La nakamasiyaniyaw nalichuwinankgo Dios tiku aku tsukumakgolh
1. ¿La makgkatsi akxni xlimakgtumku pit lichuwinana Dios?
1 ¿Lakapastaka akxni xlimakgtumku pit lichuwinana Dios? Xlikana pi lu xpekuana. Pero ¡lu tlan makgkatsi! Tiku makgalhtawakgen o atanu tiku lichuwinan Dios makgtayan. La uku wix katsiya la nalichuwinana xTamapakgsin Dios; katsiyata la nakamakgtayaya xalaksasti xlakata tlan nalichuwinankgo Dios.
2. ¿Tuku xlikatsinitkan tiku aku tsukumakgo lichuwinankgo Dios?
2 Xalaksasti tiku lichuwinankgo Dios xlikatsinitkan la namatsukikgo akgtum takgalhchuwin, la namaklakaskinkgo Biblia kʼakgatunu chiki, la natlawakgo akxni nakalakgamparakgo, tlan namatsukikgo chu namakgalhtawakganankgo. Ni kajwatiya uma nakatsinikgo, na xlikatsinitkan atanu tuku natlawakgo la akxni lichuwinankan Dios ktiji o niku stanankan. ¿La tlan nakamakgtayaya? Nakawiliniya liʼakxilhtit chu nakawaniya la natlawakgo.
3. ¿La kamakgtaya amakgapitsi liʼakxilhtit nema kawiliniyaw?
3 Nakawiliniya liʼakxilhtit. Jesús kamasiyanilh kstalaninanin la nalichuwinankgo Dios (Luc. 8:1; 1 Ped. 2:21). Xlakata tlan natlawaya la tlawalh Jesús, akxni natalakkaxlaya pi natapina tiku aku tsukuma lichuwinan Dios, kalakkaxwili pi ni lhuwa tuku nawana xlakata xla nachuna natlawa, max wa namaklakaskina tuku wan likgalhtawakga nema kgalhiyaw. Akxni lichuwinampatita xtachuwin Dios, pulana wix kachuwinanti kʼakgtum o kʼakgtiy chiki xlakata xla nakgaxmata chu alistalh akxni napinatit kʼaktanu chiki kakgalhskinti la akxilhli tuku wanti chu komo tlan la tlawa. Chuna, tiku aku tsukuma lichuwinan Dios naʼakxilha pi lu xlakaskinka wi tiku nataʼan lichuwinan Dios chu ni tuwa namakgkatsi namakglhtinan tastakyaw nema namaxkiya akxni xla nalakgchan nachuwinan.
4. ¿La tlan namakgtayayaw chatum tiku aku tsukuma lichuwinan Dios akxni kgaxmatnitawa tuku wa?
4 Kamasta tastakyaw. Jesús na kawanilh kstalaninanin la nalichuwinankgo Dios (Mat. 10:5-14). Xtachuna katlawa. Akxni nachuwinan tiku aku tsukuma, liwana kakgaxpatti tuku nawan. Akxni napinatit kʼatanu chiki, kawani la tlawalh pero ni kaj tsinu tuku nawaniya chu alistalh kawani pulaktum nema tlakg tlan tlawalh maski akxilhti tuku tlakg tlan natlawa alistalh. Nina kawani la xlitlawat; wata kakgalhi akxni nachuwinampara kʼatanu chiki komo natlawapara tuku nitlan tlawalh. Max kaj xpekuama. Na kalakapastakti pi kimputumkan tanu tanu tuku tlan tlawayaw chu pulaklhuwa wi la liwana natlawayaw (1 Cor. 12:4-7).
5. Akxni wi tiku nawaniya tuku tlakg tlan xlitlawat, ¿la nawaniya?
5 Namin kilhtamaku tiku aku tsukuma lichuwinan Dios naskiniyan pi nawaniya tuku tlakg tlan xlitlawat. Komo ni chuna, wix kawani tuku xlitlawat, pero kuenta natlawaya la nawaniya. ¿La chuna natlawaya? Makgapitsi tiku tlakg katsinikgo lichuwinankgo Dios kajwatiya kgalhskininankgo: «¿Kimaxkiya talakaskin nakwaniyan tuku tlakg tlan militlawat?», o «¿La lakpuwana pi tlawa?». Atanu tuku tlan nawana: «Akxni ktsukulh lichuwinan Dios, tuwa xakmakgkatsi ..., pero tuku kimakgtayalh ...». Namin kilhtamaku tlakg tlan nawan akxtum nalikgalhtawakgayatit libro Razonamiento. Pero ni lhuwa tuku kawani; kaj pulaktum kalichuwinanti xlakata tuku wa.
6. Akxni lichuwinanaw Dios, ¿la tlan akgtum likan namastakaki atanu likan?
6 Likan mastakaki atanu likan. Timoteo liwana xkatsini lichuwinan Dios, pero Pablo wanilh pi tlakg tlan xmasiyalh chu xmatliwakglhli xtakanajla (1 Tim. 4:13, 15). Maski lhuwata kata titaxtunit akxni xlimakgtumku pit lichuwinana Dios, pero chuntiya kakatsini la tlakg liwana nalichuwinana. Kakatsini la tlawakgo tiku katapina lichuwinana Dios, asta tiku aku tsukukgolh lichuwinankgo. Chu skgalalh katawilatit xlakata liwana nakamakgtayayatit minatalankan, pero tlakg nakamakgtayayatit tiku xalaksasti xlakata liwana namasiyakgo xalakwan xalaksasti (Pro. 27:17).