Talakaskin pi natlawakgo oración tiku lichuwinankgo xtachuwin Dios
1. ¿Tuku talakaskin natlawayaw xlakata tlan namakgantaxtiyaw taskujut nema lakgayaw?
1 Kaj kiakstukan nila katitlawaw taskujut nema lakgayaw. Wa Jehová tiku kinkamaxkiyan litliwakga xlakata tlan natlawayaw uma taskujut (Fili. 4:13). Xla limaklakaskin xʼángeles xlakata nakinkamakgtayayan nakatekgsaw latamanin tiku litaxtukgo la borrego (Apo. 14:6, 7). Akinin chanaw chu munuwiliyaw talhtsi kxnakujkan latamanin pero wa Jehová tiku mastaka (1 Cor. 3:6, 9). Wa xlakata, ¡lu xlakaskinka pi akinin kstalaninanin Cristo natlawaniyaw oración kinTlatikan xalak akgapun xlakata naskiniyaw xtamakgtay!
2. ¿Tuku tlan naskinaw akxni natlawayaw oración?
2 Natlawayaw oración kimpalakatakan. Natlawayaw oración akxni nalichuwinanaw Dios (Efe. 6:18). ¿Tuku naskinaw akxni natlawayaw oración? Akxni natlawayaw oración naskinaw pi ni napekuanaw chu xlakata nalakpuwanaw pi nakgaxmatkgo tiku nakalakganaw (Hech. 4:29). Tlan naskiniyaw Jehová xlakata nakinkapulalinan niku wilakgo tiku xlikana katsiputunkgo tuku wan Biblia. Akxni tiku lakgamaw nakinkatlawaniyan akgtum takgalhskinin, tlan xatsekg natlawaniyaw oración Jehová xlakata nakinkamakgtayayan natekgsaw xtakgalhtin takgalhskinin (Neh. 2:4). Na tlan naskinaw liskgalala xlakata pulana nawiliyaw taskujut nema lakgayaw (Sant. 1:5). Nachuna, Jehová lu lipaxuwa akxni limasiyayaw tapaxtikatsinit xlakata skujniyaw (Col. 3:15).
3. ¿La makgtayanan oración nema tlawayaw xpalakata amakgapitsi xlakata tlakg nalichuwinankan Dios?
3 Natlawayaw oración xpalakata amakgapitsi. Na tlan “nchatunu amakgapitsin, na nalaskiniyaw litlan kkioraciónkan”, asta nawanaw xtukuwani natalan akxni natalakaskin (Sant. 5:16; Hech. 12:5). ¿Kgalhiya akgtum tajatat nema tlawa pi ni lu lhuwa nalichuwinan Dios? Komo chuna, kaskini Jehová pi kakamakgtayalh tiku ni lu tatatlakgo. ¡Nikxni kalakpuwanti pi ni makgtayanan mioración! Na tlan naskinaw kʼoración xlakata mapakgsinanin namastakgo talakaskin nalichuwinanaw Dios xlakata kinatalankan “ntlan nalatamakgo, ni anan ntasokgalin” (1 Tim. 2:1, 2).
4. ¿Tuku xlakata putum kilhtamaku natlawayaw oración?
4 Lu lanka taskujut nalichuwinanaw xalakwan xalaksasti xlikalanka Katiyatni. Pero komo “ankgalhin naxakgatliyaw [o natachuwinanaw] Dios” nakinkamakgtayayan xlakata namakgantaxtiyaw uma taskujut (Rom. 12:12).