KILATAMATKAN LA KSTALANINANIN CRISTO

Tuku xasasti nalimin tamakxtumit kxitat semana

Akxni natsuku enero kata 2018, ktamakxtumit nema tatlawa kxitat semana natamatitaxti makgapitsi notas, fotos chu videos nema nakinkamakgtayayan nalikgalhtawakgayaw Traducción del Nuevo Mundo de las Santas Escrituras (nwtsty), nema min kʼInternet, maski nina wi kkintachuwinkan. Xlikana pi uma tuku nataxtu tlakg nakinkamakgtayayan akxni nalakkaxwiliyaw tuku natalichuwinan ktamakxtumit. Chu tuku tlakg xlakaskinka, wa pi tlakg natalakatsuwiniyaw Jehová, xapaxkina kinTlatkan.

NOTAS XLA TAKGALHTAWAKGA

Notas lichuwinan tuku talismanin xʼanan, niku xtatekgsa chu tuku tachuwin xchuwinankan akxni lichuwinamaka versículos xalak Biblia.

Mateo 12:20

Mecha nema jima: Makgskgot nema xtamaklakaskin kʼakgatunu chiki xlitatlawanit tiyat nema xlimatsamakan aceite xla oliva. Aceite xlaktaxtu mecha nema xlitatlawanit lino chu xtlawa pi ni xmixli. Ktachuwin griego «mecha nema jima» max kilhchanima mecha nema taxtuni jini xlakata chichiku maski atsinu pasama o mixnita. Chuna la xlichuwinankanit kʼIsaías 42:3, Jesús xʼama lakgalhamaninan; xla nikxni xʼama kamasputuni xtakgalhkgalhinkan latamanin tiku nitu xkgalhikgo chu tiku nitlan xkalikatsinikan.

Mateo 26:13

Xlikana; lu xlikana: Tachuwin xagriego amén, takilhtinit ktachuwin xahebreo amén, nema wamputun «chuna kalalh» o «xlikana». Jesús ankgalhin xmaklakaskin uma tachuwin xlakata nalimatsuki akgtum tachuwin, akgtum tamalaknun o tuku xʼama la. Chuna xlimasiya pi xtachuwin xaxlikana chu xatalipaw. Wankan pi tachuwin nema maklakaskilh Jesús «xlikana» o «amén» ni anan tu xtachuna nema tatsokgnit kBiblia. Akxni makgtiy tatsokgtawilanit uma tachuwin (amén amén), chuna la wi kʼEvangelio xla Juan, uma xtachuwin Jesús tamatitaxti «lu xlikana» (Jn 1:51).

FOTOS CHU VIDEOS

Fotografías, dibujos, videos nema ni chuwinan chu videos xacaricatura nema masiya tuku talichuwinan kBiblia.

Betfagué, sipi xla Olivos chu Jerusalén

Uma aktsu video masiya tiji nema lichankan kJerusalén lata kʼeste, niku wi la uku et-Tur, nema wankan pi kilhchanima Betfagué nema lichuwinan Biblia, asta niku tlakg talhman sipi xla Olivos. Betania tatekgsa kxʼeste Betfagué, kxpaxtun sipi xla Olivos. Akxni Jesús chu xtamakgalhtawakgen xʼankgo kJerusalén xlismanikgo xtamakgxtakgkgo katsisni kBetania. La uku anta tatekgsa kachikin el-Ázariyeh (El Éizariya), tukuwani nema kʼárabe kilhchanima «Xpulataman Lázaro». Katsiyaw pi Jesús tamakgxtakgli kxchikkan Marta, María chu Lázaro (Mt 21:17; Mr 11:11; Lu 21:37; Jn 11:1). Akxni Jesús xtaxtuyacha kʼuma chiki chu xʼan kJerusalén, max na anta xlaktlawan la tasiya kvideo. Kilhtamaku 9 xla nisán kkata 33, akxni Jesús xkgewi tantum burro, titaxtulh ksipi xla Olivos chu tanulh kJerusalén, max mincha lata Betfagué, chu stalanilh xtiji Jerusalén.

Tiji nema linan lata kBetania asta kBetfagué
Betfagué
Sipi xla Olivos
Kaxtum xla Cedrón
Sipi niku xwi Templo

Xalukut tsani nema litalakgxtokgonit kgantum clavo

Uma foto masiya la tasiya lukut xla tsani nema xlitalakgxtokgonit kgantum clavo xaʼhierro nema 11,5 centímetros (4,5 pulgadas) xlilhman. Lukut tekgska kkata 1968 akxni xkawaxmaka kxnorte Jerusalén chu uma lukut xalak xkilhtamaku romanos. Uma tuku tatekgsnit masiya pi max xtamaklakaskin clavos xlakata xkalixtokgowakakan kkgantum kiwi akxni wi tiku xmakgnikan. Max xtachuna xwanit clavos nema maklakaskinkgolh soldados romanos akxni xtokgowakakgolh Jesús kkgantum kiwi. Lukut tekgska xpulakni akgtum osario, uma wamputun la akgtum caja xachiwix niku xwilikanit xlukut chatum lataman akxni xmasnita xliwa. Uma tuku tekgska masiya pi tiku kxtokgowakakan kkgantum kiwi tlan xmaknukan (Mt 27:35).