Jehová xlikana akgtum paraíso natlawa Katiyatni

1. ¿Tuku kamakatsinilh palakachuwina Isaías israelitas?

PALAKACHUWINA Isaías limapakuwilh Jehová «Dios tiku wan tuku xaxlikana». Tachuwin xaʼhebreo nema maklakaskinkan unu «xaxlikana» kilhchanima «amén» (Is. 65:16; nota). Chu amén kilhchanima «chuna kalalh» o «xlikana nakgantaxtu». Anta kBiblia makglhuwa maklakaskinkan tachuwin amén xlakata nalimasiyakan pi tuku Jehová chu Jesús wankgo o tlawakgo xaxlikana. Wa xlakata, tuku palakachuwina Isaías kamakatsinilh israelitas ni tuwa xtaʼakgatekgsa: tuku Jehová wan pi nala ankgalhin kgantaxtu. Jehová limasiyanit pi uma xlikana xlakata makgantaxtinit putum tuku malaknunit.

2. 1) ¿Tuku xlakata tlan nalipawanaw tuku malaknunit Jehová natlawa kkilhtamaku nema aku mima? 2) ¿Tuku takgalhskinin nakgalhtiyaw kʼuma artículo?

² ¿Chu akinin? ¿Tlan nalipawanaw tuku Jehová malaknunit natlawa kkilhtamaku nema aku mima? Akxni max xtitaxtunita 800 kata lata latamalh palakachuwina Isaías, apóstol Pablo lichuwinalh tuku xlakata tlan nalipawanaw pi tuku Jehová malaknunit namakgantaxti. Pablo wa: «Dios nila akgsaninan» (Heb. 6:18). ¿Ni xlikana pi kʼakgtum taxtunu o niku musnan nila taxtu xasakgsi chuchut chu xaskgokgo chuchut? Xtachuna la uma, Jehová, tiku ankgalhin wan tuku xaxlikana, nila wan taʼakgsanin. Wa xlakata tlan nalipawanaw putum tuku wan, chu tlan nalipawanaw tuku wanit pi natlawa kkilhtamaku nema aku mima. Kʼuma artículo nakgalhtiyaw umakgolh takgalhskinin: ¿tuku malaknunit natlawa Jehová kkilhtamaku nema aku mima? chu ¿tuku xlakata tlan nalipawanaw pi nakgantaxtu xtamalaknun?

¿TUKU MALAKNUNIT JEHOVÁ?

3. 1) ¿Tuku tamalaknun lu xlakaskinka liʼakxilhaw? (Apocalipsis 21:​3, 4). 2) ¿Tuku wankgo makgapitsi latamanin akxni kgaxmatkgo uma tamalaknun?

³ Xlakskujnin Dios kxlikalanka katiyatni lu xlakaskinka liʼakxilhkgo tamalaknun nema nalichuwinanaw la uku (kalikgalhtawakga Apocalipsis 21:​3, 4). Jehová malaknu pi «nialhti katinilh, nialhti katilipuwa, nialhti katitasalh, nialhti katikatsanajwalh». Akxni lichuwinanaw Dios lu limaklakaskinaw uma texto xlakata tlan nakamamakgkatsiniyaw latamanin chu nakalitachuwinanaw la nawan latamat kParaíso. ¿Tuku wankgo makgapitsin latamanin akxni kgaxmatkgo uma tamalaknun? Wi tiku wan: «Lu tlan takgaxmata, pero ni xkatsi komo xlikana nakgantaxtu».

4. 1) ¿Tuku pulaktiy xkatsi Jehová pi xʼama la? 2) ¿Tuku xlakata tlan nalipawanaw xtamalaknun Jehová?

⁴ Akxni Jehová malakpuwanilh apóstol Juan pi xtsokgwililh tamalaknun xlakata Paraíso, xkatsi pi xʼamaw maklakaskinaw uma tamalaknun la uku xlakata xkalitachuwinaw latamanin xtachuwin. Na xkatsi pi lhuwa latamanin tuwa xʼamakgo makgkatsikgo nakanajlakgo «tuku xasasti» ama tlawa (Is. 42:9; 60:2; 2 Cor. 4:​3, 4). Wa xlakata, ¿la tlan nakamakgtayayaw amakgapitsin nakanajlakgo pi tasikulunalin nema lichuwinan Apocalipsis 21:​3, 4 xlikana nakgantaxtu? ¿Chu tuku tlan natlawayaw xlakata tlakg nalipawanaw Jehová chu pi nakgantaxtu tuku malaknunit? Jehová ni kajwatiya kinkatlawaniyan uma lu stlan tamalaknun, wata na wi tuku limasiya pi tlan nalipawanaw. ¿Tuku uma?

