Kkgalhilh litliwakga maski xakxlajwanama

Akxni klakapastaka akxni aktsujku xakwanit, min kkintalakapastakni la lu xatapaxuwan xakkatawi kinatlatni kʼakgtum chiki ksur xla Francia. Kintlat kintlawanilh akgtum litastiwitni chu lu xaklakgati xakkgosnan kjardín. Kata 1966 xtatayananin Jehová kinkalakgapaxialhnankgon. Kintlat makglhuwa katachuwinalh chu akxni titaxtulh akgtujun papaʼ xtatayana Jehová wa. Kintse na xtatayana Jehová wa. Wa xlakata kstakli kʼakgtum familia niku xʼanan tapaxkit.

Ktaspitwi kʼEspaña xlakata kinatlatni anta xalanin. Ktsukulh tatatla akxni aku xakchanitaw. Ktsukulh tupixkatsan chu kmakakatsan. Akgtiy kata xakkalakganitaw makuchinanin, ktekgswi chatum reumatólogo tiku lakatanks kinkawanin: «Nialhla tuku tlawakan». Kintse tsukulh tasa. Chu tsukulh takgaxmata tachuwin kcuarto niku lu makgalipuwanan nema xwan pi «tajatat nikxni xʼama tapanu» xwanikan «poliartritis infantil».a Maski kajku akgkaw kata xakkgalhi chu ni liwana kʼakgatekgsli xakkatsi pi nitlan tuku xkawanikanit.

Doctor wa pi xkilinka niku xkakuentajtlawakan kamanan tiku xkgalhikgo uma tajatat. Akxni kchalh kʼuma chiki nema lu xmakgalipuwanan kmakgkatsilh pi xakama niy. Xtalakaskin pi liwana xaktlawaw tuku xkinkawanikanan. Monjas kinchukunikgolh kinchixit chu kimaxkikgolh ni stlan uniforme. Xaktasa chu xaklakapastaka: «¿La tlan naktayani unu?»

KMAKGKATSILH PI JEHOVÁ XLIKANA LAMA

Xlakata kinatlatni xkimasiyanikgonit nakskujnani Jehová, ni xaktlawa talismanin xla takanajla nema xtlawakgo, pero monjas nila xʼakgatekgskgo. Xaktasaskini Jehová pi ni xkimakgxtakgli, chu xakmakgkatsi la xkimakgtaya. Xtachuna la xʼakgpixtin chatum tlat xapaxkina.

Xmastakan talakaskin pi familias tlan xʼankgolh tsinu kilhtamaku chu kinatlatni xkilinikgo likgalhtawakga xlakata ni xtaxlajwanilh kintakanajla. Maski monjas ni xmastakgo talakaskin pi laktsukamanan xkgalhikgolh xlibroskan, pero kaj akit kimaxkika talakaskin xakkgalhilh libros. Na xakkgalhi maktum Biblia nema chali chali xaklikgalhtawakga. Nachuna, xakkalitachuwinan amakgapitsin laktsuman takgalhkgalhin nema xakkgalhi, pi putum kilhtamaku nalatamayaw kparaíso kKatiyatni niku nialhti katitatatlalh (Apocalipsis [Revelación] 21:3, 4). Maski xakmakgkatsi pi kiʼakstu xakwi chu xaklipuwan, kintakanajla chuntiya xtatliwakglhma.

Titaxtulh akgchaxan papaʼ, makuchinanin kimalakgakgolh kkinchik. Kintajatat ni sputli pero xakpaxuwa xlakata kkalakgtaspitli kinatlatni. Niku tatastuknit kilukut tlakg xtalakgalhitilhama chu tlakg xkinkatsani. Maski ni xakkgalhi litliwakga ktamunulh akxni akgkutati kata xakkgalhi, klaksakli nakskujnani Jehová xliputum kilitliwakga. Pero lakgachunin xakmakgkatsi pi ni xkimakgtaya. Xakwani kintlat xalak akgapun: «¿Tuku xlakata akit? ¡Katlawa litlan kakimapaksa! ¿Ni akxilha pi lu kpatinama?»

Lu tuwa ktitaxtulh akxni kajku tsumat xakwanit. Maski liwana kkatsilh pi nialh xakama paksa, putum kilhtamaku xakkatatalakxtumi kiʼamigas tiku ni xtatatlakgo chu lakgtliwakga xwankgonit. Lu nitlan xaklimakgkatsi chu nialh lu xakchuwinan. Maski chuna, kifamilia chu kiʼamigos putum kilhtamaku kimakgtayakgolh. Xatapaxuwan klakapastaka kiʼamiga Alicia tiku xkimpulani akgpuxam kata. Kimakgtayalh xlakata ni kaj kintajatat xaklakapastakli chu xakkamakgtayaputulh amakgapitsin.

KTEKGSLI LA XATAPAXUWAN NAKLATAMA

Akxni xakkgalhi akgkutsayan kata lu ktatatlapa asta tuwa xakmakgkatsi xakan ktamakxtumit. Pero liwana xakmaklakaskin kinkilhtamaku akxni xaktamakgxtakga kkinchik xlakata liwana xaklikgalhtawakgalh Biblia. Libro xla Job chu Salmo kimakgatekgsnikgolh pi la uku Jehová wa tlakg kuentajtlawa kintakanajlakan. Xlakata putum kilhtamaku xaktlawani oración Jehová kimaxkilh «lanka litliwakga, ni kilakan, wa ntapakgsiniy Dios» chu «xtatanksni Dios, wa ntu lakatsalaniy xlipaks kintapuwankan» (2 Corintios 4:7; Filipenses 4:6, 7).

