Referencias xlakata Tuku natalikgalhtawakga Xlatamat chu xtaskujut kstalanina Cristo
6-12 XLA AGOSTO
TUKU LHUWA XTAPALH XALAK BIBLIA | LUCAS 17, 18
«Kalimasiyaw tapaxtikatsinit»
(Lucas 17:11-14) Akxni xʼama kJerusalén, xtitaxtuma niku xtakilhstukkgo Samaria chu Galilea. 12 Chu akxni xtanuma kʼakgtum aktsu kachikin, tatanokglhkgolh kgalhkaw lakchixkuwin tiku xkgalhikgo lepra, pero lakgamakgat tayakgocha. 13 Chu pixlanka chuwinankgolh chu xwankgo: «¡Jesús, Makgalhtawakgena, kakilalakgalhamaw!». 14 Akxni kaʼakxilhli, kawanilh: «Kakalakgpitit sacerdotes xlakata nakaʼakxilhkgoyan». Akxni xʼamakgolhku ktiji, pakskgolh.
nwtsty notas xla takgalhtawakga xlakata Lu 17:12, 14
kgalhkaw lakchixkuwin tiku xkgalhikgo lepra: Makgasa, tiku xkgalhikgo lepra akxtum niku xwilakgo xlakata tlan xlamakgtayalh (2Re 7:3-5). Anta kxLimapakgsin Dios xwan pi tiku xkgalhikgo lepra makgat niku xtawilakgolh chu xmakatsininankgolh pi xtalakatsuwimakgo akxni pixlanka xwankgolh: «¡Xaxkajwa, xaxkajwa!» (Le 13:45, 46). Kgalhkaw lakchixkuwin tiku xkgalhikgo lepra kgalhakgaxmatkgolh Limapakgsin, wa xlakata makgat tayakgolh chu ni talakatsuwinikgolh Jesús.
Kakalakgpitit sacerdotes xlakata nakaʼakxilhkgoyan: Akxni Jesús xlama kKatiyatni kgalhakgaxmatli Limapakgsin chu maxkilh kakni tuku xlakkaxwilikanit nema xtlawakgo sacerdotes xalak xfamilia Aarón, wa xlakata kawanilh umakgolh lakchixkuwin pi xlakgankgolh chatum sacerdote (Mt 8:4; Mr 1:44). Chuna la xwan xLimapakgsin Moisés, komo tiku xkgalhi lepra xpaksa, xlilakganat xwanit chatum sacerdote xlakata xwanika komo xlikana xpaksnit. Na xliʼanat xwanit ktemplo xlakata xtlawalh xtamakamastan chuna la xtatsokgtawilanit (Le 14:2-32).
Kaputsaw kBiblia tuku lhuwa xtapalh
(Lucas 17:7-10) «Komo chatum miskujnikan lakgwaxnama kkapukuxtun, o kuentajtlawama borregos, ¿la xmakgamakglhtinantit akxni xkitaspitli kpukuxtu? ¿Xwanitit: “Tunkun katat unu chu kawayanti”? 8 Ni chuna katitlawatit, wata nawaniyatit: “Wi tuku kakinkaxtlawani xlakata nakwayan, chu kawili milakatitawakat chu kakimaxki tuku kmaklakaskin asta akxni nakwayankgo, chu alistalh na tlan nawayana”. 9 ¿Ni xlikana pi malana ni katipaxtikatsinilh skujni xlakata tlawalh tuku limapakgsilh? 10 Nachuna, akxni namakgantaxtikgoyatit putum tuku kalimapakgsikanitantit, kawantit: “Akinin skujnin tiku nitu klitaxtuyaw. Tuku ktlawanitaw wa tuku kilitlawatkan xwanit”».
