Xatapaxuwan katapakgsiniw Jehová

1. ¿Tuku xlakata kilitapakgsinitkan Jehová?

KILITAPAKGSINITKANb Jehová. Xla kiMalakatsukinakan, wa xlakata lakgchan nakinkamapakgsiyan (Rev. 4:11). Pero wi a pulaktum tuku xlakata kilikgalhakgaxmatatkan: xlakata wa tiku tlakg tlan mapakgsina. Chuna la titaxtunit kilhtamaku, lhuwa lakchixkuwin kamapakgsikgonit amakgapitsin. Pero Jehová wa tiku tlakg xaskgalala, xapaxkina, xaʼakgatekgsnina chu xalakgalhamanina mapakgsina (Éx. 34:6; Rom. 16:27; 1 Juan 4:8).

2. Chuna la wan Hebreos 12:9-11, ¿tuku xlakata kilitapakgsinitkan Jehová?

² Jehová lakaskin pi nakgalhakgaxmataw xlakata paxkiyaw chu la xapaxkina kinTlatkan naʼakxilhaw, ni kaj xlakata pekuaniyaw. Anta kcarta nema Pablo kamalakgachanilh hebreos, lichuwinalh pi kilitapakgsinitkan xapaxkina kinTlatkan xlakata xla kinkamasiyaniyan «xlakata tlan nakinkakitaxtuniyan» (kalikgalhtawakga Hebreos 12:9-11).

3. 1) ¿La limasiyayaw pi tapakgsiniyaw Jehová? 2) ¿Tuku takgalhskinin nakgalhtiyaw kʼuma artículo?

³ Tapakgsiniyaw Jehová akxni liskujaw xlakata nakgalhakgaxmataw chu ni kiʼakstukan nakinkalipawankanan (Prov. 3:5). Komo nalakgapasaw xalakwan xtayat, tlakg ni tuwa katimakgkatsiw natapakgsiniyaw, xlakata putum tuku xla tlawa limasiya tayat nema kgalhi (Sal. 145:9). Akxni tlakg lakgapasaw Jehová, tlakg paxkiyaw. Chu komo paxkiyaw, ni talakaskin akgtum lista niku nakinkawaniyan tuku kilitlawatkan chu tuku ni natlawayaw. Liskujaw xlakata nalakapastaknanaw chuna la Jehová xlakata tuku xatlan chu ni tlawayaw tuku nixatlan (Sal. 97:10). Max namin kilhtamaku tuwa namakgkatsiyaw nakgalhakgaxmataw. ¿Tuku xlakata? ¿Chu tuku tlan nakatsinikgo lakgkgolotsin, natlatni chu tiku xatse litaxtukgo xlakata xliʼakxilhtitkan Nehemías, mapakgsina David chu María, xtse Jesús? Kʼuma artículo natekgsaw xatakgalhtin.

TUKU XLAKATA LAKGACHUNIN TUWA MAKGKATSIYAW NATAPAKGSINIYAW JEHOVÁ

4, 5. Chuna la wan Romanos 7:21-23, ¿tuku xlakata lakgachunin tuwa makgkatsiyaw tapakgsiniyaw Jehová?

⁴ Pulaktum tuku xlakata tuwa makgkatsiyaw natapakgsiniyaw Jehová wa pi makglakgalhinanin akinin. Wa xlakata, lakgachunin ni kgalhakgaxmatnamputunaw. Akxni Adán chu Eva ni kgalhakgaxmatkgolh Dios chu wakgolh xtawakat kiwi nema xkawanikanit pi ni nawakgo, xʼakstukan tapakgsikgolh (Gén. 3:22). Chuna la xlakan, la uku lhuwa latamanin ni kgalhakgaxmatputunkgo Dios chu xʼakstukan laksakkgo tuku lakpuwankgo.

⁵ Asta akinin tiku lakgapasaw chu paxkiyaw Jehová max tuwa makgkatsiyaw tapakgsiniyaw. Wa uma tuku akgspulalh apóstol Pablo (kalikgalhtawakga Romanos 7:21-23). Chuna la xla, akinin tlawaputunaw tuku Dios wan pi xatlan. Pero talakaskin pi ankgalhin naliskujaw xlakata ni natlawayaw tuku nixatlan.

