«Jehová nikxni kimpatsankganit»

Klakachilh kkata 1983. Chu ni xaktatatla, pero akxni xakkgalhi 10 kata, ktsukulh kmakgkatsi pi kimakni lu xkinkatsani. Akgtiy kata alistalh, akxni klakgawa nila xaktatsuwi. Maski lu xaktlawa litliwakga xlakata xakmatsuwilh kinchan, ni xakkgalhi litliwakga. Lata uma kilhtamaku, nialhla ktlawalh. Kintajatat na tlawalh pi nialhla xakstakli. Wa xlakata la chatum aktsu kgawasa ktasiya.

Akglhuwata papaʼ xaktalakchuwatanunit kkinchik akxni kinkalakgapaxialhnankgon chatiy lakpuskatin tiku xtatayananin Jehová xwankgonit. Ankgalhin xaktatsekga akxni wi tiku xkinkalakgapaxialhnanan, pero uma kilhtamaku kmastalh talakaskin pi umakgolh natalan xkintachuwinankgolh. Akxni xkilitachuwinamakgo Paraíso, klakapastakli pi, akxni xakkgalhi max akgkitsis kata, chatum misionero tiku xwanikan Jethro xminacha kSurinam chu akgatunu papaʼ xmin kkinkachikin xlakata nalimakgalhtawakge Biblia kintlat. Jethro lu tlan xkilikatsini chu wa xlakata tlan xkimamakgkatsini. Nachuna, kintata chu kinana lakgachunin xkilinkgo kxtamakxtumitkan xtatayananin Jehová nema xtlawakan kkinkachikin. Wa xlakata akxni Florence, chatum tala puskat tiku kinkalakgapaxialhnan uma kilhtamaku, kinkgalhskilh komo tlakg xakkatsiniputun xlakata Biblia kwanilh pi tlakg xakkatsiniputun.

Florence taspitli chu xtamin xchixku, Justus, chu tsukukgolh kilimakgalhtawakgekgo Biblia. Xlakata akxilhkgolh pi nila xakkgalhtawakga, kimasiyanikgolh nakkgalhtawakga. Alistalh, ktsukulh tlan kkgalhtawakga chu ni xaklakaskin tiku xkimakgtayalh. Akgtum kilhtamaku kiwanikgolh pi kamalakgachaka kSurinam xlakata nalichuwinankgo Dios. Lu nitlan pero niti tamakgxtakgli kʼOrealla xlakata xkilimakgalhtawakgelh Biblia. Pero lu klipaxuwalh akxni kakxilhli pi Jehová nitu xkimpatsankganit.

Ni makgas kilhtamaku kʼOrealla chilh chatum precursor tiku xwanikan Floyd. Akgtum kilhtamaku kilakgapaxialhnalh akxni xlichuwinama Dios kʼakgatunu chiki. Akxni kiwanilh komo xakmakglhtinamputulh akgtum takgalhtawakga xalak Biblia, klakalitsilh. Xla kinkgalhskilh: «¿Tuku xlakata lakalitsina?». Kwanilh pi xkilimakgalhtawakgakanita folleto ¿Tuku kinkaskiniyan Dios? chu xtsukukanit kilimakgalhtawakgekan libro El conocimiento que lleva a vida eterna.a Nachuna, kwanilh tuku xlakata nialh xkilimakgalhtawakgekan Biblia. Floyd kilimakgalhtawakgelh tuku xkintsankgani xla libro Conocimiento, pero nachuna xla malakgachaka alakatanu xlakata nalichuwinan Dios. Amakgtum, nialh kkgalhipa tiku nakimakgalhtawakge.

Pero kkata 2004 kʼOrealla chinkgolh precursores especiales tiku xkawanikan Granville chu Joshua. Xlichuwinankgo Dios kʼakgatunu chiki chu chuna kintachuwinankgolh. Akxni kinkgalhskinkgolh komo xakmakglhtinamputun takgalhtawakga xalak Biblia, klakalitsilh. Kkawanilh pi xtsukuparakgolh kilimakgalhtawakgekgo libro Conocimiento. Xakkatsiputun komo watiya tuku xkimasiyanikgolh nema xkimasiyanikgonit xapulana tiku xkimakgalhtawakgekgo. Granville kiwanilh pi kkinkachikin xtatlawama tamakxtumit. Maski liwaka akgkaw kata lata ni xaktaxtu kkinchik, xakamputun. Wa xlakata Granville limaklakaskilh akgtum silla de ruedas xlakata nakilin asta kPukgalhtawakga.

