Pulukkitsis tuku tlan natlawayaw xlakata natekgsaw tiku tlan namakgalhtawakgeyaw
1. ¿Tuku kilitlawatkan komo ni tekgsaw tiku likgalhtawakgaputun Biblia chu tuku xlakata?
1 ¿Nila tekgsa tiku nalimakgalhtawakgaya Biblia? Nitu kapuwanti chuntiya kaputsa. Jehová sikulunatlawa tiku putum kilhtamaku tlawa xtalakaskin (Gál. 6:9). Unu nalichuwinanaw pulakkitsis tuku namakgtayayan.
2. ¿La tlan nakawaniyaw pi kamakgalhtawakgaputunaw latamanin?
2 Kakawani pi makgalhtawakgeputuna. Lhuwa latamanin katsikgo pi mastayaw revista Makatsinina chu ¡Despertad!, pero ni katsikgo pi na limakgalhtawakgananaw Biblia. Alimakgtum akxni napina lichuwinana Dios akgatunu chiki, kakawani pi kalimakgalhtawakgaputuna Biblia. Na kakawani tiku kalakgapaxialhanana. Komo ni nalakaskinkgo, chuntiya nakalipiniya likgalhtawakga asta akxni nalakaskinkgo. Chatum tala akglhuwa kata kalinilh revista chatum chixku chu xpuskat. Akgtum kilhtamaku, kalinilh xalaksasti revistas chu akxni kawanilh pi xʼamaja, kakgalhskilh: «¿Likgalhtawakgaputunatit Biblia?». Chu wanikgolh pi tlan, chu la uku xchatiykan tamunukgonit.
3. ¿Tuku xlakata ni nalakpuwanaw pi kamakgalhtawakgamakaja tiku ankgo ktamakxtumit?
3 Kakatachuwinanti tiku ankgo ktamakxtumit. Ni kalakpuwanti pi tiku an ktamakxtumit kalimakgalhtawakgamakaja Biblia. Chatum tala wan: «Liwaka itat tiku kkamakgalhtawakge anta kkatekgsnit ktamakxtumit». Chatum puskat tiku lu xmaxanan akgkukitsis kata la xkataʼan xlaktsuman tiku xtamunukgonita. Xchan akxni xtsuku tamakxtumit chu lakapala xʼan akxni xkgalhsputa. Akgtum kilhtamaku, chatum tala wanilh pi xlimakgalhtawakgaputun Biblia. Makgamakglhtinalh takgalhtawakga chu alistalh tamunulh. Tala tsokgli: «¡Tlakg tlan xwa komo ni xakkgalhkgalhilh akgkukitsis kata xlakata xakmalaknunilh takgalhtawakga xalak Biblia!».
4. ¿La tlan nakamakgtayayaw amakgapitsin xlakata nakgalhiyaw tiku nakalimakgalhtawakgeyaw Biblia?
4 Kakatapi amakgapitsin. Chatum tala kataʼan amakgapitsi akxni ankgo makgalhtawakganankgo. Akxni sputa takgalhtawakga, kgalhskin tiku kgalhtawakgama komo lakgapasa chatum tiku lakaskin namakgalhtawakgekan, pero pulana wani tiku makgalhtawakganan. Na tlan nakakgalhskinaw kirevisitaskan chu tiku kamaxkikanit libro ¿Tuku xlikana masiyay Biblia? komo lakgapaskgo atanu tiku na xlakaskinkgolh uma libro. Nachuna, max wilakgolh tiku lichuwinankgo Dios o precursores nema nila ankgo akxilhkgo tiku likgalhtawakgaputun Biblia. ¿Tuku xlakata ni kawaniya pi wix nakamakgtayaya?
5. ¿Tuku xlakata tlan nawan komo nakgalhskinkan tiku ni xtatayana Jehová komo likgalhtawakgaputun Biblia?
5 Kakakgalhskinti tiku tatamakgaxtokgkgonit chatum tala. ¿Wi kmincongregación tiku tatamakgaxtokgnit tiku ni xtatayana Jehová? Makgapitsi ni lakgatikgo pi tiku tatamakgaxtokgnit nakalitachuwinankgo xlakata Dios, pero lakaskinkgo nakalimakgalhtawakgakgo Biblia tiku ni xalak xfamilia. Tlakg tlan nawan komo pulana nakgalhskina tiku xtatayana Jehová xlakata nakatsiya la natsukuya tachuwinana.
6. ¿Tuku xlakata lu xlakaskinka natlawayaw oración xlakata natekgsaw tiku nalimakgalhtawakgayaw Biblia?
6 Kaskini Jehová pi kamakgtayan. Ni kalakpuwanti pi oración ni makgtayanan (Sant. 5:16). Jehová kinkawaniyan pi nakgaxmata kioracioneskan komo naskiniyaw chuna la xtalakaskin (1 Juan 5:14). Chatum tala tiku ni lhuwa kgalhi kilhtamaku, skinilh Jehová pi xmakgtayalh natekgsa tiku namakgalhtawakge. Pero xpuskat xlilakgaputsa xlakata xlakpuwan pi xchixku ni xkgalhilh kilhtamaku xlakata xmakgalhtawakganalh, tlakg chuna xlakpuwan komo lhuwa kgalhi taʼakglhuwit tiku xmakgalhtawakgalh. Wa xlakata wanilh Jehová la xmakgkatsi. Titaxtulh akgtiy semana kakgalhtika xʼoracionkan akxni chatum precursora xalak congregación tekgsli chatum chixku tiku xlikgalhtawakgaputun Biblia chu wanilh tala xlakata xla xmakgalhtawakgelh. Xpuskat tsokgnalh: «Tiku lakpuwankgo pi nila katimakgalhtawakganankgolh, kkawaniyan pi chuntiya katlawatit oración chu kaskintit tuku lakaskinatit. Nikxni xaklakpuwanaw pi lu tlan xakamaw makgkatsiyaw». Komo ni natamakgxtakga, wix na natekgsa tiku nalimakgalhtawakgaya Biblia chu lu tlan nalimakgkatsiya xlakata nalipina ktiji «ntu an klatamat» (Mat. 7:13, 14).