6, 7. ¿Tuku atanu natlawa pi tuwa namakgkatsiyaw natapakgsiniyaw Jehová? Kawili akgtum liʼakxilhtit.

⁶ Nachuna, tuwa namakgkatsiyaw natapakgsiniyaw Jehová xlakata max chuna kinkalimasmanikan niku kinkamakgastakkan. Talakpuwan nema kgalhikgo lhuwa latamanin ni wa tuku lakpuwan Dios, chu max naliskujaw xlakata ni chuna nalakpuwanaw la lakpuwankgo latamanin xalak kakilhtamaku. Kaʼakxilhwi akgtum liʼakxilhtit.

⁷ Kmakgapitsin kachikinin, wi talismanin xlakata nakamakgpuwantinikan lakkamanan pi katlajakgolh lhuwa tumin. Wa uma tuku akgspulalh chatum tala tiku wanikan Mary.c Akxni nina xlakgapasa Jehová, kgalhtawakgalh kʼakgtum lu xlakaskinka universidad xalak xkachikin. Xfamilia xwanikgo pi xputsalh akgtum taskujut niku xtlajalh lhuwa tumin chu lu xlakgapaska. Chu xla nachuna xlakpuwan. Pero nialh chuna lakpuwa akxni lakgapasli Jehová. Maski chuna, xla lichuwinan: «Lakgachunin, kakxilha pi tlan xakmatsukilh akgtum taskujut niku tlan xaktlajalh lhuwa tumin pero uma natlawa pi nialh lu naskujnani Jehová. Xlakata chuna kilimakgastakka, lakgachunin tuwa kmakgkatsi ni nakmakglhtinan akgtum taskujut. Kskini Jehová pi kakimakgtayalh xlakata tlan naktayani akxni kiwanikan pi kakmakglhtinalh akgtum taskujut nema natlawa pi nialh nakskujnani» (Mat. 6:24).

8. ¿Tuku naʼakxilhaw?

⁸ Chuna la akxilhnitaw, akxni tapakgsiniyaw Jehová lu tlan kinkakitaxtuniyan. Pero wi a pulaktum tuku xlakata xlikgalhakgaxmatatkan Jehová tiku kgalhikgo limapakgsin, chuna la lakgkgolotsin, natlatni chu tiku xatse litaxtukgo: tlan nakamakgtayakgo amakgapitsin. Naʼakxilhaw makgapitsi liʼakxilhtit xalak Biblia nema nakinkamasiyaniyan la namaklakaskinaw limapakgsin nema kgalhiyaw chu chuna namakgapaxuwayaw Jehová.

TUKU TLAN NAKATSINIKGO LAKGKGOLOTSIN XLAKATA NEHEMÍAS

9. ¿Tuku xlama kJerusalén akxni Nehemías xlimakgtiy lakgapaxialhnalh?

⁹ Jehová kalakgayawanit lakgkgolotsin pi nakakuentajtlawakgo chu nakapulalinkgo xlakskujnin (1 Ped. 5:2). Lakgkgolotsin lhuwa tuku tlan nakatsinikgo xlakata la kalikatsinilh Nehemías xkachikin Jehová. Xlakata tuku xlakgaya anta kJudá, xkgalhi lhuwa limapakgsin (Neh. 1:11; 2:7, 8; 5:14). Kaʼakxilhwi tuku xlama kJerusalén akxni xlimakgtiy lakgapaxialhnalh. Akxni chalh, makatsinika pi judíos xmaxkajwikgonit templo chu ni xkamaxkikgo levitas tuku xkalakgchan chuna la xwan Limapakgsin. Nachuna, nialh xmaxkikgo kakni sábado chu makgapitsin xkatatamakgaxtokgkgonit lakpuskatin xalak alakatanu kachikinin. ¿Tuku tlawalh Nehemías? (Neh. 13:4-30).

10. ¿Tuku tlawalh Nehemías akxni xlama tuku nitlan?

