“Xliskgalala Dios anta lakatanks kgantaxtuma, chu litasiya taskujut”

1. ¿Tuku lakpuwankgo makgapitsi xlakata kintaskujutkan?

¹ Akxni anaw lichuwinanaw Dios min kilhtamaku wi tiku nitlan kinkakgalhtiyan. Max ni chuna kgaxmatli tuku waniw o kgaxmatnit taʼakgsanin xlakata xtatayananin Jehová, max xlakata tuku wankgo tamakatsinin nema ni xaxlikana. Kmakgapitsi kachikinin wankgo pi “xalaklipekua o xalaklijikwa secta”. ¿La nakgalhtinanaw?

2. ¿Tuku nakinkamakgtayayan xlakata ni naxlajwanan kintakanajlakan akxni ni tlan nakinkalichuwinankanan?

² Kakgalhiw lu xatlan talakapastakni. Jesús chu amakgapitsi xlakskujnin Jehová xalak pulana siglo nitlan kaʼakxilhka xlakata xtakanajlakan chu xkalimawakakan tuku nixlikana (Hech. 28:22). Maski katuwa tuku xkawanikan, ni mastakgolh talakaskin pi xlimaxanankgolh xtaskujutkan. Jesús wa: “Xliskgalala Dios anta lakatanks kgantaxtuma, chu litasiyuma taskujut” (Mat. 11:18, 19, Hua Xasasti Talaccaxlan [1999]). Chu chuntiya xatapaxuwan tlawalh xtalakaskin xTlat, xkanajla pi tiku putsakgo tuku xaxlikana xʼamakgo kanajlakgo xalakwan tamakatsinin. Kinkamakgtayayan ni naxlajwanan kintakanajlakan komo nalakapastakaw pi xKgawasa Dios nachuna likatsinika.

3. ¿Tuku xlakata ni kaks kinkamalakawaniyan akxni nitlan kinkalichuwinankanan chu kinkaputsastalanikanan?

³ Jesús wa pi kakilhtamaku ni xʼama akxilhputunkgo kstalaninanin chuna la xla ni akxilhputunkgolh (Juan 15:18-20). Wa xlakata, ni kaks lilakawanaw akxni wi tiku nitlan kinkalichuwinanan chu kinkaputsastalanikanan. Chu liwana katsiyaw pi la uku tlakg lhuwa nakinkaputsastalanikanan xlakata talakatsuwima xlisputni uma kakilhtamaku chu tlakg taliwakama xtasitsi Satanás (Apo. 12:12). Lipaxuwayaw xlakata xkakilhtamaku Satanás nialh makgas kilhtamaku wi.

4. Komo wi tiku katuwa tuku nakinkawaniyan, ¿la nakgalhtinanaw?

⁴ Liwana nakgalhtinanaw. Akxni wi tiku katuwa nakinkawaniyan, putum kilhtamaku liwana nakgalhtinanaw chu ni nasitsiyaw (Pro. 15:1; Col. 4:5, 6). Komo masta talakaskin chu liwana kinkawaniyan la lakapastaka, max tlan nakgalhskinaw tuku xlakata chuna lakapastaka o tlan nawaniyaw pi lhuwa tiku ni wankgo tuku xaxlikana xlakata xtatayananin Jehová. Akxni liwana nakgalhtiyaw max natlawa pi tiku tachuwinamaw nialh katikanajlalh tuku kgaxmatnit chu akxni nalakgapaxialhnampara chatum xTatayana Jehová nakgaxmatni. Pero komo lu sitsinit, tlan nawan komo kaj natapanuyaw. Akinin liwana katsiyaw pi maski nitlan nakinkaʼakxilhkgoyan amakgapitsi, Jehová lu xlakaskinka akxilha taskujut nema tlawamaw (Isa. 52:7).