Kaliskujwi xlakata wi tiku natsukuyaw makgalhtawakgayaw
1. ¿Tuku kilhchanima namakgantaxtiyaw tuku wan Mateo 28:19, 20?
1 Jesús kinkalimapakgsin pi “nakamasiyunikgoyaw” latamanin (Mat. 28:19, 20). Wa xlakata akinin skgalalh tawilayaw xlakata putum kilhtamaku matsukiputunaw takgalhtawakga chu ni kajwatiya sábado o domingo nema laksakkanit xlakata chuna natlawayaw. Tastakyaw nema nalichuwinanaw tlan namakgtayayan.
2. ¿Tiku tlan nakawaniyaw pi kalimakgalhtawakgaputunaw Biblia?
2 Kamalaknu. Akxni putum kilhtamaku namalaknuyaw akgtum takgalhtawakga, tlakg lakapala wi tiku natsukuyaw makgalhtawakgayaw (Ecl. 11:6). ¿Wi tiku waninita komo lakaskin namakgalhtawakgaya? Anta kEstados Unidos, akgtum congregación malaknukgolh takgalhtawakga akgtum papaʼ. ¡Tekgskgolh 42 limakgalhtawakgat! Nachuna, wilakgolh tiku kalakgapaxialhnana; chu ni kalakpuwanti pi xlakan katsikgoya pi limakgalhtawakgananaw Biblia. Akxni nalakgpimparaya, tlan namalaknuniya akgtum takgalhtawakga. Komo ni nalakaskin nitu makgatsankgapat, tlan nalakgapaxialhnantilhaya. Atanu tuku tlan natlawaya, nakakgalhskina mintalakatsu, mifamilia, tiku kataskuja o tiku katapina kʼescuela komo lakaskinkgo nakamasiyaniya tuku wan Biblia. Chu tiku makgalhtawakgamakaja, ¿kgalhi chatum xʼamigo o xfamilia tiku na kgalhtawakgaputun?
3. ¿Tukuya tamakgtay nema lu lanka xtapalh tlan natsukuyaw limakgalhtawakgenanaw, chu tukuya kilhtamaku tlan nalimaklakaskinaw?
3 Kamaklakaskinti uma tamakgtay nema lanka xtapalh. Akgtum tamakgtay nema lu lanka xtapalh xlakata tlan namatsukiya takgalhtawakga wa tratado ¿Katsiputuna tuku xaxlikana? Tlan nakamaxkiyaw latamanin komo makglhtinankgo likgalhtawakga o ni makglhtinankgo. Lu tlan maklakaskinkan niku stanankan, ktiji, natlawaya carta o akxni wi tiku nalakgpimparaya o akxni niti natekgsa kchiki. Tlan xwa komo xlipi akxni napina kputlaw, akxni napina tamawanana o akxni napina skuja. Xaʼawatiya página lichuwinan la tlawayaw akxni makgalhtawakgananaw chu lichuwinan libro ¿Tuku xlikana masiyay Biblia?
4. ¿La tlan nalimaklaskinaw tratado ¿Katsiputuna tuku xaxlikana? xlakata tlan nalimatsukiya akgtum takgalhtawakga?
4 ¿La tlan nalimaklakaskinaw? Akxni maxkinitata nawan tratado tiku lakgpimpat, kamasiyani takgalhskinin nema wilakgo kxapulana página chu kawanti: «¿Tukuya takgalhskinin tlakg lakgatiya?». Alistalh kalitachuwinanti takgalhtin nema masta tratado chu kalikgalhtawakga o tsinu kalichuwinanti tuku wan xaʼawatiya página, anta niku malaknukan akgtum takgalhtawakga. Alistalh kamasiyani klibro ¿Tuku xlikana masiyay Biblia?, niku tlakg talichuwinan tuku litachuwinampat, kawani pi maxkiputuna libro chu katalakkaxla xlakata tlan nataspita chu tlan natakgalhchuwinamparaya.
5. ¿Tuku xlakata putum kilhtamaku skgalalh natawilayaw xlakata tlan namatsukiyaw akgtum takgalhtawakga?
5 Niku kinkalakgchanan nalichuwinanaw Dios wilakgolhku tiku lu xlikana katsiputunkgo tuku xlikana masiya Biblia. Lu lipaxuwayaw akxni kamakgtayayaw amakgapitsi xlakata tlan nalakgchankgo latamat, chu akxni skgalalh tawilayaw xlakata tlan namatsukiyaw akgtum takgalhtawakga tlakg lhuwa tiku nakamakgtayayaw (Mat. 7:13, 14).