Jehová lu kasikulunatlawa tiku lu lakgatikgo maskiwinankgo

KIMALAKATSUKINAKAN masiya pi xlakaskinka kaʼakxilha latamanin xlakata kamaxkinit lu xlakaskinka tamaskiwin, wa pi xakstukan nalaksakkgo tuku natlawakgo. Nachuna, lhuwa tasikulunalin kamaxki tiku limaklakaskinkgo uma xlakata natatayakgo xaxlikana takanajla, namasantujlikgo xtukuwani chu makgtayaninankgo pi kakgantaxtulh xtalakaskin chu ni kgalhkgalhikgo pi wi tuku kakamaxkika. Jehová ni lakaskin pi nakgalhakgaxmataw kaj xlakata pekuaniyaw o xlakata chuna kilitlawatkan. Wata lakaskin naskujnaniyaw xlakata paxkiyaw chu paxtikatsiniyaw tuku tlawa kimpalakatakan.

Akgtum liʼakxilhtit, akxni israelitas xlamakgo kdesierto xla Sinaí, Jehová kawanilh la xlitlawatkan xwanit niku xkakninanikgolh. Kawanilh: «Kmilakgstipankan kamakgstokgtit tuku namaxkiyatit Jehová. Putum tiku tlan naku kgalhi kalimilh tuku namaxki Jehová» (Éx. 35:5). Chatunu israelita xʼama masta tuku tlan xmastalh chu putum tuku xʼamaka mastakan maski lhuwa o ni lhuwa, xʼamaka litlawakan tuku Dios xlakapastaknit. ¿Tuku tlawakgolh israelitas?

«Putum tiku xnaku malakpuwanilh» limilh xatapaxuwan tamakamastan, «putum tiku tlan naku kgalhi». Lakchixkuwin chu lakpuskatin mastakgolh xlakata xtlawaka xtaskujut Jehová: prendedores, akgastujut, anillos, oro, plata, cobre, hilo xaspupuku, lana nema xlimanikanit purpura, fibra escarlata, tlakg xatlan lino, xchixit cabra, xmakgxuwa carnero nema xaspinini xkamanikanit chu xmakgxuwa foca, xakiwi acacia, xalakglilakgatit chiwix chu tipalhuwa aceite. Alistalh «tuku tamaklakaskilh xlakata taskujut nema xlitatlawat xwanit xʼama akchan, chu asta xʼakgataxtulh» (Éx. 35:21-24, 27-29; 36:7).

Pero tuku tlakg makgapaxuwalh Jehová ni wa tuku makamastaka, tuku lipaxuwalh wa pi xatapaxuwan mastakgolh xlakata xmakgtayaninankgolh kxaxlikana takaknin. Asta limaxtukgolh kilhtamaku chu litliwakga xlakata xmakgtayanankgolh. Biblia wan pi «putum lakpuskatin tiku xkgalhikgo liskgalala makanitlawakgolh hilo». Chu wampara: «Putum lakpuskatin tiku xnakujkan xkamalakpuwani litlawakgolh hilo xchixit cabra». Nachuna, Jehová maxkilh Bezalel, liskgalala, taʼakgatekgsni, takatsin chu «tlan xtlawalh tipalhuwa taskujut xla artesanía». Chuna, Dios maxkilh Bezalel chu Oholiab tuku xtalakaskin xlakata tlan xtlawakgolh taskujut nema xkalakgayawanit (Éx. 35:25, 26, 30-35).

Akxni Jehová kawanilh israelitas pi wi tuku xatapaxuwan xmaskiwinankgolh, liwana xkatsi pi «putum tiku tlan naku kgalhi», xʼama makgtayanan kxaxlikana takaknin. Chu xla lu kasikulunatlawalh tiku xatapaxuwan wi tuku maskiwinankgolh, kapulalilh chu kamaxkilh lhuwa tapaxuwan. Chuna, Jehová limasiyalh pi akxni kskujnin xatapaxuwan wi tuku maskiwinankgo, xla kasikulunatlawa chu kamaxki liskgalala chu tuku maklakaskinkgo xlakata natlawakgo xtalakaskin (Sal. 34:9). Komo xatapaxuwan wi tuku maskiwinanaw akxni skujnaniyaw Jehová, xla nakinkasikulunatlawayan.

