Natlatni, kakamasiyanitit minkamanankan xlakata nakatsikgo tuku natlawakgo

Lamaw kkakilhtamaku niku masiyakan pi tuku tlan nixatlan chu tuku nixatlan tlan (Is 5:20). Lu nitlan, pero lhuwa latamanin tlawakgo tuku Jehová xkajni, uma na kilhchanima chuna la latamanin kalikatsinikgo xtachixkukan o xtapuskatkan. Tiku kataʼankgo kʼescuela o atanu latamanin max nakawanikgo kinkamanankan pi nachuna katlawakgolh tuku xlakan tlawakgo. Natlatni, ¿la tlan nakamakgtayayatit minkamanankan xlakata nakatsikgo tuku tlan natlawakgo akxni chuna natatekgskgo?

Kakamasiyanitit xlimapakgsin Jehová (Le 18:3). Chuna la nastaktilhakgo kakamasiyanitit tuku wan Biblia xlakata talakgxtumit (Dt 6:7). Kalakpuwantit: «¿Kkamasiyaninit kinkamanan asta niku xlilat wi tiku nakalimasiyani tapaxkit? ¿Katsikgo pi lu xlakaskinka liwana nalhakganankgo? ¿Akgatekgskgo pi anan tuku amakgapitsin ni xlikatsitkan o ni xliʼakxilhatkan xpalakatakan? Chu ¿katsikgo tuku xlitlawatkan komo kamasiyaniputunkan pornografía o kamatlawiputunkan tuku nitlan?». Komo katsikgo putum uma, ni katikgalhikgolh taʼakglhuwit (Pr 27:12; Ec 7:12). Akxni kamasiyaniyaw kinkamanankan, limasiyayaw pi lu xlakaskinka akxilhaw xtamaskiwin Jehová (Sl 127:3).

AKXNI AKXILHNITATA NAWAN VIDEO KATLAWAW AKGTUM CHIKI NEMA NATAYANI. KAKAKUENTAJTLAWAW KINKAMANANKAN XLAKATA NITU NAKAʼAKGSPULA, KAKGALHTI UMAKGOLH TAKGALHSKININ:

• 

  ¿Tuku xlakata makgapitsin natlatni tuwa makgkatsikgo nakalitachuwinankgo xkamanankan xlakata talakgxtumit?

• 

  ¿Tuku xlakata natlatni xkalimakgastakatkan xkamanankan «chuna la wi xtastakyaw chu xlimapakgsin Jehová»? (Ef 6:4).

• 

  ¿Tuku tamakgtay kamaxkinit xkachikin Jehová xanatlatni? (w19.05 12).

• ¿Tuku xlakata lu xlakaskinka liwana nakatachuwinankan kamanan akxni nina kgalhikgo taʼakglhuwit?