Biblia tlan nakinkapulalinan

Komo akxni wi tuku nalaksakaw kajwatiya nalipawanaw kintalakapastaknikan o tuku lakpuwankgo amakgapitsin, max ni ankgalhin tlan kintikakitaxtunin. Biblia wan tuku xlakata chuna kitaxtu, chu kinkawaniyan tuku tlan natlawayaw xlakata napaxuwayaw chu tlan namakgkatsiyaw. Tuku lichuwinan Biblia xlikana tlan lipawankan.

MAKLAKASKINAW XTAPULALIT DIOS

Anta kBiblia, Jehováa Dios liwana kinkawaniyan pi latamanin maklakaskinaw xtamakgtay; ni kinkamalakatsukin xlakata kiʼakstukan nakinkapulalinkanan (Jeremías 10:23). Wa xlakata liwana matsokgwilininalh kBiblia tapulalit nema maklakaskinaw xlakata nalaksakaw tuku tlan akxni wi tuku lu xlakaskinka kilitlawatkan kkilatamatkan. Xla lu kinkapaxkiyan chu ni lakaskin pi wi tuku nalaksakaw kaj xlakata naʼakxilhaw komo tlan o nitlan nakinkakitaxtuniyan, xlakata uma tlawa pi lu napatinanaw alistalh (Deuteronomio 5:29; 1 Juan 4:8). Nachuna, xla kiMalakatsukinakan, lu xaskgalala chu liwana kinkalakgapasan, wa xlakata tlan kinkamaxkiyan xalaktlan tastakyaw (Salmo 100:3; 104:24). Pero Dios nikxni mafuerzajlini chatum lataman nakgalhakgaxmata.

Jehová kamaxkilh xapulana chixku chu xapulana puskat, Adán chu Eva, putum tuku xmaklakaskinkgo xlakata xkgalhikgolh tapaxuwan (Génesis 1:28, 29; 2:8, 15). Na kamaxkilh makgapitsi limapakgsin nema ni laktuwa xwanit chu xla xlakaskin pi xkgalhakgaxmatkgolh, pero mastalh talakaskin pi xlakan xlaksakkgolh komo xkgalhakgaxmatkgolh o ni (Génesis 2:9, 16, 17). Lu nitlan, pero Adán chu Eva ni kgalhakgaxmatkgolh xlimapakgsin Jehová, wata xʼakstukan tapakgsiputunkgolh (Génesis 3:6). ¿Chu la kinkakitaxtuninitan putum latamanin xlakata kiʼakstukan laksakaw tuku lakpuwanaw pi tlan? ¿Tlan kinkakitaxtuninitan? Nichuna. Tuku lanit kkakilhtamaku limasiyanit pi akxni lakatsalayaw xlimapakgsin Jehová ni kinkaliminiyan takaksni chu nipara tapaxuwan (Eclesiastés 8:9).

Biblia kinkamaxkiyan tapulalit nema maklakaskinaw xlakata nalaksakaw tuku tlan, maski ktanu tanu kachikin lamaw (2 Timoteo 3:16, 17; kaʼakxilhti recuadro «Maktum libro nema tlan kamakgtaya putum latamanin»). Kaʼakxilhwi la kinkapulalinan Biblia.

Kaʼakxilhti tuku xlakata tlan wanaw pi Biblia wa «xtachuwin Dios» (1 Tesalonicenses 2:13). Katanu kjw.org chu kaʼakxilhti video ¿Tiku matsokgninalh tuku wi kBiblia?

¿TUKU XLAKATA MAKGAPITSIN NI LIPAWANKGO BIBLIA?

Makgapitsi latamanin lakpuwankgo pi nila lipawankan pi Biblia tlan nakinkapulalinan. Wa uma makgapitsi tuku wankgo:

Tuku wankgo: «Pulakatunu tuku masiya Biblia latalawani».

Tuku xaxlikana: Max akxni xapulana nalikgalhtawakgayaw pulaktum tuku masiya Biblia nalakpuwanaw pi talawani atanu tuku masiya. Pero komo nalilakpuwanaw putuminika tuku lichuwinan tuku likgalhtawakgamaw, kilhtamaku akxni tsokgwilika, talismanin nema xʼanan, tuku xlakpuwankgo chatunu chatunu tiku tsokgwilikgolh Biblia chu atanu tuku xlama uma kilhtamaku, naʼakxilhaw pi ni latalawani.

Komo akxilhputuna makgapitsi liʼakxilhtit, kalikgalhtawakga artículo «¿Se contradice la Biblia?» kjw.org.

Tuku wankgo: «Latamanin tiku likgalhtawakgakgo Biblia na tlawakgo tuku nitlan. Wa xlakata max ni xlikana pi lu litamakgtayakan».

