Akxni makgkatsiya pi nialh tayaniya

«Putum kilhtamaku xaklakgaputsa pi asta klakpuwa akstu nakimakgnikan» (Adriana, Brasil).

¿MINIT kilhtamaku lu nitlan makgkatsinita pi asta nialh latapaputuna? Komo chuna, max akgatekgsniya Adriana. Xla lu xlakgaputsa, xlipuwan chu ni x’anan tuku tlan xmamakgkatsini. Alistalh wanika pi xkgalhi xasnun tajatat xla talipuwan.

Kaʼakxilhti tuku titaxtulh Kaoru, chatum chixku xalak Japón tiku kakuentajtlawalh xnatlatni tiku xlinkgoya kata chu xtatatlakgo. Xla wan: «Amacha kilhtamaku, xakmakgkatsi pi lhuwa tuku xkimatlawikan ktaskujut. Titaxtulh kilhtamaku, nialh xakwayamputun chu nialhla xaklhtata. Xlakata nialh xakpatinalh, xakniputun».

Chatum chixku xalak Nigeria nema wanikan Ojebode, wan: «Putum kilhtamaku xaklipuwan chu katuwa tuku xkimakgatasa. Asta klakpuwa kiʼakstu nakimakgnikan». Ojebode, Kaoru chu Adriana ni akstu kamakgnika, pero tuku nitlan, wa pi akgatunu kata atsinu ni chan akgtsayan ciento mil tiku x’akstu kamakgnikan.

¿NIKU NATEKGSA TAMAKGTAY?

Tiku tlakg xʼakstu kamakgnikan wa lakchixkuwin, chu lhuwa ni skinkgo tamakgtay xlakata maxanankgo. Pero Jesucristo, wa pi tiku kgalhikgo tajatat talakaskin nalakgankgo makuchinanin (Lucas 5:31). Wa xlakata, komo wix chuna makgkatsiya, ni kamaxananti naputsaya tamakgtay. Lhuwa latamanin tiku kgalhikgo tajatat xla talipuwan kamakgtayanit akxni kilakglakgonit chatum makuchina. Ojebode, Kaoru chu Adriana makglhtinankgolh xtamakgtay makuchinanin chu la uku tlakg tlan makgkatsikgo.

Xlakata nakuchikan tajatat xla talipuwan, makgapitsi makuchinanin wankgo tuku likuchun tlan nawaya, nalakgpina psicológo o komo pulaktiy tuku militlawat. Nachuna, tiku kgalhikgo uma tajatat, lakaskinkgo pi xʼamigos chu xfamilias kakamakgtayakgolh, kakaʼakgatekgsnikgolh chu ni lakapala nakasitsinikgo. Jehová wa tlakg xatlan amigo nema tlan nakgalhiyaw chu kinkamaxkiyan lu xatlan tamakgtay: xTachuwin, Biblia.

¿ANAN TUKU TLAN NAMAPAKSANAN?

Makglhuwa, tiku kgalhikgo tajatat xla talipuwan, talakaskin makgas nakuchunkgo chu wi tuku xlilakgpalitkan kxlatamatkan xlakata tlan natayanikgo xtajatatkan. Pero komo wix tiku kgalhiya uma tajatat, liwana kakatsi pi tlan tuku kgalhkgalhiman. Wa uma tuku lakpuwan Ojebode, tiku wan: «Lu kakxilhputun la nakgantaxtu Isaías 33:24, niku lichuwinan pi namin kilhtamaku nipara chatum lataman nawan: “Ktatatlay”». Na tlan nalimakgkatsiya akxni nakatsiya pi Dios malaknunit «xasasti tiyat», anta niku nialh katiʼanalh «ntakatsanajwat» nipara wa tuku lilakgaputsa kintalakapastaknikan (Apocalipsis [Revelación] 21:1, 4). Mintalipuwan putum kilhtamaku natapanu. Nikxni katimakgkatsipara uma, nialhpara kaj katilakapastakti (Isaías 65:17).

Textos xalak Biblia nema tlan namakgtayayan

Dios akgatekgsa tuku wix makgkatsiya

«Akit, Jehová miDios, kpakgachipanitan, Akit tiku waniyan: “Ni kapekuanti. Akit xlikana nakmakgtayayan”» (Isaías 41:13).

Jehová liwana akgatekgsa la makgkatsiyaw nixawa akinin chu kinkamakgtayaputunan.

Kalilakpuwanti xTachuwin Dios

Elías «tsukulh skin pi xnilh chu xwan: “¡Tlantiya! La uku, oh Jehová kakimakglhti kilatamat”» (1 Reyes 19:4).

Ojebode wan: «Kimakgtayalh akxni xaklilakpuwan xTachuwin Dios. Kkatsilh pi palakachuwina Elías na makgkatsilh chuna la akit».

Kakatsini xlakata xliʼakxilhtitkan tiku talichuwinan kBiblia

Jesús wanilh Pedro: «Kpalakaskinitan kkioración lakimpi ni namakgatsankgaya mintakanajla» (Lucas 22:32).

Akxni makgtutu xwanit pi ni xlakgapasa Jesús, Pedro lu nitlan limakgkatsilh chu lu tasaxnilh. Kaoru wan: «Akxni kkatsilh pi Jehová chu Jesús lilakgaputsakgolh tuku xmakgkatsi Pedro, lu kimakgpuwantinilh».

Nikxni katimakgkatsipara uma, nialhpara kaj katilakapastakti (Isaías 65:17).