Tlakg tlan kalichuwinaw Dios
1. ¿Tukuya liʼakxilhtit xla xapulana siglo limasiya pi chuntiyaku naliskujaw xlakata tlakg tlan nalichuwinanaw Dios?
1 Kstalaninanin Cristo talakaskin tlakg nakatsiniyaw nalichuwinanaw Dios. Wa xlakata, Jesús kamasiyanilh kstalaninanin chu kamakgtayalh namakgantaxtikgo la xlichuwinankgo Dios (Luc. 9:1-5; 10:1-11). Nachuna tlawakgolh Áquila chu Priscila akxni «tlakg aktanks ntimasiyunikgolh [Apolos] xtamasiyun nkimPuchinakan» (Hech. 18:24-26). Pablo na maʼakgpuwantinilh Timoteo tiku makgasa xlichuwinan Dios pi tlakg xliskujli xlakata tlakg tlan xmasiyalh, xlakata amakgapitsin “xʼakxilhkgolh” pi xtatliwakglhma xtakanajla (1 Tim. 4:13-15). Maski akglhuwata kata skujnanimaw Dios o nina lhuwa, talakaskin pi chuntiyaku tlakg nakatsiniyaw nalichuwinanaw Dios.
2. ¿Tuku natlawayaw xlakata nakatsiniyaw la lichuwinankgo Dios amakgapitsin?
2 Kakatsiniw la tlawakgo amakgapitsin. Pulaktum tuku nakinkamakgtayayan tlakg tlan naskujnaniyaw wa akxni akxilhaw la tlawakgo amakgapitsin (Prov. 27:17). Wa xlakata akxni anaw lichuwinanaw Dios, kuenta katlawaniw tiku taʼanaw akxni tsuku lichuwinan Dios. Na kaskiniw tastakyaw tiku katsinikgo lichuwinankgo Dios chu liwana kakgaxmatwi tuku kinkawanikgoyan (Prov. 1:5). ¿Tuwa makgkatsiyaw natlawayaw revisitas, wi tiku natsukuyaw makgalhtawakgayaw o apulaktu xlakata la lichuwinanaw Dios? Katachuwinaw tiku lakgayawakanit akgtum grupo o atanu tiku lu katsini lichuwinan Dios xlakata nakinkamakgtayayan. Na kalakapastakwi pi espíritu santo na tlan nakinkamakgtayayan tlakg tlan nalichuwinanaw Dios. Wa xlakata putum kilhtamaku kaskiw akxni tlawayaw oración (Luc. 11:13).
3. ¿Tuku natlawayaw komo nakinkastakyawakanan maski nitu skinitaw?
3 Ni kalisitsiw komo nakinkamaxkikanan tastakyaw maski nitu skinitaw (Ecl. 7:9). Kataktujuw chu kapaxtikatsininaw, chuna la Apolos chu kamakgamakglhtinaw tamakgtay nema kinkamaxkikanan. Wa tuku tlakg tlan natlawayaw (Prov. 12:15).
4. ¿Tuku xlakata wa Jesús pi talakaskin tlakg tlan nalichuwinanaw Dios?
4 Akxni tlakg katsiniyaw malanki Dios. Jesús lichuwinalh akgtum liʼakxilhtit xlakata xkamaʼakgpuwantinilh kstalaninanin tlakg tlan xlichuwinankgolh Dios. Wa pi xlitaxtu la xkiwi uvas chu kstalaninanin la xpakgan nema xaTlat akgakay xlakata «tlakg tlan natawakay xatawakat» (Juan 15:2). Chu chuna la xmalana xkiwi uvas tlakg makgalaputun uvas, Jehová lakaskin pi «nkintachuwinkan», uma kilhchanima akxni lichuwinanaw Dios tlakg lhuwa kawa (Heb. 13:15). ¿Tuku nakitaxtu komo tlakg tlan nalichuwinanaw Dios? Jesús kinkakgalhtiyan: «Litamatlankiy nkinTlat, mpi namastayatit lhuwa xatawakat» (Juan 15:8).