¿La likatsikgo xtatayananin Jehová?

Akinin ni atanu takanajla kmakgtapakgsiyaw, kaniwa niku kwilaw xlikalanka katiyatni chu nipara akxtum kkatalayaw atanu takanajla. Anta kʼEstados Unidos pulalinkan taskujut nema ktlawayaw. Pero atsinu ni putum xTatayananin Jehová klamaw atanu países. Nachuna, xlikalanka katiyatni max akgtsayan millones akinin, chu klimakgalhtawakgenanaw Biblia kliwaka 230 países chu niku talichuwinan Dios. Chuna kmakgantaxtimaw xtachuwin Jesucristo: «Umakgolh xalakwan xalaksasti tamakatsin xla xtamapakgsin Dios natalichuwinan kputum katiyatni xlakata natamakatsininan kputum laklanka kachikinin» (Mateo 24:14).

Xanikuta niku kwilaw, kkamaxkiyaw kakni chu kgalhakgaxmataw limapakgsin xla país, pero ni kmakgtanuyaw kpolítica. Chuna kkgalhakgaxmataw limapakgsin nema Jesús kamaxkilh kstalaninanin akxni kawanilh: «Wa mpi kumu ni xala katuxawat wixin». Wa xlakata ni makgtanuyaw kpolítica chu guerras (Juan 15:19; 17:16). Xlakata uma, akxni tatlawalh xliʼAkgtiy Guerra xLikalanka Katiyatni lhuwa xtatayananin Jehová katamaknuka kpulachin, kamapatinika chu asta makgapitsi kamakgnika. Chatum alemán tiku nialh obispo xlitaxtu tsokgli: «Tlan liwana nawanaw pi kaj xlakan ni makgtanukgolh kxtamapakgsin Tercer Reich».

Pero uma ni wamputun pi ni kkatalalinaw latamanin. Akxni Jesús tlawanilh oración Dios xpalakata kstalaninanin wa: «Ni kwaniman pala kaj katamakaxtukgo unu katuxawat» (Juan 17:15). Wa xlakata, kskujaw, kanaw tamawananaw chu kanaw kʼescuela xtachuna kintalakatsukan.