Chuntiya kalapaxkitit

Jehová lakaskin pi ni naʼakgskgawinanaw chu ni namakgxtakgnanaw (Salmo 31:23). Uma tlakg xlakaskinka ktamakgaxtokgat, komo laʼakgskgawikan nialhla lalipawankan. Akxni lalipawankan makgtayanan tlakg nalapaxkikan.

La uku, lhuwa laʼakgskgawikan ktamakgaxtokgat. Xlakata nakuentajtlawaya mintamakgaxtokgat, pulaktiy tuku militlawat.

1 PULANA KAWILI MINTAMAKGAXTOKGAT

TUKU WAN BIBLIA: «[Kakatsitit] tuku tlakg xlakaskinka» (Filipenses 1:10, TNM). Mintamakgaxtokgat wa tlakg xlakaskinka kmilatamat. Talakaskin pulana nawiliya.

Jehová lakaskin pi kaj wa nalakgatiya tiku tamakgaxtokga chu minchatiykan kalipaxuwatit latamat (Eclesiastés 9:9). Liwana wan pi putum kilhtamaku nakuentajtlawaya tiku tamakgaxtokga, chu naputsaya la namakgapaxuwaya (1 Corintios 10:24). Tiku tamakgaxtokga kamakgkatsilh pi lakaskina xtamakgtay chu paxkiya.

TUKU TLAN XTLAWA:

• Kalimaxtuni kilhtamaku tiku tamakgaxtokga, chu kakgaxpatni

• Akxni wi tuku natlawaputuna kalakapastakti pi nialh miʼakstu

2 KAKUENTAJTLAWA MINAKU

TUKU WAN BIBLIA: «Wanti maski kaj naʼukxilha chatum puskat, chu xla napuwan pi tunkan xla xtlawalh, pus tama chixku aya tlawanit talakgalhin kxnaku» (Mateo 5:28, Hua Xasasti Talaccaxlan, 1999). Komo wi tiku nitlan lakpuwani achatum, kitaxtu pi akgskgawima tiku tamakgaxtokga.

Jehová wan pi lu xlakaskinka nakuentajtlawayaw kinakujkan (Proverbios 4:23; Jeremías 17:9). Xlakata chuna nakuentajtlawaya, ni naʼakxilha tuku ni xlilat (Mateo 5:29, 30). Katlawa la Job, tiku talakkaxlalh xlakgastapu ni nalakpuwani tuku nitlan atanu puskat (Job 31:1). Ni naʼakxilha tiku ni lhakganankgonit. Chu nipara tsinu nalakgatiputuna tiku ni tamakgaxtokga.

TUKU TLAN XTLAWA:

• Kakalimasiyani amakgapitsin pi lu xlakaskinka akxilha tiku tamakgaxtokga

• Kamaxki kakni tuku makgkatsi tiku tamakgaxtokga chu nialh katalalipi tiku nitlan mamakgkatsini