¹⁰ Nehemías ni malakatsalilh limapakgsin nema xmaxkikanit chu ni fuerza kawanilh judíos pi xkgalhakgaxmatkgolh xlimapakgsin. Wata tlawanilh oración Jehová xlakata napulalin chu kamasiyanilh kachikin xLimapakgsin Dios (Neh. 1:4-10; 13:1-3). Nachuna, taktujulh chu akxtum kataskujli xnatalan akxni lakkaxtlawaparaka xpatsaps Jerusalén (Neh. 4:15).

11. Chuna la wan 1 Tesalonicenses 2:7, 8, ¿la nakalikatsinikgo lakgkgolotsin natalan xalak congregación?

¹¹ Max lakgkgolotsin ni katititaxtukgolh taʼakglhuwit nema titaxtulh Nehemías. Pero, pulaklhuwa la tlan nastalanikgo xliʼakxilhtit. Akgtum li’akxilhtit, palha skujkgo xlakata nakamakgtayakgo natalan. Chu ni tlakg xlakaskinka kamakgkatsikan nixawa amakgapitsin xlakata kgalhikgo limapakgsin, wata kalimasiyanikgo tapaxkit putum natalan xalak congregación (kalikgalhtawakga 1 Tesalonicenses 2:7, 8). Limasiyakgo tapaxkit chu tataktujut akxni tlan katachuwinankgo amakgapitsin. Chatum kgolotsin tiku wanikan Andrew lichuwinan: «Kakxilhnit pi natalan tlan makgkatsikgo akxni lakgkgolotsin tlan kalikatsinikgo chu kalimasiyanikgo pi kalakgalhamankgo. Umakgolh tayat kamaʼakgpuwantini akxtum nakataskujkgo lakgkgolotsin». Chu Tony, tiku akglhuwata kata la kgolotsin litaxtu, lichuwinan: «Kliskuja xlakata nakmakgantaxti tastakyaw nema wi kFilipenses 2:3 chu ankgalhin kliskuja xlakata tlakg xlakaskinka nakkaʼakxilha amakgapitsin nixawa akit. Uma kimakgtaya xlakata ni kaj nakkamapakgsiputun».

12. ¿Tuku xlakata lakgkgolotsin xlimasiyatkan tataktujut?

¹² Lakgkgolotsin xlimasiyatkan tataktujut, chuna la Jehová. Maski xla wa xMalana putum tuku anan, takilhputa xlakata nakamaki «nak pokgxni [...] ti [taktujukgo]» (Sal. 18:35, SXP; 113:6, 7). Chu xla ni kaʼakxilhputun tiku laktlankajwa (Prov. 16:5).

13. ¿Tuku xlakata lakgkgolotsin xlimachokgotkan xtachuwinkan?

¹³ Lakgkgolotsin tiku tapakgsinikgo Jehová xlimachokgotkan xtachuwinkan. Komo nichuna natlawakgo, max nitlan katikgalhtinankgolh akxni wi tiku nitlan nakalikatsini (Gál. 5:14, 15; Sant. 1:26). Andrew, tiku lichuwinawa, wan: «Min kilhtamaku kmakgkatsi pi nitlan kkgalhtiputun chatum tala tiku klakpuwan pi ni kilimasiyanilh kakni. Pero akxni klilakpuwan liʼakxilhtit xalak Biblia xlakata lakchixkuwin tiku ni makgxtakgkgolh Jehová kimakgtayanit nakakxilha pi lu xlakaskinka naktaktuju chu tlan naklikatsi». Lakgkgolotsin limasiyakgo pi tapakgsinikgo Jehová akxni kalimasiyanikgo tapaxkit amakgapitsin chu akxni limaklakaskinkgo lakwan tachuwin akxni katachuwinankgo natalan xalak congregación chu amakgapitsin lakgkgolotsin (Col. 4:6).

TUKU TLAN NAKATSINIKGO XANATLATNI XLAKATA XLIʼAKXILHTIT MAPAKGSINA DAVID

14. ¿Tuku talakgalhaman kamaxkinit Jehová xanatlatni, chu tuku xla lakaskin natlawakgo?