nwtsty nota xla takgalhtawakga xlakata Lu 17:10
nitu klitaxtuyaw: Xagriego «nitu kilakgxtukan o kilakgasikan», «ni xtapalh akinin». Akxni Jesús maklakaskilh uma tachuwin ni xwamputun pi skujnin, kilhchanima kstalaninanin, nitu xkaliʼakxilhka o xlakpuwankgolh pi ni xtapalh xwankgonit. Chuna la masiya tuku wa xapulana, Jesús xwamputun pi skujni ni xlilakpuwanat pi putum tlan tlawa chu xlilakapastakat pi ni lakgchan namalankikan xlakata tlawa xtaskujut. Chuna la wankgo tiku putsanankgo, unu Jesús maklakaskilh uma tachuwin xlakata namalakatsali o namaliwaka tuku xlichuwinama chu wa pi «kaj skujni akinin nema ni kinkalakgchanan xlakaskinka nakinkaliʼakxilhkanan».
(Lucas 18:8) Kkawaniyan: pi xla tunkun nakatlawani tuku xaʼakgstitum. Pero akxni xKgawasa chixku nachin, ¿xlikana natekgsa uma takanajla kkatiyatni?
nwtsty nota xla takgalhtawakga xlakata Lu 18:8
uma takanajla: O «xtachuna uma takanajla». Takanajla nema Jesús xlichuwinama unu ni kilhchanima kaj kaxatukawa takanajla, wata kaj pulaktum tuku lichuwinama: takanajla xtachuna nema xkgalhi puskat tiku xninita xchixku (Lu 18:1-8). Tiku kgalhikgo uma takanajla, lipawankgo pi kgaxmatkan kiʼoracionkan chu pi Dios natlawa tuku xaʼakgstitum xpalakata xatalaksakni. Max Jesús ni kgalhtilh uma takgalhskinin xlakata xlimakgalhtawakget xlilakpuwankgolh la xwi xtakanajlakan. Lu tlan pi kalitachuwinalh uma parábola xlakata takanajla chu oración, xlakata Jesús aku xkalitachuwinanit taputsan nema x’amakgo kgalhikgo kstalaninanin (Lu 17:22-37).
13-19 XLA AGOSTO
TUKU LHUWA XTAPALH XALAK BIBLIA | LUCAS 19, 20
Kaputsaw kBiblia tuku lhuwa xtapalh
(Lucas 19:43) Xlakata namin kilhtamaku akxni mintalamakgasitsin nalimakgstiliwilikgoyan laklanka lakkankasajajan kiwi chu namakgapatikgoyan.
nwtsty nota xla takgalhtawakga xlakata Lu 19:43
laklanka lakkankasajajan kiwi: O «lipakan». Kajwatiya unu tamaklakaskin tachuwin xagriego kjárax kTatsokgni xaGriego. Kilhchanima kgantum «kiwi» o «kinkaslajaja kiwi nema xmaklakaskinkan xlakata wi tuku napakawilikan». Na kilhchanima tuku tlawakgo soldados akxni yawakgo o lipakanankgo lakkinkaslajajan kiwi. Xtachuwin Jesús kgantaxtulh kkata 70 akxni soldados romanos nema xkapulalin Tito stiliwilikgolh o pakawilikgolh Jerusalén. Chuna, Tito pulaktutu tuku tlawalh: tlawalh pi judíos nila xtamaknukgolh liwat, nila xtsalakgolh chu kamafuerzarlinilh natamakamastakgo. Xlakata xpakawilikgolh Jerusalén, soldados kakgolh kiwi nema xyakgo lakatsu.
(Lucas 20:38) Xla ni xDioskan tiku nikgonitta, wata xDioskan tiku staknankgo, xlakata kxlakatin putum staknamakgolh».
nwtsty nota xla takgalhtawakga xlakata Lu 20:38
xlakata kxlakatin putum staknamakgolh: O «xlakata chuna la xla akxilha putum lamakgo». Biblia wan pi kxlakatin Dios, lataman tiku ni tlawa xtalakaskin la xanin lama (Ef 2:1; 1Ti 5:6). Pero tiku ni makgxtakgkgolh Dios chu nikgonita, kxlakatin lamakgolhku, xlakata xla nakamalakastakwani (Ro 4:16, 17).