Akxni kkgalhilh 22 kata ktsukulh maklakaskin silla de ruedas. Xaklakpuwan pi latamanin kajwatiya xʼamakgo kiʼakxilhkgo la chatum tiku wi ksilla de rueda chu xatatatla. Pero uma tlawalh pi nialh xakkaskinilh tamakgtay amakgapitsin chu «tuku nitlan» akgtum tasikulunalin litaxtulh. Kiʼamiga tiku wanikan Isabel kiwanilh pi akgtum papaʼ xakalh talichuwinan xtachuwin Dios xlakata xakmakgatsilh 60 horas.

Pulana, klakpuwa pi uma lu tuwa, pero kskinilh xtamakgtay Jehová, chu xlakata kifamilia chu kiʼamigos kimakgtayakgolh, tlan kmakgantaxtilh. Uma papaʼ nema lu lhuwa taskujut kkgalhilh lakapala titaxtulh chu tlan kmakgatlajalh kintapekua chu nialh kmaxanalh. Lu tlan klimakgkatsilh, wa xlakata kata 1996 klakpuwa pi precursora regular nakwan, wamputun, watiya horas xakmastalh akgatunu papaʼ. Wa uma tuku tlakg tlan ktlawalh kilatamat, tlakg ktalakatsuwinilh Dios chu tlakg ktatliwakglhli. Nachuna, kkalitachuwinanit amakgapitsi tuku kkanajla chu kkamakgtayanit xlakata xʼamigo Dios nawankgo.

JEHOVÁ NI KIMAKGXTAKGNIT

Verano kata 2001 kchokarlalh chu ktalaktukxli. Akxni xakwi khospital lu xkinkatsani, tsekg ktlawanilh oración Jehová: «¡Katlawa litlan Jehová, ni kakimakgxtakgti!». Akxni xaktlawama oración, chatum puskat tiku lakatsu xwi kinkgalhskilh: «¿Wix xtatayana Jehová?». Ni xakkgalhi litliwakga xlakata nakkgalhti, kaj kmatsuwilh kiʼakgxakga. Puskat kinkgalhtilh: «¡Akit kkalakgapasan! Klikgalhtawakga mi revistaskan». Lu kimatliwakglhli xtachuwin. Maski lu nitlan xakwi tlan xakmalanki Jehová. ¡Lu lanka talakgalhaman!

Akxni tlakg tlan kmakgkatsilh, tlakg ktsukulh klichuwinan Dios khospital. Maski xkiwilinikanit yeso kintse xkilin ksilla de rueda. Chali chali xakkalakgapaxialhnan makgapitsi tiku xtatatlakgo, xakkakgalhskinaw la xwilakgolh chu xakkamakgxtakgniyaw makgapitsi likgalhtawakga. Lu xaktlakgwan pero Jehová xkimatliwakglha.

Umakgolh awatiya kata, tlakg taliwakanit kintakatsanajwat chu xlakata nilh kintlat tlakg taliwakalh kintapatin. Pero, kliskuja xlakata nakkgalhi tlan talakapastakni. ¿La ktlawa? Akxni kmatlani, kkatatawila kiʼamigos, chu kifamilia chu uma kimakgtaya xlakata ni lu naklakapastaka tuku ktitaxtuma. Akxni kiʼakstu kwi, kkgalhtawakga, klikgalhtawakga Biblia chu klichuwinan Dios kteléfono.

Nachuna, klakputsa tuku nakimakgapaxuwa, akxni kilakgasnokga un chu la takgankgawanan xanat. Uma tlawa pi nakpaxtikatsini Dios. Na lu kimakgtaya akxni wi tuku klilitsin. Akgtum kilhtamaku akxni xaklichuwinamaw Dios, kiʼamiga tiku xkilima kisilla de ruedas tachokgolh xlakata wi tuku xʼama tsokga. Kimakgxtakgli niku ni kaxtum chu ktaʼalh kisilla de ruedas chu ktatawakacha niku xwi putlaw. ¡Lu kpekuaw! Pero akxni kakxilhwi pi nitu kiʼakgspulalh ktsukuw lilitsinaw.

Lhuwa tuku nila ktlawa kkilatamat; wantuku alistalh tlan naktlawa. Ktalakgatsi chu kmalaki la akgtum «ventana» niku kakxilha xasasti kakilhtamaku nema nalimin Dios (2 Pedro 3:13). Klakpuwan pi ni ktatatla, ktlawama, chu lu klipaxuwa kilatamat. Lakgchalh kinaku xtachuwin mapakgsina David nema wan: «¡Kalipawanti kintikukan Dios! ¡Katatliwekglhti y katakamajli [o tliwakglh katawi] minakuj!» (Salmo 27:14.) Maski tlakg ktaxlajwanitilhama, pero Jehová chali chali kimaxkitilha litliwakga. Xlikana, kkgalhilh litliwakga maski xakxlajwanama.