¹⁴ Jehová kamaxkinit talakgalhaman xanatlatni xlakata wa napulalinkgo familia chu xla lakaskin pi liwana kakastakyawakgolh chu kakamapakgsikgolh xlakkamanankan (1 Cor. 11:3; Efes. 6:4). Pero ni kgalhikgo putum limapakgsin. Jehová nakaskini kuenta xlakata xla wa xmalakatsukina familia (Efes. 3:14, 15). Xanatlatni limasiyakgo pi tapakgsinikgo Dios akxni limaklakaskinkgo limapakgsin nema kgalhikgo chuna la Jehová lakaskin. Xliʼakxilhtit mapakgsina David lu lhuwa tuku kamasiyani.

15. ¿Tuku xlakata xliʼakxilhtit David lu nakamakgtaya xanatlatni?

¹⁵ Jehová ni kajwatiya lakgayawalh David pi napulalin xfamilia, wata na lakgayawalh napulalin kachikin Israel. Xlakata mapakgsina litaxtulh, xkgalhi lhuwa limapakgsin. Pero milh kilhtamaku nitlan limaklakaskilh chu tlawalh tuku ni xlilat xwanit (2 Sam. 11:14, 15). Maski chuna, limasiyalh pi xtapakgsini Jehová akxni makgamakglhtinalh xtastakyaw. Malakkinilh xnaku chu tasaskinilh pi xpulalilh (Sal. 51:1-4). Nachuna, limasiyalh pi xtaktuju akxni makgamakglhtinalh xtastakyawkan makgapitsin lakchixkuwin chu lakpuskatin (1 Sam. 19:11, 12; 25:32, 33). Tuku titaxtulh stakyawalh xlatamat chu kajwatiya liskujli naskujnani Jehová.

16. ¿Tuku tlan nakatsinikgo xanatlatni xlakata xliʼakxilhtit David?

¹⁶ Kaʼakxilhwi tuku tlan nakatsiniyatit, wixin, xanatlatni xlakata xliʼakxilhtit mapakgsina David. Tlan kalimaklakaskintit limapakgsin nema Jehová kamaxkinitan. Kalitayatit tuku nitlan tlawayatit chu kamakgamakglhtinantit tastakyaw nema kamaxkiyan Biblia. Komo chuna natlawayatit, milakpuskatinkan chu milakkamanankan nakamaxkikgoyan kakni xlakata wix nataktujuya. Nachuna, akxni akxtum nakatatlawaya oración, kamalakkini minaku Jehová. Chuna xlakan, naʼakxilhkgo pi wix lu lipawana Jehová. Chu, tuku tlakg xlakaskinka, kaliskujti wa pulana nawiliya kmilatamat la talalipina Jehová (Deut. 6:6-9). Liʼakxilhtit nema nakawiliniya wa tlakg xatlan tamaskiwin nema nakamaxkiya.

TUKU TLAN NAKATSINIKGO XLAKATA XLIʼAKXILHTIT MARÍA TIKU XATSE LITAXTUKGO

17. ¿Tuku kalakgayawanit Jehová tiku xatse litaxtukgo?

¹⁷ Jehová kalakgayawanit lu xlakaskinka taskujut kfamilia tiku xatse litaxtukgo chu na kamaxkinit talakaskin nakamapakgsikgo xlakkamanankan (Prov. 6:20). Chu asta tlan natlawakgo pi tuku nakamasiyanikgo xlakkamanankan tlan nakamakgtayakgo putum kilhtamaku (Prov. 22:6). Kaʼakxilhwi tuku tlan nakatsinikgo tiku xatse litaxtukgo xlakata xliʼakxilhtit María, xtse Jesús.

18, 19. ¿Tuku tlan nakatsinikgo xlakata xliʼakxilhtit María tiku xatse litaxtukgo?

¹⁸ María liwana xlakgapasa xTachuwin Dios. Lu tlan xtalalin Jehová chu lu xmaxki kakni. Mastalh talakaskin pi xla xpulalilh maski uma xlakgpalilh xlatamat (Luc. 1:35-38, 46-55).

