtakgli chu atanu tiku xtatawi komo nitlan chixku xaklitaxtulh».

MAX TLAN XTLAWA UMA: Kalitachuwinanti tuku makgkatsiya tiku tawila. Biblia wan: «Nitlan kitaxtu tuku tlawaputunkan komo ni pulana liwana lakkaxlakan» (Proverbios 15:22). Xlakata «liwana lakkaxlakan, uma wamputun liwana latachuwinankan» Andrés chu Rita kamakgtayalh kxtamakgaxtokgatkan xlakata nalalipawankgo. Andrés wan: «Kwanilh Rita pi komo xtawi taʼakglhuwit nikxni lakapala xakamaw lamakgxtakgaw, Rita nachuna kiwanilh». Alh kilhtamaku ktsukulh lipawan.

Komo tiku tatamakgaxtokgti akgskgawika, katlawa pi nalipawanan. Akgtum liʼakxilhtit, Miguel chu Sabrina, tiku nitlan kitaxtunikgolh xapulana kxtamakgaxtokgatkan lakkaxlakgolh pi xlawanikgolh komo xtachuwinankgolh tiku xtatamakgaxtokgkgonit. Sabrina wan: «Uma kinkamakgtayan xlakata naklalipawanaw» (Efesios 4:25).

Lhuwa tiku xlimakgtiy tamakgaxtokgkgonit paxuwakgo chu wix na tlan napaxuwaya. La uku tlakg akstu lakgapaskana chu ni chuna akxni xapulana tamakgaxtokgti. Andrés wan: «Rita lu tlan kimamakgkatsini. Titaxtunita akgkututu kata la ktamakgaxtokgnit chu lu klapaxkiyaw uma lu lanka xtapalh kakxilhaw».