Kakatsiniw xlakata tiku tlakg katsinikgo lichuwinankgo Dios
Natalanin tiku tlakg katsinikgo lichuwinankgo Dios lu xlakaskinka litaxtukgo. Makgapitsi lhuwata kata skujnanimakgolh Jehová. Atanu max aku liwana katsinikgonit la nalichuwinankgo Dios. Putum katsikgo pi Jesucristo pulalima congregación xaʼawatiya uma kilhtamaku chu tlawama pi tlakg natalichuwinan chu natamasiya xlakata Dios (Mat. 28:19, 20). Xlakata lhuwata kata lichuwinamakgolh Dios, kgalhikgonit «lanka litliwakga, ni kilakan, wa ntapakgsiniy Dios», chu uma kamakgtaya xlakata natayanikgo tuku tuwa titaxtukgo (2 Cor. 4:7). Xlakan lu lakgatikgo kamasiyanikgo amakgapitsin tuku katsinikgonit chu akinin litamakgtayayaw xlakata lhuwa tuku katsinikgonit (Sal. 71:18). ¿La natlawayaw?
Akxni lichuwinamaw Dios. Xlakata liwana nalichuwinankgo Dios, talakaskin pi tiku tlakg katsinikgo lichuwinankgo Dios nakamasiyanikgo xalaksasti. Lhuwa tuku katsinikan maski kaj naʼakxilha la tlawakgo tiku tlakg katsinikgo lichuwinankgo Dios. (Kaʼakxilhti xliʼakgtutu párrafo ksubtítulo «Kakamakgtaya tiku aku tsukumakgo lichuwinankgo Dios», xla artículo «La chuntiya nalipaxuwayaw akxni lichuwinanaw Dios», xla revista Makatsinina 15 xla febrero kata 2015.) ¿La makgtayanitan akxni katapina tiku tlakg katsinikgo lichuwinankgo Dios?
¿Tuku xlakata ni waniya pi kataʼan chatum tiku tlakg katsini lichuwinan Dios? Komo tatatla tala tiku tlakg katsini lichuwinan Dios, tlan nalipina tiku makgalhtawakgeya anta kxchik tala xlakata anta nakgalhtawakgayatit. Akxni nasputa takgalhtawakga, kakgalhskinti tiku tlakg katsini lichuwinan Dios la akxilhli chu kawani pi kamaxkin makgapitsi tastakyaw.
Akxtum kakatala. Kaliskujti xlakata nakalakgapasa tiku lichuwinankgo Dios. Kawani chatum pi kaʼalh akxni nakakninaniyatit Dios kfamilia chu kalakgapasti. Kakgalhskinti la katsinilh tuku xaxlikana, la sikulunatlawanit Jehová, la talakgpalitilhanit congregación lata akxni xtatayana Jehová wa chu tuku lu tlan kitaxtuninit lata tsukulh skujnani Dios. Komo tala tatatla, max tlan napina kxchik xlakata anta nakakninaniyatit Dios kfamilia.
Ni lhuwa tuku kakaskini chu kakaʼakgatekgsni. Chuna la akinin, tiku lhuwata kata lichuwinamakgolh Dios tanu tanu tuku katsinikgonit natlawakgo (Rom. 12:6-8). Xlakata makgapitsi linkgoya kata, max nialhla lhuwa kilhtamaku nakinkalimaxtunikgoyan. Maski chuna, lhuwa tuku tlan nakatsiniyaw xlakata tuku katsikgo chu la ni makgxtakgkgo Jehová.