¿Makgtayanan xtastakyaw Biblia la uku?

MAKGAPITSI WANKGO PI NI. Chatum makuchina wa pi maklakaskinkan Biblia xlakata nakinkapulalinan xtachuna maklakaskinkan maktum libro xla kata 1920 xlakata namasiyakan k’akgtum clase xla Química. Tiku ni kanajlani Biblia, max asta nakgalhskinan komo xmaklakaskinti maktum manual xla computadora xala makgasa xlakata namaklakaskina xasasti computadora. Makgapitsi wankgo pi Biblia nialhpara tsinu makgtayanan.

¿Tuku xlakata wi tiku namaklakaskin uma libro xlakata napulalin k’uma kakilhtamaku niku lhuwa anan tuku xasasti? Uku lhuwa anan sitios xla Internet chu niku tsokgkgo tuku lakpuwankgo latamanin nema ankgalhin limin tastakyaw chu tapulalit. Na wilakgo programas niku wan tuku lakpuwankgo amakgapitsin chu niku katlawanikan takgalhskinin, chu anta taxtukgo psicólogos, gurús chu escritores. Chu lhuwa niku tlawakan libros maxtukgo libros nema makgtayanan, chu malhuwini xtumin empresa nema lhuwata tumin kgalhi.

Xlakata lhuwa tamakatsin taxtu akgatunu minuto, ¿tuku xlakata wi tiku naputsa xtapulalit maktum libro nema 2,000 kata lata tsokgkanit? ¿Xlikana tuku wankgo tiku ni kanajlanikgo Biblia akxni tamalakxtumikgo la maktum xamakgan libro xla química o manual xla computadora? Uma tuku tamalakxtumikgo ni xlikana. Ciencia chu tuku xasasti lakapala talakgpali, ¿pero tlan natalakgpali tuku maklakaskinkgo latamanin? Latamanin chuntiya putsakgo napaxuwakgo, nitu nalipekuankgo, wi tuku natlawakgo kxlatamatkan, makxtum natawila xfamiliajkan chu nakgalhikgo tlan amigos.

Maski Biblia xamakgan, kinkawaniyan tuku tlan natlawayaw xlakata nakgalhiyaw uma chu atanu tuku maklakaskinaw. Biblia na wan pi wa kiMalakatsukinakan tiku matsokgninalh. Uma libro kinkapulalinan kkilatamatkan chu kinkamakgtayayan nalakkaxtlawayaw tuku natitaxtuyaw (2 Timoteo 3:16, 17). Nachuna, xtastakyaw makgapala putum kilhtamaku chu chuntiya makgtayanan. Biblia xʼakstu lichuwinankan: «Xtachuwin Dios [...] xastakna» (Hebreos 4:12).

¿Xlikana tuku wan Biblia? ¿Lu xamakgan libro o xlikana maktum xastakna libro nema tlakg makgtayanan? Uma revista Makatsinina tlawakanit xlakata namakgtayayan nakgalhtiya umakgolh takgalhskinin, uma revista wa xapulana xla akgtum serie.