JEHOVÁ LIMASIYA PI NAMAKGANTAXTI XTAMALAKNUN

5. ¿Tuku textos kinkamakgtayayan nalipawanaw pi Jehová namakgantaxti xtamalaknun, chu tuku wankgo umakgolh textos?

⁵ Kaʼakxilhwi versículos nema stala nema nakinkamakgtayayan nalipawanaw pi Jehová namakgantaxti tuku malaknunit xlakata Paraíso. Uma texto wan: «Tiku xwi kpumapakgsin wa: “¡Kaʼakxilhti! Kmasastima putum tuku anan”. Chu wampa: “Katsokgwili uma, xlakata umakgolh tachuwin tlan lipawankan chu xaxlikana”. Chu kiwanilh: “¡Kgantaxtukgonita! Akit Kilhtsukut chu Lisputni”» (Apoc. 21:​5, 6a).

6. ¿Tuku xlakata Apocalipsis 21:​5, 6 kinkamakgtayayan tlakg nalipawanaw pi Jehová namakgantaxti xtamalaknun?

⁶ ¿Tuku xlakata umakgolh tachuwin kinkamakgtayayan nalipawanaw pi Jehová namakgantaxti xtamalaknun? Libro Apocalipsisb lichuwinan xlakata umakgolh versículos: «Xtachuna la komo Jehová xfirmarlilh maktum kapsnat niku xkalitayanilh latamanin tiku ni makgxtakgkgo pi xlikana namakgantaxti umakgolh tasikulunalin kkilhtamaku nema aku mima». Anta kʼApocalipsis 21:​3, 4 tekgsaw xtamalaknun Jehová, chu alistalh kversículos 5 chu 6, Jehová litaya pi namakgantaxti xtamalaknun. La uku kalichuwinaw makgapitsi tachuwin nema maklakaskin Jehová xlakata nalimasiya pi namakgantaxti xtamalaknun.

7. ¿Tiku tsuku chuwinan kversículo 5, chu tuku xlakata lu xlakaskinka uma?

⁷ Pulaktum tuku limasiya pi Jehová namakgantaxti xtamalaknun, wa umakgolh tachuwin: «Tiku xwi kpumapakgsin wa» (Apoc. 21:5a). Umakgolh tachuwin lu xlakaskinka xlakata maklakaskinkan makgtum lata xlimakgtutu chuwinan Jehová klibro xla Apocalipsis. Wa xlakata, wa Jehová tiku litayama pi namakgantaxti xtamalaknun, ni chatum ángel, nipara wa Jesús. Uma kinkamakgtayayan tlakg nalipawanaw tuku wan alistalh, xlakata Jehová «nila akgsaninan» (Tito 1:2). Xlikana pi tlan nalipawanaw tuku wan Apocalipsis 21:​5, 6.

«¡KAʼAKXILHTI! KMASASTIMA PUTUM TUKU ANAN»

8. ¿Tuku wan Jehová nema limasiya pi namakgantaxti xtamalaknun? (Isaías 46:10).

⁸ La uku kalichuwinaw tachuwin «¡Kaʼakxilhti!» (Apoc. 21:5). Tachuwin xagriego nema matitaxtikan «¡Kaʼakxilhti!» makglhuwa tatsokgtawilanit kʼApocalipsis. Maktum libro wan pi uma tachuwin «maklakaskinkan xlakata tiku kgalhtawakgama kuenta natlawa tuku aku amaka wankan». ¿Chu tuku aku nawan Dios? Xla wan: «Kmasastima putum tuku anan». Maski Jehová lichuwinama tuku natlawa kkilhtamaku nema aku mima, liwana katsi pi uma tamalaknun xlikana nakgantaxtu chu wa xlakata chuwinan xtachuna la komo tlawamaja (kalikgalhtawakga Isaías 46:10).

9. 1) ¿Tuku kinkamalakpuwaniyan pi natlawa Jehová akxni maklakaskin tachuwin «kmasastima putum tuku anan»? 2) ¿Tuku nakaʼakgspula «akgapun» chu «katiyatni» nema anankgo la uku?

