Kakamakgtaya minkamanan xlakata tlan nalichuwinankgo Dios
1. ¿Tuku kamatlawi natlatni tuku wan Salmo 148:12, 13?
1 Jehová kawani laktsu kamanan pi kalichuwinankgolh xtukuwani (Sal. 148:12, 13). Wa xlakata, natlatni ni kajwatiya kamasiyanikgo xkamanan tuku xaxlikana masiya Biblia chu xlimapakgsin Dios nema nalilatamayaw. Na kamakgtayakgo xlakata nalichuwinankgo xalakwan xalaksasti. ¿La tlan nakamakgtayatilhakgo?
2. ¿La nakamakgtaya kamanan liʼakxilhtit nema nawilikgo natlatni?
2 Nawilikgo xatlan liʼakxilhtit. Juez Gedeón kawanilh 300 xsoldados: «Nakatsiniyatit xlakata naʼakxilhatit la naktlawa» (Jue. 7:17). Kamanan akxilhkgo chu tlawaputunkgo tuku tlawakgo xnatlatnikan. Chatum tala katsisni skuja, sábado tsisa akxni taspita kxchik ni lhtata wata kalin xkamanan xlakata nalichuwinankgo Dios maski nialhtu tlawaputun. Maski nitu nakawani, kamasiyanima pi tlakg xlakaskinka nalichuwinankgo Dios (Mat. 6:33). ¿Akxilhkgo minkamanan pi lipaxuw tlawaya tuku xla Dios, xlakata tlawaya oración, likgalhtawakgaya Biblia, mastaya takgalhtin ktamakxtumit chu lichuwinana Dios? Xlikana, nila putum tlan tuku natlawaya, pero komo naʼakxilhkgo minkamanan pi ni makgxtakga xtaskujut Dios xlakan nachuna natlawakgo xlakata nakatsikgo pi lu kamasiyaniputuna nakakninanikgo Jehová (Deu. 6:6, 7; Rom. 2:21, 22).
3. ¿Tuku tlan nakawanikgo natlatni xkamanan pi katlawakgolh kxtaskujut Dios chu la nakamakgtayakgo?
3 Nalakkaxwilikgo tuku natlawatilhakgo. Natlatni makglhuwa kamasiyanikgo xkamanan asta akxni tlan natlawankgo, nachuwinankgo o xakstukan nalhakganankgo. Chu akxni akxilhkgo pi tlantiya tlawakgo, atanu tuku kamatlawiparakgo. Chu komo kstalaninanin Cristo, kamakgtayakgo xlakata nalakkaxwilikgo tlakg naskujnikgo Dios, chuna la xkatakatan chu la katsikgo pi tlan tlawakgo (1 Cor. 9:26). ¿Kamasiyanipat xlakata ni kaj nalikgalhtawakgakgo akxni namastakgo xtakgalhtinkan chu xakstukan nalakkaxwilikgo xtaʼakgchuwinkan Niku Masiyakan xlakata la Lichuwinankan Dios? (Sal. 35:18.) ¿Kamakgtayapat xlakata namakgtlawakgo xtaskujut Dios? ¿Kawaninita pi tlan xtamunukgolh chu tlan xliskujkgolh la precursor regular o atanu? ¿La tlawapat xlakata nakatalalinkgo tiku lipaxuwakgo chu lhuwa lichuwinankgo Dios xlakata nakamakgtaya? (Pro. 13:20.)
4. ¿La kamakgtaya kamanan akxni natlatni tsukukgo kamasiyanikgo akxni laktsujku?
4 Akgtum kilhtamaku salmista wa: «Wix kiDios, akxni aktsujku xakwanit asta la uku wix kimasiyaninita, asta la uku chuntiya klichuwinama tuku lu stlan katlawanita» (Sal. 71:17). Katsuku kamakgtayaya minkamanan xlakata natsukukgo lichuwinankgo Dios akxni laktsujku wankgonit. Tuku nakamasiyaniya xlakata Dios xlikana pi nakamakgtaya asta akxni laktlankata nawankgo (Pro. 22:6).