Carta xla Lakgkgolotsin tiku Pulalinkgo xTatayananin Jehová

Kinatalankan tiku kkapaxkiyan:

¡Lu kpaxuwayaw xlakata tlan kkatsokgnaniparayaw liwaka akgtujun millón xlakskujnin Jehová tiku ni makgatsankgananikgo nema lamakgo xlikalanka kkatiyatni! ¿La makgkatsiyatit akxni lakgapasatit chatum xTatayana Jehová tiku xala alakatunu kachikin? ¿Ni xlikana pi tunkun paxkiyatit? (Juan 13:34, 35.) Chuna namakgkatsiyatit akxni nalikgalhtawakgayatit anuario niku lichuwinan xlakata xtakanajlakan natalan chu xlakata la limasiyakgo pi ni makgxtakgkgo Jehová klakalhuwa países.

Kkatsinitaw pi lu makgantaxtipatit xlakata naKakninanikan Dios kFamilia. Natlatni putsanankgo xlakata la tlakg tlan namakgalhtawakgekgo laktsu xkamanankan (Efe. 6:4). Tiku tamakgaxtokgkgonit tlakg tliwakga wilakgo xlakata akxtum kakninanikgo Dios kfamilia (Efe. 5:28-33). Xlikana, lu kinkamakgtayanitan xlakata nalimaxtuyawa kilhtamaku nalikgalhtawakgayaw xTachuwin Dios kinchatunukan o putum kkifamiliajkan nakatakgalhtawakgayaw (Jos. 1:8, 9).

Na nitlan klimakgkatsiyaw xlakata lhuwa natalan makgatsankgakgolh tuku xkgalhikgo xlakata lhuwa analh tuku masputunalh. Nachuna, kkapaxtikatsiniyaw tiku kamakgtayakgolh natalan akxni milh tuku masputunan (Hech. 11:28-30; Gál. 6:9, 10). Nachuna, wilakgolh natalan chuna la Dorcas tiku «ankgalhin xmakgtayakgo lakglimaxkganin, chu lu xlakgalhamankgo», xlakata akxilhkgo akxni wi tuku maklakaskinkgo xnatalankan xalak congregación chu kamakgtayakgo (Hech. 9:36). Kalakapastktit pi Jehová katsi tuku wixin tsekg tlawapatit, Xla nakaxokgoniyan (Mat. 6:3, 4).

Kmakgapitsi países wilakgo latamanin tiku limaklakaskinkgo limapakgsin xlakata ni mastakgo talakaskin natlawayaw xtaskujut Dios chu nachuna wixin akxilhnitantit la mapakgsinanin nitlan kalikatsinikanikgonitan maski nitu tlawanitantit (Sal. 94:20-22). Pero xlakata katsiyatit tuku Jesús wa pi nitlan xʼamaka kinkalikatsinikanan, tayanipatit chu lipawanatit Jehová (Juan 15:19, 20). Liwana kakatsitit pi anta wilatit kkioracióneskan chu kskinaw pi «Na xaliʼankgalhin skgalalh natawilayatit lantla lakatitum, chu na takakswan nalikgalhtikgoyatit nchatunu wa nti xkakgalhaskin wa xatu xpalakata likgalhiyatit ntakgalhkgalhitin» (1 Ped. 3:13-15).

Nachuna kkawaniputunaw natalan pi lu tlan tuku tlawamakgolh xlakata ni mastakgo talakaskin pi Satanás nakamatlawi talakgxtumit xalimaxana. Uma kilhtamaku, niku tlakg talhuwima ni xatlan tayat wixinin makglhtinampatit «wa xtamakgtay nkimPuchinakan nkalitatliwakglhtit, chu kxlitliwakga» (Efe. 6:10). Wixin wilinitantit «xatakgatsin tamakgtay nema kinkamaxkiyan Dios» chu ni mastayatit talakaskin «nakinkaʼakgskgawiyan Akgskgawini» (Efe. 6:11, 12). Kalakapastaktit pi Jehová limaklakaskin mintayatkan xlakata nalikgalhti Satanás, tiku talatlawama Jehová (Pro. 27:11).

Nachuna, xatapaxuwan kkamakatsiniyan pi kata 2011 kilakgolh 19,374,737 akxni talakapastakli akxni tinilh Cristo. Chuna kitaxtulh xlakata abril wixin liskujtit la precursores auxiliares. Xlakata lhuwa xTatayananin lichuwinankgolh Jehová wa xlakata lhuwa latamanin xlikalanka katiyatni na kamakgtayalh uma (Rom. 10:18). Kpapaʼ abril analh 2,657,377 precursores auxiliares, chu lhuwa tiku lichuwinankgo Dios tlakg maliwakakgolh xtaskujutkan. Xlakata xatapaxuwan tlawakgolh uma taskujut lu kinkamakgapaxuwayan (Sal. 110:3; Col. 3:23).

Xlakata kinkamakgtayan Jehová katata tamunkgolh 263,131. Kkapaxtikatsiniyan xlakata kilamakgtayaw namalakgatumiyaw invitación nema takilhtinit kApocalipsis 22:17: «Wa Spiritu, chu ntsumat litatawilat wankgoy: “Katat”. Chi nchu wanti nkgaxmata, kawaj: “Katat”. Chu wanti nkgalhputiy, kamilh, na wanti lakaskin, kawalh nchuchut xla latamat ntu nkaj litlan mastakan». Nachuna, xlakata ktamakxtumit xaʼakgtutu kilhtamaku katsiw xlakata xTamapakgsin Dios wa xlakata akinin wanaw: «¡Kamilh minTamapakgsin!». Nachuna wanaw la wa apóstol Juan, xlakata akxni kgaxmatli uma xtachuwin Cristo «lakapala nakmin». Juan wa: «Chuna nkalalh, Amén. Katat, kimPuchinakan Jesús» (Apo. 22:20).

Xlakata kgalhkglhipatitku tuku nala, kalakapastaktit pi lu kkapaxkiyan: natalan lakchixkuwin chu lakpuskatin tiku lu paxkikgo Jehová «nkamakgantaxtiw natlawayaw, chu wa ntu ntalulokgtat», o xaxlikana (1 Juan 3:18).

Minatalankan,

Lakgkgolotsin tiku Pulalinkgo xTatayananin Jehová