Tuku xaxlikana: Biblia ni xkuenta pi latamanin ni lilatamakgo xtastakyaw. Biblia xlichuwinanit pi lhuwa latamanin, asta tiku xʼamakgo pulalinkgo takanajla, ni xʼamakgo lilatamakgo tuku xmasiyakgolh. Na lichuwinalh pi xkuentajkan umakgolh latamanin, «lu nitlan» xʼamaka lichuwinankan tuku masiya Biblia (2 Pedro 2:1, 2).

Komo akxilhputuna la xpulalinanin takanajla lakgmakgankgonit tuku masiya Biblia, kaʼakxilhti video «Takanajla kimakgalipuwa» kjw.org.

Tuku wankgo: «Biblia tlawa pi nakalakgmakganaw latamanin».

Tuku xaxlikana: Biblia kinkamakgpuwantiniyan nakamaxkiyaw kakni amakgapitsin. Chu wan tuku ni kilitlawatkan:

Ni nalakpuwanaw pi tlakg xlakaskinka litaxtuyaw nixawa amakgapitsin (Filipenses 2:3).
Ni nakalakgmakganaw tiku ni kgalhikgo watiya kintakanajlakan chu ni kgalhikgo tayat nema akinin kinkalimakgastakkanitan (1 Pedro 2:17).
Ni nakamafuerzajliniputunaw amakgapitsin pi kalakpuwankgolh chuna la akinin (Mateo 10:14).

Biblia masiya pi Dios xaʼakgstitum chu tlan kalikatsini latamanin, chu xla lakaskin pi akinin nachuna kalikatsiw (Romanos 9:14).

Komo tlakg katsiputuna, kaʼakxilhti artículo «¿Kinkamakgtayayan Biblia namaxkiyaw kakni tuku lakpuwankgo amakgapitsin?» kjw.org.

DIOS KINKALIPULALINAN BIBLIA

Biblia kinkalitachuwinanan la kamakgtayanit Dios latamanin chuna la titaxtunit kilhtamaku. Akxni likgalhtawakgayaw, katsiniyaw tuku Dios tlan akxilha chu tuku nitlan akxilha, tuku xla lakpuwan pi nalitamakgtayayaw o tuku nitlan kintikakitaxtunin (Salmo 19:7, 11). Akxni likgalhtawakgayaw Biblia, tekgsaw tastakyaw nema chuntiya kinkamakgtayayan maski makgasata la tsokgwilikanit chu kinkapulalinan chali chali.

Akgtum liʼakxilhtit, Proverbios 13:20 masta uma tastakyaw: «Tiku katalalin xalakgskgalalan latamanin xaskgalala nawan, pero tiku katalalin tiku lu xalaktontos nitlan katikitaxtunilh». Uma tastakyaw chuntiya makgtayanan la uku chuna la makgtayananit makgasa. Chu uma tastakyaw kaj pulaktum nema kinkalitachuwinanan Biblia chu lu kinkamakgtayayan (kaʼakxilhti recuadro «Xtastakyaw Biblia ankgalhin makgtayanan»).

Pero max nalakpuwana: «¿Tuku limasiya pi tlan naklipawan Biblia?». Kʼatanu artículo nalichuwinanaw la kamakgtayanit xtastakyaw Biblia makgapitsi latamanin.

a Jehová wa xtukuwani Dios (Salmo 83:18).

XTASTAKYAW BIBLIA ANKGALHIN MAKGTAYANAN

Maski titaxtunita max 2,000 kata lata tsokgwilikgoka Biblia, chuntiya kinkamakgtayayan. Chu chuna la titaxtunit kilhtamaku, putum akinin watiya tuku putsanitaw: nakgalhiyaw tapaxuwan chu tlan namakgkatsiyaw (Eclesiastés 1:9). Chu maski makgasa lata tsokgwilikanit Biblia, xtastakyaw nakinkamakgtayayan nakgalhiyaw tapaxuwan.

Xaʼakgstitum nalikatsiyaw

«Akgstitum [latamaputunaw] putum kilhtamaku» (Hebreos 13:18).
«Tiku kgalhanan nialh kakgalhanalh; wata katlawalh palha taskujut» (Efesios 4:28).

Tlan nakatalalinaw amakgapitsin

«Chatunu chatunu chuntiya kaputsalh ni wa tuku xʼakstu nalitamakgtaya, wata wa tuku nalitamakgtaya achatum» (1 Corintios 10:24).
«Chuntiya kalatatayanitit chu lu kalatapatiputuntit» (Colosenses 3:13).

Tlan tuku nalaksakaw

«Tiku ni skgalala kanajla putum tuku wanikan, pero tiku skgalala liwana lakapastaka tuku natlawa» (Proverbios 14:15).
«Tiku skgalala akxilha tuku nitlan chu tatsekga, pero tiku xalaktontos tsaj ankgo chu patikgo tuku nitlan kitaxtu» (Proverbios 22:3).