Ni kapekuaw nalichuwinanaw Dios niku stanankan
1. ¿Tuku xlakata pekuanaw akxni lichuwinaw Dios niku stanankan?
1 ¿Pekuana nalichuwinana Dios niku stanankan? Komo chuna, nitu kapuwanti; ni kaj miʼakstu chuna makgkatsiya. Asta apóstol Pablo tiku lhuwa xlichuwinan Dios, na pekualh pero tatliwakglhli xlakata tlan xlichuwinalh (1 Tes. 2:2). Uku naʼakxilhaw akgtutu takgalhskinin nema kgalhiyaw akxni lichuwinankan Dios niku stanankan chu makgapitsi tastakyaw nema nakinkamakgtayayan.
2. ¿Tuku xlakata ni mililakapastakat pi nasitsikgo tiku stanamakgo komo nakatachuwinana?
2 ¿Nalakpuwankgo pi kaj kkamakglhtima xkilhtamakujkan tiku skujmakgo? Lhuwa niku stanankan, tiku skujmakgo xlimakgxtakgatkan tuku tlawamakgolh xlakata nakamakgamakglhtinankgo tiku ankgo tamawanankgo. Nachuna, tlan namakgamakglhtinankgoyan xlakata nalakpuwankgo pi kaj pimpat tamawanana. Komo liwana nalhakganana chu tlan nalikatsiya, tlakg tlan namakgamakglhtinankgoyan.
3. ¿Tuku tlan natlawaya xlakata ni nakamakglhuwiya tiku tamawanamakgo?
3 ¿Naklichuwinan Dios kxlakatin tiku tamawanamakgo? Tlakg tlan nawan napina akxni ni lhuwa tiku an tamawanan, la akxni aku malakikan. Kakgalhkgalhi asta akxni xmalana pustan o xtasakwa xakstu natawila chu ni lhuwa tuku nawaniya.
4. ¿Tuku tlan nawana akxni nalichuwinana Dios niku stanankan?
4 ¿Tuku tlan xakwa? Komo niku stanankan chalhuwa tiku skujmakgo, katachuwinanti tiku lakgayawakanit. Tlan nawaniya: «Tiku skujkgo ni lu kkatekgsaw kxchikkan, wa xlakata kkaputsayaw kxtaskujutkan. Xlakata kkatsi pi lhuwa taskujut kgalhiya, kaj tsinu nakmamakgapaliyan». Xlakata ni nalakpuwankan pi kaj stanampat, tlakg tlan ni naskina tumin nema xatapaxuwan mastakan pero komo wi tiku katsiputun niku tiyakan tumin xlakata natatlawa uma taskujut, tlan nawaniya. Chuna la xlilanka pustan, tlan nakgalhskina tiku lakgaya komo tlan nakatachuwinana tiku skujmakgo. Ni nalakgpalitilhaya tuku nawana. Komo ni limakgwani tiku stanama, kamaʼaktsuwi tuku nawana chu kamaxki tratado. Komo nila tiku natachuwinana, kakgalhskininanti komo tlan namakgxtakga likgalhtawakga.
5. ¿Tuku xlakata ni napekuanaw akxni nalichuwinanaw Dios niku stanankan?
5 Jesús chu Pablo ni pekuankgolh akxni lichuwinankgolh Dios niku kskujkgo latamanin chu wix na tlan chuna natlawaya (Mat. 4:18-21, 9:9; Hech. 17:17). Kawani Jehová kamakgtayan xlakata ni napekuana (Hech. 4:29). Lu tlan kitaxtu lichuwinankan Dios niku stanankan, xlakata katekgskan latamanin. ¿Tuku xlakata nichuna tlawaya?