¹⁹ Kaʼakxilhwi tuku tlan nakatsiniyatit xlakata xliʼakxilhtit María, wixin, tiku xatse litaxtuyatit. Pulana, talakaskin nalikgalhtawakgayatit Biblia chu ankgalhin natlawaniyatit oración Jehová xlakata chuntiya tlan natalalipinatit. Xlipulaktiy, kalakgpalitit la likatsiyatit xlakata chuna tlan namakgapaxuwayatit. Akgtum liʼakxilhtit, max minatlatnikan lakapala ksitsikgo akxni xkastakyawakgo xlakkamanankan. Wa xlakata max wixin lakpuwanatit pi nachuna nakalikatsiniyatit milakkamanankan xlakata chuna kamakgastakkantit. Asta maski katsiyata la lakaskin Jehová pi nakalikatsiniya milakkamanan, max tuwa makgkatsiya ni nakatasitsiya chu tlan nakalikatsiniya, liwaka akxni tlakgwanita chu xlakan ni kgalhakgaxmatkgoyan (Efes. 4:31). Akxni chuna titaxtuya wa akxni tlakg militlawanit oración Jehová. Chatum tala tiku wanikan Lydia, lichuwinan: «Lakgachunin, xliputum kilitliwakga ktlawani oración Jehová xlakata ni palha naktachuwinan kinkgawasa akxni ni kinkgalhakgaxmata. Asta minit kilhtamaku puntsu kaks kkilhwan akxni kchuwinama xlakata nakskini Jehová pi kakimakgtayalh. Oración kimakgtayanit ni naksitsi» (Sal. 37:5).

20. ¿Tuku atanu tuwa makgkatsikgo natlawakgo makgapitsin tiku xatse litaxtukgo, chu tuku nakamakgtaya xlakata tlan natalakgpalikgo?

²⁰ Makgapitsin natalan wi atanu tuku tuwa makgkatsikgo natlawakgo, tuwa makgkatsikgo nakalimasiyanikgo xlakkamanankan pi kapaxkikgo (Tito 2:3, 4). Chuna makgkatsikgo xlakata, akxni laktsujku xwankgonit, xnatlatnikan ni kalimasiyanikgolh tapaxkit. Pero xlakan nichuna xkalikatsinitkan xlakkamanankan. Tiku xatse litaxtukgo chu tapakgsinikgo Jehová max natalakaskin pi nakatsinikgo nakalimasiyanikgo tapaxkit xlakkamanankan. Max tuwa makgkatsikgo nalakgpalikgo tuku lakpuwankgo, tuku makgkatsikgo chu tuku tlawakgo, pero tlan natalakgpalikgo. Komo chuna natlawakgo, xlakan chu putum xfamiliajkan napaxuwakgo.

CHUNTIYA KATAPAKGSINIW JEHOVÁ

21, 22. Chuna la wan Isaías 65:13, 14, ¿tuku tlan kitaxtu akxni tapakgsiniyaw Jehová?

²¹ Mapakgsina David xkatsi la xlitamakgtaya natapakgsini Jehová. Xla lichuwinalh: «Xlimapakgsin Jehová xaʼakgstitum, makgapaxuwa naku, xlimapakgsin Jehová xaskulunku, tlawa pi nalakgskgo lakgastapu». Chu wampa: «Nachuna, [milimapakgsin] kastakyawanit milakskujnin, komo nakgalhakgaxmatkan naʼanan lanka talakgalhaman» (Sal. 19:8, 11). La uku, tlan akxilhaw tuku litalakgpalikgo tiku tapakgsinikgo Jehová chu tiku lakgmakgankgo xtapulalit. Tiku tapakgsinikgo Dios lu paxuwakgo «xlakata tlan [wi] xnakujkan» (kalikgalhtawakga Isaías 65:13, 14).

²² Akxni lakgkgolotsin, xanatlatni chu tiku xatse litaxtukgo tapakgsinikgo Jehová, xlatamatkan tlakg tlan tawila, xfamiliajkan tlakg paxuwakgo chu putum congregación akxtum tawilakgo. Chu tuku tlakg xlakaskinka, makgapaxuwakgo xnaku Jehová (Prov. 27:11). ¡Ni anan atanu tuku tlakg makgapaxuwanan!