20-26 XLA AGOSTO
TUKU LHUWA XTAPALH XALAK BIBLIA | LUCAS 21, 22
Kaputsaw kBiblia tuku lhuwa xtapalh
(Lucas 21:33) Akgapun chu katiyatni nalakgsputkgo, pero kintachuwin nikxni katilakgsputli.
nwtsty notas xla takgalhtawakga xlakata Lu 21:33
Akgapun chu katiyatni nalakgsputkgo: Atanu textos xalak Biblia masiyakgo pi Katiyatni chu akgapun nikxni katilakgsputkgolh (Gé 9:16; Sl 104:5; Ec 1:4). Wa xlakata, max Jesús xmalakatsalima tuku xlichuwinama xlakata nawan pi maski xlalh tuku nila chuna lay, akgtum liʼakxilhtit pi akgapun chu Katiyatni xlakgsputkgolh, xtachuwin xʼama kgantaxtu (katamalakxtupi Mt 5:18). Pero Jesús max na xlichuwinama akgapun chu katiyatni nema kaj wi tuku kilhchani, nema Apocalipsis o Revelación 21:1 limapakuwi «xakgasiya akgapun, chu ntu xakgasiya tiyat».
kintachuwin nikxni katilakgsputli: O «kintachuwin nikxni katititaxtulh». Tachuwin xagriego chuna la tatsokgnit unu limasiya pi xtachuwin Jesús xlikana nakgantaxtu.
27 XLA AGOSTO ASTA 2 XLA SEPTIEMBRE
TUKU LHUWA XTAPALH XALAK BIBLIA | LUCAS 23, 24
Kaputsaw kBiblia tuku lhuwa xtapalh
(Lucas 23:31) Komo chuna tlawakgo akxni lanka kiwi stakgaku, ¿tuku nala akxni xnakgnita nawan?».
nwtsty nota xla takgalhtawakga xlakata Lu 23:31
akxni [...] kiwi stakgaku [...] akxni xnakgnita nawan: Jesús max xkakilhchanima judíos. Uma xtachuna xwanit akgatum kiwi nema kxnakgmaja pero tsinu stakgaku xwanit xlakata Jesús chu makgapitsi judíos tiku xkanajlanikgo anta xwilakgo. Pero Jesús nialh makgas x’amaka makgnikan chu judíos tiku ni xmakgxtakgkgo Dios x’amaka kalilaksakkan espíritu santo chu x’amakgo tapakgsikgo k’Israel xaʼespiritual (Ro 2:28, 29; Gál 6:16). Akxni chuna xlalh, xkachikin Israel xanin xtawi xtakanajlakan, xtachuna akgatum xaxnakgni kiwi (Mt 21:43).
(Lucas 23:33) Chu akxni chankgolh niku wanikan Aklukut, xtokgowakaka kkiwi kxpaxtunkan umakgolh kgalhananin, chatum kxpakgastakat chu achatum kxpakgxwiki.
nwtsty multimedia
Xalukut tsani nema litalakgxtokgonit kgantum clavo
Uma foto masiya la tasiya lukut xla tsani nema xlitalakgxtokgonit kgantum clavo xahierro nema 11.5 centímetros xlilhman (kaʼakxilhti mwb17.12 pág. 5). Lukut tekgska kxkilhtamaku romanos kkata 1968 akxni xkawaxmaka kxnorte Jerusalén. Uma tuku tekgskanit masiya pi max xtamaklakaskin clavos xlakata xlixtokgowakaka kkgantum kiwi akxni wi tiku xmakgnikan. Clavo max xtachuna nema maklakaskinkgolh soldados romanos akxni xtokgowakakgolh Jesús kkgantum kiwi. Xlukut tsani tekgska xpulakni akgtum osario, uma wamputun la akgtum caja xachiwix, niku xwilikanit xaskajni xlukut chatum lataman. Uma masiya pi tiku kxtokgowakakan kkgantum kiwi tlan xmaknukan.