¿Tuku “nalipaxuwaya”?
1. Akxni nasputa akgatunu papaʼ, ¿tuku lu nakinkamakgapaxuwayan?
1 Akxni namastayaw informe akgatunu papaʼ, kimputumkan wi tuku tlan nalipaxuwayaw (Gál. 6:4). Maski max precursores especiales akinin chu 130 horas lichuwinanaw Dios o publicador akinin nema kaj akgkukitsis minuto lichuwinanaw, tuku xliputum kinakujkan maxkiyaw Jehová kakinkamakgapaxuwan (Sal. 100:2).
2. ¿Tuku xlakata kilimaxkitkan Jehová tuku tlakg xatlan kgalhiyaw?
2 Jehová wa kiMalanakan tiku lakgchan namapakgsinan xlikalanka kakilhtamaku chu lakgchan namaxkiyaw tuku tlakg xatlan (Mal. 1:6). Xlakata paxkiyaw, waniw pi natlawayaw xtalakaskin xliputum kilatamatkan. Wa xlakata, lu paxuwayaw akxni kgotanu o xlisputni papaʼ xlakata kxtaskujut Jehová mastaw tuku «xapulana» xla kinkilhtamakujkan, tuku tlan tlawayaw chu kilitliwakgakan (Pro. 3:9). Pero, komo makgkatsiyaw pi tlan tlakg mastayaw, kaʼakxilhwi la tlan chuna natlawayaw (Rom. 2:15).
3. ¿Tuku xlakata nitlan malakxtumikan taskujut?
3 “Ni katamalakastukti wantu tlawakgo amakgapitsin.” Nitlan komo natamalakxtumiyaw kintaskujutkan xla amakgapitsin o nalakpuwanaw pi tlakg lhuwa tuku xtlawayaw akxni tliwakga xwanitaw. Talakgpali kilatamatkan chu talakgpali tuku tlan tlawayaw. Akxni malakxtumiyaw kintaskujutkan nitlan kitaxtu chu makgkatsiyaw pi nila tuku tlawayaw (Gál. 5:26; 6:4). Jesús ni malakxtumilh xtaskujutkan amakgapitsin wata kawanilh pi lu tlan tuku xtlawakgo (Mar. 14:6-9).
4. ¿Tuku kinkamasiyaniyan parábola nema lichuwinalh Jesús?
4 Jesús lichuwinalh skujnin kʼakgtum parábola niku kamaxkika tumin «lantla xliskgalalakan chatunu chatunu» (Mat. 25:15, Hua Xasasti Talaccaxlan, 1999). Akxni chilh xmalanakan xlakata nakatatlawa kuenta, kawanilh pi lu tlan taskujut tlawakgolh tiku ni lhkititnankgolh xlakata skujkgolh chuna la matlanikgolh. Wa xlakata kawanilh xchatunukan: «Na katapaxuwa nchu mimalana» (Mat. 25:21, 23). Nachuna, komo lu nalichuwinanaw Dios, tlan nakinkaʼakxilhan chu lu napaxuwayaw.