Titaxtulh kilhtamaku, Granville kimakgpuwantinilh naktitaxtu kʼEscuela Niku Masiyakan xlakata la Lichuwinankan Dios. Kiwanilh: «Xlikana pi nila tatsuwiya pero tlan chuwinana. Akgtum kilhtamaku namastaya akgtum taʼakgchuwin. Xlikana chuna natlawaya». Xtachuwin lu kimakgpuwantinilh chu lu kimatliwakglhli.

Akxtum xakan talichuwinan Dios, pero lhuwa tiji nema xʼanan kkinkachikin kalixkajni xwani chu nila xlinkan silla de ruedas. Wa xlakata kskinilh pi xkililh kʼakgtum carretilla chu lu tlan kinkakitaxtunin. Ktamunulh abril kata 2005. Alistalh, natalan tsukukgolh kimasiyanikgo la nakliskuja likgalhtawakga xalak congregación chu la limaklakaskinkan sonido xalak Pukgalhtawakga.

Lu nitlan, pero kkata 2007 kintlat nilh xlakata kbarco niku xʼan lanilh tuku nitlan. Kifamilia lu xtalipuwanikgonit. Granville akxtum xkinkatatlawayan oración chu lu tlan xkinkalimamakgkatsiniyan Biblia. Akgtiy kata alistalh, kinkaʼakgspulaparan tuku lu nitlan: Granville na nilh xlakata kbarco niku xʼan lanilh tuku nitlan.

Uma aktsu kincongregacionkan xʼakstu tamakgxtakgli, ni xʼanan kgolotsin chu kajwatiya chatum siervo ministerial tamakgxtakgli. Lu kinkatsanilh xlakata Granville nilh, xlakata xla kiʼamigo xwanit tiku lu xakpaxki chu ankgalhin xkimakgtaya xlakata kintakanajla chu tuku xakmaklakaskin. Xapulana tamakxtumit nema kkgalhiw akxni xninita, kilakgchalh naklikgalhtawakga párrafos kTakgalhtawakga xla Makatsinina. Tlan klikgalhtawakgalh xapulana akgtiy párrafos, pero alistalh ktsukulh ktasa. Alistalh ktaktalh kplataforma xlakata nila xakmachokgo la xaktasama.

Tlakg tlan ktsukulh kmakgkatsi akxni makgapitsin natalan xalak atanu congregación minkgolh makgtayanankgo kʼOrealla. Nachuna, sucursal malakgachalh chatum precursor especial tiku xwanikan Kojo. Lu klipaxuwalh akxni kinatlatni chu kintala tsukukgolh likgalhtawakgakgo Biblia chu tamunukgolh. Papaʼ marzo kkata 2015, siervo ministerial kilimaxtuka. Chu ni makgas kmastalh xapulana kintaʼakgchuwin. Uma kilhtamaku klakalitsilh chu ktasalh akxni klakapastakli tuku xkiwaninit Granville: «Akgtum kilhtamaku namastaya akgtum taʼakgchuwin. Xlikana chuna natlawaya».

Xlakata programas xla JW Broadcasting^®, kkalakgapasnit natalan tiku nachuna tatakgskgo la akit. Maski wi tuku nila tlawakgo, chuntiya skujnanimakgo Dios chu paxuwakgo. Akit na wi tuku tlan ktlawa. Xlakata kmaxkiputun Jehová putum tuku kilitliwakga kimaxki talakaskin naktlawa, kimakgpuwantinit naktsuku skuja la precursor regular. Chu lu kaks klilakawa akxni kkata 2019 kilakgayawaka taskujut xlakata kgolotsin naklitaxtu kkincongregación niku anan tipuxam tiku lichuwinankgo Dios.

Lu kkapaxtikatsini natalan tiku kimasiyanikgolh xaxlikana chu kimakgtayakgonit nakskujnani Jehová. Pero liwaka kpaxtikatsini Jehová xlakata nikxni kimpatsankganit.