Niku Tamasta Xtakgalhtin Akgtum Takgalhskinin

◼ ¿Tuku xlitlawat tiku lakpuwanit namasta putum tuku kgalhi o ni putum xlakata natamaklakaskin kxkachikin Jehová akxni ninita nawan?

Akxni nikan nialh la tuku tlawakan (Ecl. 9:5, 6). Wa xlakata lhuwa tiku tlawakgo xtestamentoskan o akgtum contrato niku liwana lakkaxwilikan tiku nalakgchan tuku kgalhi akxni na niy (2 Rey. 20:1). Uma kapsnat nema tatlawalh kxlakatin mapakgsina na anta wilikan tiku namakgpitsi putum tuku kgalhi. Kʼlhuwa países, akxni wi tiku niy chu ni tlawanit uma kapsnat, mapakgsinanin lakkaxwilikgo la natamakgpitsi tuku kgalhi. Wa xlakata, komo katsiyawa tuku natlawaniyaw tuku kgalhiyaw, max putum o ni putum namakgxtakgniyaw xkachikin Jehová, talakaskin namatlawinanaw maktum kapsnat kxlakatin mapakgsinanin, chu liwana nalaksakaw tiku naliyawayaw xlakata namakgpitsi. Tlan nakgalhskininana ksucursal komo tlakg katsiputuna xlakata uma.

Uma lu lhuwa taskujut kgalhi tiku lakgataya. Mamakxtumikan chu makgpitsikan tuku xkgalhi tiku ninita lhuwa kilhtamaku lin chu talakaskin lhuwa tuku xlitalakkaxtlawat kxlakatin mapakgsinanin chu na talakaskin naʼakxilhkan la xlilhuwa chu la xtapalh tuku xkgalhi. Nachuna, mapakgsinanin wankgo la natatlawa. Wa xlakata, ni wamputun pi komo chatum tala tiku nalakgayawakan, lu tlan namakgantaxti taskujut. Uma taskujut naliyawakan tiku katsi tuku natlawa, tiku xaʼakgstitum chu natlawaputun xtalakaskin tiku ninita (kaʼakxilhti artículo «Los beneficios de la planificación patrimonial», xla ¡Despertad! 8 xla diciembre kata 1998).

Komo wi tiku nawaniyan pi wix namakgpitsiya tuku kgalhi akxni ninita nawan. Pulana kaʼakxilhti la xlilhuwa taskujut nema lakgatayapat, alistalh katlawa oración chu kaʼakxilhti komo tlan namakgantaxtiya (Luc. 14:28-32). Akxni nani tiku liyawanitan pi wix namakgpitsiya tuku kgalhi, wix nakamakatsiniya tiku nakamaxkiya tuku nakalakgchan. Nachuna, wix nawana chu milimakgpitsit chuna la wan limapakgsin, chu chuna la wan xtestamento tiku ninita. Tiku liyawakanit namakgpitsi, putum xlimakgantaxtit chuna la lakkaxwilikanit ktestamento maski lhuwa o ni lhuwa tuku natamasta. Akxni wi tiku makgxtakgni sucursal xla xtatayananin Jehová putum tuku kgalhi wa lakgchan kxlakatin mapakgsinanin (Luc. 16:10; 21:1-4).