Xasasti takilhtlin xlakata namalankiyaw Jehová
1 Tamakxtumit nema tlawa kata kata corporación Watch Tower Bible and Tract Society of Pennsylvania, nema tlawaka 4 xla octubre kata 2014, wanka pi xlakaxwilikanit xlakata nalakkaxtlawaparakan kintakilhtlinkan. Uma tamakatsinin lu makgapaxuwanan. Nachuna, putum tiku anta xwilakgolh kamalakapastaknika pi akxni kakninaniyaw Dios lu xlakaskinka kilhtlinikan (Sal. 96:2).
2 Pero ¿tuku xlakata nalakkaxtlawaparakan kintakilhtlinkan? Pulaklhuwa tuku xlakata. Pulaktum, xlakata la uku tlakg liwana akgatekgsaw tuku masiya Biblia wa xlakata max natalakaskin natalakgpali makgapitsi xaletras takilhtlin (Prov. 4:18). Pulaktiy, xlakata kpulaklhuwa tachuwin lakkaxtlawamaparaka Traducción del Nuevo Mundo, max natalakaskin nalakgpalikan makgapitsi tachuwin xla kintakilhtlinkan nema kilhtikanit xapulana Biblia. Nachuna max lhuwa tuku natalakgpali kintakilhtlinkan, talakkaxwilinit pi nawilikan xalaksasti takilhtlin.
3 ¿Nakgalhkgalhiyaw asta akxni naʼimprimirlikan kintakilhtlinkan xlakata tlan namaklakaskinaw? Ni, xlakata papaʼ nema mima nawilikan kpágina jw.org. Akxni nina lhuwa kilhtamaku wilikanit uma xasasti takilhtlin, nalitliyaw akxni nakgalhsputa Tamakxtumit xlakata xTaskujut Dios. Kprograma xla uma semana nawilikan xtukuwani takilhtlin: «canción nueva».
4 La nakatsiniyaw xalaksasti takilhtlin. Lakgachunin max tuwa katsinikan akgtum takilhtlin. Maxki chuna, akinin tlawaputunaw la tlawalh salmista xla wa: «Naktliniyan wix ti kanikxniwa mininiyan nakaknikana» (Sal. 30:12). Tuku kinkawanikanan nakinkamakgtayayan xlakata nakatsiniyaw xalaksasti takilhtlin chu nalitliyaw xliputum kinakujkan.
Makglhuwa kakgaxpatti tatlakgni nema nawilikan kpágina jw.org. Uma natlawa pi lakapala nakatsiniyaw.
Kalikgalhtawakgaw chu kakatsiniw.
Makglhuwa kalitliw, asta akxni liwana nataxtu.
Kalitliw akxni kakninaniyaw Dios kfamilia xlakata putum tlan nalimakgkatsikgo akxni natlikgo.
5 Papaʼ nema aku mimakgolh, nawilikan xasasti takilhtlin akxni nakgalhsputa Tamakxtumit xlakata xTaskujut Dios, congregacion pulana nakgaxmatkgo tatlakgni. Alistalh natlikan takilhtlin chuna la lismanikanit.
6 Xlikana kilhtlikan ktamakxtumit lu xlakaskinka, xlakata kinkamaxkiyan talakaskin pi makxtum namalankiyaw Jehová. Wa xlakata ni kalismaniw pi atanu tuku natlawayaw akxni natliyaw ktamakxtumit.
7 Wi atanu tuku na kilitlawatkan xlakata nalimasiyayaw pi xlakaskinka akxilhaw tatlin. Klaklanka tamakxtumit, akxni nina tsuku taʼakgchuwin, wilikan tatlakgni. Natalan xlikalanka katiyatni lhuwa liskujkgo xlakata naʼankgo grabarlikgo putum tatlakgni nema tamaklakaskin akxni kakninaniyaw Dios. Akgatunu kata, makgtiy ankgo kPatterson (Nueva York), chu xlakan xokgokgo xpasajekan. Wa xlakata, akxni nawan pi natawilayaw tiku pulalin tamakxtumit chuna katlawaw. Uma lakkaxwili kinakujkan xlakata tamakatsin nema nakinkamaxkikanan (Esd. 7:10).
8 Tamakxtumit xala uku nalimakglhsputukan tatlin nema wanikan «¡Que venga el Reino establecido por Dios!». Uma tatlin, lichuwinanka ktamakxtumit nema tatlawa kata kata, tlawaka xlakata nalakapastakkan akxni takgatsilh akgtum ciento kata lata kilhtsukulh xTamapakgsin.
9 Xasasti takilhtlin na wamputun «wantu xatlan» nema kinkamaxkinatan Jehová (Mat. 12:35a). Kalakkaxwiliw pi nakatsiniyaw xlakata nakilhtliyaw xliputum kinakujkan. Chuna namaxkiyaw kakni chu namalankiyaw Dios chuna la xlilat (Sal. 147:1).