¿Xkatsiyata?

Makgasa, ¿tuku xlitlawat xwanit tiku xʼamputun kbarco?

KXKILHTAMAKU Pablo, ni xʼanan barcos nema xkalilh latamanin. Komo chatum lataman wi niku xʼamputun, pulana xtalakaskin nakgalhskininan komo xʼanan akgtum barco nema xlin listat chu komo tlan xlinka (Hech. 21:2, 3). Maski uma barco ni anta xʼan niku lataman xʼamputun niku xkitachokgoy, anta xtaktay chu atanu xputsapara xlakata nalin niku ama (Hech. 27:1-6).

Ni putum kilhtamaku tlan xʼankan kbarco chu ni xkgalhikgo hora xlakata nataxtukgo. Tiku xmatlawanikgo barcos chu xkanajlanikgo magia ni kajwatiya xmalakgachokgokgoy barco xlakata nitlan xwi kilhtamaku wata na xmalakgachokgokgoy xlakata xlakpuwankgo pi nitlan tuku nala, akgtum liʼakxilhtit, komo xʼakxilhkgo tantum cuervo pi lakatsu xlatawilay niku xlamakgolh xlakpuwankgo pi nala tuku nitlan. Tiku xmatlawanikgo barco xlinkgo komo tlan xwi kilhtamaku, xlakata chuna tlan xmatlawanikgo. Wa xlakata, akxni lataman wi niku xʼamputun chu xtekgsa akgtum barco nema tlan xlilh, xtalakaskin xʼalh niku taxtukgo barcos chu anta xkgalhkgalhilh asta akxni xtaxtulh.

Historiador Lionel Casson lichuwinan: «Komo wi niku xpimputuna anta kRoma ni tuwa xwanit xlakata lakapala xtekgskan barco. Niku xtaxtukgo barco xwi anta kxkilhtun kgalhtuchokgo Tíber. Lakatsu kachikin Ostia xʼanan niku xkgalhkgalhikan barcos chu anta tlan xkgalhskininankan. Lhuwa umakgolh xtapakgsinikgo: navieras de Narbona [la uku Francia], chu xla Cartago [la uku Túnez], [...]. Lataman tiku wi niku xʼamputun kajwatiya xtalakaskin naʼan kgalhskininan niku xkgalhkgalhikan barcos».

Xʼankan kbarco ni tapalaxla xwanit, pero nachuna lu tuwa xwanit. Apóstol Pablo makglhuwa limaklakaskilh barco akxni xʼan lichuwinan Dios (2 Cor. 11:25).