⁹ Kalichuwinaw atanu tuku wan Apocalipsis 21:5: «Kmasastima putum tuku anan». Kʼuma capítulo xalak Biblia, uma tachuwin kinkamalakpuwaniyan pulaktiy tuku natlawa Jehová: wi tuku nawili xlakgxokgo chu wi tuku nalakkaxtlawa. Pulana kalichuwinaw tuku namasputu chu nawili xlakgxokgo. Apocalipsis 21:1 wan: «Xapulana akgapun chu xapulana katiyatni xlakgsputkgonit». «Xapulana akgapun» kakilhchanima mapakgsinanin nema kaʼakgchipanit Satanás chu xdemonios (Mat. 4:​8, 9; 1 Juan 5:19). Anta kBiblia, tachuwin katiyatni min kilhtamaku kakilhchani latamanin (Gén. 11:1; Sal. 96:1). Wa xlakata, «xapulana katiyatni» kakilhchanima latamanin xala uku tiku lixkajni likatsikgo. Uma wamputun pi Jehová ni kaj wi tuku tsinu katilakkaxtlawanilh «akgapun» chu «katiyatni», wata makgtuminika nakamasputu chu nawili xlakgxokgo «akgtum xasasti akgapun chu akgtum xasasti katiyatni», uma wamputun pi nawili xasasti tamapakgsin chu kajwatiya nalatamakgo tiku xaʼakgstitum likatsikgo.

10. ¿Tuku atanu kilhchanima pi Jehová namasasti «putum tuku anan»?

¹⁰ ¿Tuku atanu namasasti Jehová? (Apoc. 21:5). Jehová nalakkaxtlawa Katiyatni chu nakamakgtaya latamanin xlakata nialh nakgalhikgo talakgalhin. Chuna la lichuwinalh palakachuwina Isaías, putuminika Katiyatni akgtum Paraíso nawan chu lu stlan natasiya, chuna la xtasiya jardín xaʼEdén. Akinin na nakinkamasastikanan o nakinkalakkaxtlawakanan kinchatunukan. Jehová nakamapaksa tiku nila tlawankgo, tiku nila akxilhkgo, tiku nila kgaxmatkgo, chu asta nakamalakastakwani tiku nikgonita (Is. 25:8; 35:​1-7).

«UMAKGOLH TACHUWIN TLAN LIPAWANKAN CHU XAXLIKANA» CHU «¡KGANTAXTUKGONITA!»

11. ¿Tuku limapakgsilh Jehová Juan, chu tuku xlakata?

¹¹ ¿Tuku atanu limasiya pi Jehová namakgantaxti xtachuwin? Jehová wanilh Juan: «Katsokgwili uma, xlakata umakgolh tachuwin tlan lipawankan chu xaxlikana» (Apoc. 21:5). Jehová ni kajwatiya skinilh Juan pi xtsokgwililh xtachuwin, wata wanilh tuku xlakata chuna xlitlawat xwanit. Wanilh: «Xlakata umakgolh tachuwin tlan lipawankan chu xaxlikana», uma kilhchanima xtachuwin Dios. ¡Lu tlan pi Juan kgalhakgaxmatli Jehová chu tsokgwililh xtachuwin! Xlakata chuna tlawalh, akinin tlan likgalhtawakgayaw xtamalaknun Dios xlakata Paraíso chu tlan lilakpuwanaw tasikulunalin nema nakgalhiyaw kkilhtamaku nema aku mima.

12. ¿Tuku xlakata Jehová tlan wan «¡Kgantaxtukgonita!»?

¹² ¿Tuku wan Jehová alistalh? «¡Kgantaxtukgonita!» (Apoc. 21:6). Jehová lichuwinan uma xtachuna la komo kgantaxtukgonita putum tuku malaknunit xlakata Paraíso. Chu chuna tlawa xlakata ni anan tuku natlawa pi ni namakgantaxti xtalakaskin. ¿Tuku wan Jehová alistalh xlakata tlakg nalimasiya pi namakgantaxti xtamalaknun?

«AKIT KILHTSUKUT CHU LISPUTNI»

13. ¿Tuku xlakata Jehová tlan wan pi wa «Kilhtsukut chu Lisputni»?

¹³ Chuna la lichuwinawa, Jehová makgtutu chuwinalh klibro xla Apocalipsis (Apoc. 1:8; 21:​5, 6; 22:13). Chu makgtutu Jehová wa: «Akit Kilhtsukut (Alfa, nota) chu Lisputni (Omega, nota)». Alfa wa xapulana letra xla alfabeto griego, chu omega, wa xaʼawatiya. Akxni Jehová xʼakstu tapakuwi «Kilhtsukut chu Lisputni», kinkamaʼakgatekgsniputunan pi akxni wi tuku matsuki, ankgalhin masputu.

14. 1) Kalichuwinanti tuku kilhtamaku matsukilh Jehová xtalakaskin chu tuku kilhtamaku namasputu. 2) ¿Tuku lichuwinan Génesis 2:​1-3 nema limasiya pi Jehová namakgantaxti xtamalaknun?