Tipalhuwa La Makgtayanankgo Latamanin Ktaskujut Nema Tatlawa Xlikalanka Katiyatni

Chuna la kxkilhtamaku Pablo, la uku lhuwa tiku “makitilhakgo” xtuminkan chu mujukgo kcajas xalak congregación niku kgalhikgo akgtum letrero nema wan: «Taskujut nema tatlawa xlikalanka katiyatni» (1 Cor. 16:2, Hua xasasti talaccaxlan, 1999). Akgatunu papaʼ, congregaciones malakgachakgo uma tumin ksucursal xla xtatayananin Jehová nema pulalin taskujut kpaís. Na tlan namalakgachaya tumin nema mastaputuna ktukuwani nema maklakaskinkgo xtatayananin Jehová xlakatin mapakgsinanin kmimpaís. Komo liwana katsiputuna xtukuwani niku malakgachakan tumin, kachuwinanti ksucursal nema pulalin taskujut niku wila. Natekgsa xdirección kʼuma sitio xla Internet www.jw.org/es. Wa uma pulaktiy la tlan miʼakstu namalakgachaya:

TUKU KAJ NAMASKIWINANA

Kilhchanima namaskiwinana tumin, joyas o tanu tuku kgalhiya nema lhuwa xtapalh.
Talakaskin namalakgachaya maktum carta niku nawana pi tumin o atanu kaj maskiwinampat.

TUKU MASTAYA PERO WI TUKU SKINA

Kilhchanima namastakan tumin pero tiku mastama tlan namaspitniparakan komo namaklakaskin.
Talakaskin namalakgachaya maktum carta niku nawana pi wi tuku mastapat pero max alistalh namaklakaskimparaya.

NALAKKAXWILIYA TUKU NAMASKIWINANA

Unu nakwiliyaw maktum lista niku lichuwinan pulaklhuwa la tlan wi tuku namaskiwinana kxtaskujut Dios nema tatlawama xlikalanka katiyatni chu ni kaj tumin chu katuwa tuku kgalhi kxtapalh tlan namaskiwinana. Komo wi klista nema nalaksaka, pulana kakgalhskininanti ksucursal xlakata nakatsiya komo tlan chuna tatlawa kpaís. Xlakata tuku skinkgo mapakgsinanin chu xlakata impuestos talakgpali kʼakgatunu kachikinin, lu xlakaskinka naputsaya tiku katsini xlakata uma, chuna tlan nalaksaka la tlakg tlan wi tuku namaskiwinana.

Seguros. Wamputun pi tlan nawilikan kxtukuwani nema maklakaskinkgo xtatayananin Jehová xlakatin mapakgsinanin xlakata wa namakglhtinan tumin xlakata seguro akxni nanikan o tumin xla jubilación.

Cuentas xalak banco. Cuentas xalak banco, certificados de depósito chu tumin nema maxkikana xlakata tajubilarlinita tlan nawiliya kmaktum fideicomiso o nawana pi wa namaklakaskinkan akxni naniya, tlan nawiliya kxtukuwani nema maklakaskinkgo xtatayananin Jehová xlakatin mapakgsinanin chuna la wilakgolh limapakgsin xla bancos kpaís.

Acciones chu bonos. Tlan namaskiwinankan kxtukuwani nema maklakaskinkgo xtatayananin Jehová xlakatin mapakgsinanin o natlawakan contrato niku nawankan pi akxni nanikan wa natapakgsini.

Chiki chu tiyat. Tlan namaskiwinana chiki chu tiyat nema tlan stakan chu nawiliya kxtukuwani nema maklakaskinkgo xtatayananin Jehová xlakatin mapakgsinanin, tlan namaskiwinana o komo tiku maskiwinama anta wi, nawan pi anta natawila asta akxni naniy.

Testamentos chu fideicomisos. Tlan mastakan tiyat o tumin kxtukuwani nema maklakaskinkgo xtatayananin Jehová xlakatin mapakgsinanin chu namastakan xlakatin notario maktum testamento o wa nawilikan xlakata nalitamakgtaya maktum fideicomiso.

Chuna la wan tukuwani «nalakkaxwiliya tuku namaskiwinana», akxni mastakan uma tamaskiwin talakaskin pi liwana nalakkaxwilikan. Xlakata wi la pulaklhuwa maskiwinankan, lhuwa latamanin tlan makgtayakgonit taskujut xlakata takanajla chu akxni kamakgtayakan latamanin kxlikalanka kakilhtamaku.

Komo tlakg katsiputuna kachuwinanti ksucursal nema pulalin taskujut niku wix lapat.