¿La tlan nalikatsini chixku xpuskat?

¿LA NATLAWA chatum chixku xlakata namapakgapaxuwa xpuskat? Makgapitsi xwankgolh pi tlan namamakgkatsinikgo. Chu lakpuwankgo kajwatiya talakaskin nalinkgo lhuwa tumin kxchikkan; wankgo pi wa uma tuku tlakg xlakaskinka. Wa xlakata, ¿tuku xlakata nitlan makgkatsikgo makgapitsi lakpuskatin maski kgalhikgo tumin? Rosa, tiku xalak España lichuwinan chixku tiku tatamakgaxtokgli: «Kxlakatin latamanin lu tlan xkilikatsini pero akxni kiakstukan xakwilaw lu nitlan xkilikatsini». Joy, tiku xalak Nigeria, wan: «Komo ni xaklakgati tuku xwan, xkiwani: “Natlawaya tuku kwaniyan xlakata akit minchixku”».

¿Tuku xlitlawat chixku xlakata tlan namakgantaxti tuku lakgayawakanit kxchik? ¿La natlawaya xlakata mimpuskat nakatsi pi paxkiya chu tlan namakgkatsi chu naʼakxilha xchik la «niku tlan najaxa»? (Rut 1:9.)

¿TUKU WAN BIBLIA XLAKATA LIMAPAKGSIN NEMA KGALHI XACHIXKU?

Maski chixku chu puskat lakxtum kaʼakxilha Dios, Biblia wan pi xchatunukan wi tuku kalakgayawakanit tuku natlawakgo kxfamiliajkan. Romanos 7:2 lichuwinan pi xapuskat xlimaxkit kakni xlimapakgsin xchixku. Chuna la akgtum empresa wi tiku pulalin, nachuna, Dios wilinit xachixku xlakata wa napulalin familia. Wa xlakata wa pulalin xpuskat (1 Corintios 11:3).

¿La nalimaklakaskin chixku limapakgsin nema maxkinit Dios? Efesios 5:25 kgalhtinan: «Kapaxkitit mimpuskatkan». Chu alistalh wampara: «Xtachuna lantla mpaxkilh nCristo nkgamputum nkanajlanin». Chuna, maski Jesús nikxni tamakgaxtokgli, xliʼakxilhtit nakamakgtaya lakchixkuwin tiku tamakgaxtokgkgonit. Kaʼakxilhwi la nakamakgtaya.

JESÚS LU TLAN LIʼAKXILHTIT KAWILINI LAKCHIXKUWIN

Jesús lhuwa liskujli xlakata tlan nakamamakgkatsini latamanin. Putum latamanin tiku nitlan xlimakgkatsikgo xlakata taʼakglhuwit kawanilh: «Kakilakgtantit [...] na natakgsniyatit ntajaxni milistaknakan» (Mateo 11:28, 29). Xtlawa pi tlakg tlan xmakgkatsikgolh latamanin xlakata xkamakuchi chu xkamakgtaya pi tlan xtalakatsuwinikgolh Dios. ¡Wa xlakata latamanin xlakgtalakatsuwikgo!

La natlawayaw xliʼakxilhtit Jesús. Kalakputsa la natlawayaw xlakata tlan namamakgkatsiniya mimpuskat. Lhuwa lakpuskatin makgkatsikgo la Rosa, wan: «Kinchixku xkilikatsini la chatum makgskiti». Pero chatum chixku tiku wanikan Kweku wan: «Putum kilhtamaku kkgalhskin kimpuskat komo lakaskin tamakgtay. Komo lu kpaxki, klismaninit kmakgtaya taskujut xalakchiki maski xla nitu kiwaninit».

Jesús kamaxkilh kakni chu kaʼakgatekgsnilh. Akxni chatum puskat kgaxmatli milagros nema xtlawama Jesús, xlina akgkutiy kata lata xlipatinama akgtum tajatat. Wa xlakata lakpuwa: «Lapi naktokglhniy nkana pi xman wa xlhakgat, naklilakgtaxtuy». Chu xlikana tuku xlakpuwan. Lakgtalakatsuwilh Jesús, tokglhli xkilhpan klhakgat chu tunkun paksli. Maski makgapitsi wankgolh pi nitlan tuku tlawalh, Jesús xkatsi pi lu xlakgaputsama.a Wa xlakata tlan limamakgkatsinilh uma tachuwin: «Tsumat, [...] ni alh katikgalhi mintajatat». Xlakata tuku tlawalh limasiyalh la xkgalhi xtayat: chatum chixku tiku xkaʼakgatekgsni amakgapitsin (Marcos 5:25-34).

Kakgalhiw tayat la xkgalhi Jesús. Akxni nitlan namakgkatsi mimpuskat, kaʼakgatekgsni chu ni lakapala kasitsi; kalakpuwanti tuku xlakata chuna makgkatsi. Ricardo wan: «Akxni kakxilha kimpuskat pi kaj lakapala sitsi, lu kuentajktlawa ni nakwani tuku nitlan nalimakgkatsi».

Jesús xkatachuwinan kstalaninanin. Xkaʼakxilha la xʼamigos chu lhuwa kilhtamaku xlimaxtu nakatachuwinan. Asta kawanilh: «Sampi xlipaks ntu kkgaxmatnilh nkinTlat, kkamasiyuninitan» (Juan 15:15). Xlikana pi lakgachunin xakstu xtawilaputun xlakata nalilakpuwan chu natlawa oración, pero tlakg makglhuwa xkawani kstalaninanin tuku xlakapastaka. Akgtum liʼakxilhtit, katsisni akxni xʼamakaja makgnikan kawanilh pi lu xlakgaputsama (Mateo 26:38). Chu asta akxni xtlawakgo tuku nitlan chu ni xlakgati, chuntiya xkatachuwinan (Mateo 26:40, 41).

La nastalaniyaw xliʼakxilhtit Jesús. Katachuwinanti mimpuskat. Kawani tuku lakpuwana chu tuku makgkatsiya. Lhuwa lakpuskatin tiku nitlan lichuwinankgo xchixkukan, wankgo pi akxni lhuwa wilakgokga lu chuwinankgo, pero akxni wilakgolh kxchikkan ni chuwinankgo. Ana, lichuwinan la makgkatsi akxni xchixku wani tuku makgkatsi: «Kmakgkatsi pi kimpaxki chu akxtum kwilaw».

Ni katlawa pi mimpuskat nitlan nalimakgkatsi kaj xlakata ni natachuwinana. Chatum puskat wan: «Akxni kinchixku kisitsini lhuwa kilhtamaku titaxtu chu ni kintachuwinan. Xkimamakgkatsini pi kinkuenta tuku xlanit chu xkimamakgkatsini pi nitu xaklitaxtu.» Pero Edwin, kgalhiputun xtayat la xkgalhi Jesús. Wan: «Akxni ksitsi ni lakapala kkgalhtinan. Klakputsa kilhtamaku akxni naklakkaxtlawayaw kintaʼakglhuwitkan.»

Joy, tiku lichuwinawa, akxilhli pi xchixku talakgpalilh akxni tsukulh katakgalhtawakga xtatayananin Jehová. Xla wan: «Lu talakgpalinit xlakata tlakg xapaxkina chuna la Jesús». Biblia kamakgtayanit lhuwa millones tamakgaxtokgat. ¿Xlakgati nachuna xkgalhi mintamakgaxtokgat? Kawani chatum xtatayana Jehová pi lakaskina akgtum takgalhtawakga xalak Biblia; ni taxokgo.