Niku tamasta xtakgalhtin akgtum takgalhskinin
◼ ¿Tuku tastakyaw kinkamakgtayayan ni namaklakaskinaw teléfono celular ktamakxtumit chu akxni lichuwinanaw Dios?
«Putum tuku tlawaputunkan xlikgalhit xkilhtamaku.» (Ecl. 3:1.) Wa teléfonos celulares tlan limalakgachayaw mensajes o katachuwinanaw atanu latamanin akxni lakaskinaw. Pero, wi kilhtamaku akxni kstalaninanin Cristo ni nalimakgatsankgayaw kinkilhtamakujkan teléfono. Akgtum liʼakxilhtit, kkintamakxtumitkan kakninaniyaw Jehová, anta makglhtinanaw tastakyaw xaʼespiritual chu lamatliwakglhaw kinchatunukan (Deut. 31:12; Sal. 22:22; Rom. 1:11, 12). ¿Max tlan xmamixiw kinteléfonojkan akxni wilaw ktamakxtumit chu alistalh naʼakxilhaw mensajes? Komo kgalhkgalhimaw nakinkaxakgatlikanan chu wa xlakata nila mamixiyaw, kawiliw chuna la ni namakasanan.
«Nchuna klitlaway xpalakata xatlan tamakatsinin» (1 Cor. 9:23). Min kilhtamaku tlan namaklakaskinaw celular akxni lichuwinamaw Dios. Akgtum liʼakxilhtit, tala tiku tamakxtu grupo max nakaxakgatli tiku lakgamakgat lichuwinamakgolh Dios. Chu max tiku lichuwinan Dios kaj nakatachuwinamputun tiku kamakgalhtawakge o revisitas akxni nina kalakgan, liwaka komo makgat wilakgolh xchikkan. Pero kuenta natlawayaw xlakata ni nakinkamakgatsankgayan akxni lichuwinamaw Dios (2 Cor. 6:3). Nachuna komo talakaskin nakgalhkgalhikgoyaw amakgapitsin akxni lichuwinamaw Dios, nitlan komo nakamalakgachaniyaw mensajes de texto o nakaxakgatliyaw kteléfono chatum kiʼamigojkan. Wata tlakg tlan komo chuntiya nalichuwinanaw Dios chu nakakuentajtlawakgoyaw tiku lakxtum kinkatalichuwinamakgon Dios.
Tlan kakalikatsiniw amakgapitsin (1 Cor. 10:24; Filip. 2:4). Nikxni kalakpuwaw pi maski ni xkilhta nachanaw niku tamakxtumikan akxni lichuwinankan Dios xlakata tlan wi tiku natachuwinanaw o namalakgachaniyaw mensaje xlakata nakgalhskinaw niku nalichuwinankan Dios. Akxni ni sokg chanaw, amakgtum lakaxwiliparakan grupo. Xlikana, min kilhtamaku max wi tuku natlawa pi ni sokg nachanaw. Pero akxni liskujaw sokg nachanaw chuna limasiyaniyaw Jehová, tiku pulalin grupo chu kinatalankan pi tlan likatsiyaw.