¿Tuku kinkamasiyanikgoyan natalan tiku linkgoya kata?

Kkincongregacionkan wilakgo natalan tiku makgasata skujnimakgo Jehová. Lhuwa tuku tlan nakatsiniyaw xlakata la xlakan lipawankgonit Jehová. Tlan nakawaniyaw pi kakinkalitachuwinankgon la xwanit xkachikin Jehová makgasata chu la kamakgtayanit Jehová natayanikgo tuku tuwa. Tlan nakawaniyaw pi kaminkgolh akxni kakninaniyaw Dios kfamilia xlakata nakinkalitachuwinankgoyan tuku titaxtukgonit kxlatamatkan.

Komo wix makgasata skujnanipat Jehová, kakalitachuwinanti tiku lakgkgawasanku tuku titaxtunita. Jacob chu José kalitachuwinankgolh xkamanan tuku Jehová xtlawanit xpalakatakan (Gé 48:21, 22; 50:24, 25). Alistalh, Jehová kaskinilh natlatni pi xkalitachuwinankgolh xkamanankan tuku Jehová xtlawanit xpalakatakan (Dt 4:9, 10; Sl 78:4-7). La uku, natlatni chu amakgapitsi kstalaninanin Cristo, tlan nakalitachuwinankgo tiku lakgkgawasanku putum tuku tlan tlawanit Jehová chu la maklakaskinit xkachikin.

AKXNI AKXILHNITATA VIDEO MAKXTUM TAWILAW MASKI KINKAPUTSASTALANIKAN, KAKGALHTI UMAKGOLH TAKGALHSKININ:

• ¿La kamakgtayalh sucursal xalak Austria natalan nema xlamakgo kpaíses niku ni xmastakan talakaskin nalichuwinankan Dios?

• ¿Tuku tlawakgolh umakgolh natalan xlakata chuntiya tliwakga xkgalhikgolh xtakanajlakan?

• ¿Tuku xlakata tamakgatlinikgolh xkachikin Jehová lhuwa natalan xalak Rumania, chu tuku kamakgtayalh nataspitkgo?

• ¿La matliwakglha mintakanajla uma video?