¹⁴ Akxni Jehová xkamalakatsukinita Adán chu Eva, kawanilh tuku xpalakata xkatlawanit latamanin chu Katiyatni. Biblia wan: «Dios kasikulunatlawalh chu kawanilh: “Kakgalhitit lhuwa kamanan, kalhuwantit, kamalakgatsamatit katiyatni chu kakuentajtlawatit”» (Gén. 1:28). Akxni Jehová lichuwinalh tuku xlakpuwanit natlawa xpalakata latamanin chu Katiyatni tsukulh tuku xlakkaxwilinit (Alfa). Akxni nakgantaxtukgo tuku Jehová xlakkaxwilinit chu xkamanan Adán chu Eva tiku nakgalhakgaxmatnankgo namalakgatsamakgo Katiyatni chu akgtum Paraíso natlawakgo, uma kilhtamaku naʼakgasputa tuku Jehová lakkaxwilinit (Omega). Akxni Jehová tlawakgolh «akgapun, katiyatni chu putum tuku anan anta», tlawalh pulaktum tuku limasiyalh pi xʼama makgantaxti xtalakaskin. ¿Tuku tlawalh? Xasanto limaxtulh xliʼakgtujun kilhtamaku (kalikgalhtawakga Génesis 2:​1-3). ¿Tuku wamputun uma? Pi Jehová limaklakaskima xliʼakgtujun kilhtamaku xlakata namakgantaxti tuku xlakpuwanit xpalakata latamanin chu Katiyatni. Akxni naʼakgasputa uma xliʼakgtujun kilhtamaku kgantaxtunita nawan xtalakaskin.

15. ¿Tuku xlakata xtasiya pi Jehová max nialhla xmakgantaxtilh xtalakaskin?

¹⁵ Akxni Adán chu Eva nialh kgalhakgaxmatkgolh Dios, makglakgalhinanin litaxtukgolh chu kamatitaxtinikgolh xkamanankan talakgalhin chu linin (Rom. 5:12). ¿Xʼama laktlawa uma tuku Dios xlakpuwanit? ¿Nialh xʼama litatsama Katiyatni latamanin tiku ni xkgalhikgolh talakgalhin? ¿Nila xʼama maʼakgasputu Jehová tuku xlakkaxwilinit kaj xlakata xkuenta Satanás? Chuna xtasiya. Max Akgskgawini xlakpuwanit pi Jehová nialhla lhuwa tuku xtlawalh. Akgtum liʼakxilhtit, tlan xtikamalakgsputulh Adán chu Eva chu xkatlawalh atanu latamanin xlakata xmakgantaxtilh xtalakaskin. Pero komo Jehová chuna xtitlawalh, Akgskgawini xlimawakalh Dios pi xaʼakgsanina. ¿Tuku xlakata? Xlakata kʼGénesis 1:​28, Jehová xwanit pi wa xkamanankan Adán chu Eva xʼamakgo malakgatsamakgo Katiyatni.

16. ¿Tuku xlakata Satanás max lakpuwa pi tlan xlimawakalh Jehová pi ni makgantaxti tuku wan?

¹⁶ ¿Tuku atanu max xlakpuwanit Akgskgawini? Max lakpuwa pi Jehová xʼama masta talakaskin pi Adán chu Eva xkgalhikgolh kamanan, pero umakgolh kamanan putum kilhtamaku xʼamakgo kgalhikgo talakgalhin (Ecl. 7:20; Rom. 3:23). Komo chuna xtilalh, Satanás tlan xlimawakalh Jehová pi ni makgantaxti tuku wan. ¿Tuku xlakata? Xlakata Jehová nila xmakgantaxtilh tuku xlakpuwanit, pi Katiyatni xlitatsamalh latamanin tiku ni kgalhikgo talakgalhin.

17. ¿Tuku tlawalh Jehová xlakata xlakkaxtlawalh tuku limawakakgolh Satanás chu xapulana latamanin, chu la nakiʼakgasputa uma? (Na kaʼakxilhti dibujo).

¹⁷ Satanás lu kaks lilakawa chuna la Jehová lakkaxtlawalh tuku xla chu xapulana latamanin limawakakgolh (Sal. 92:5). Akxni Jehová mastalh talakaskin pi Adán chu Eva xkgalhikgolh kamanan, limasiyalh pi ni xaʼakgsanina, wata putum kilhtamaku makgantaxti xtachuwin. Na limasiyalh pi ni anan tuku nalaktlawa tuku xla lakpuwanit. ¿La tlawalh? Lakkaxwililh pi xtawi «xkam» puskat nema xkalakgmaxtulh xkamanankan Adán chu Eva tiku xkgalhakgaxmatnankgolh, chu chuna xkgantaxtulh tuku xlakpuwanit (Gén. 3:15; 22:18). Satanás nikxni lakpuwa pi Jehová xʼama maklakaskin xtamakamastan xKgawasa xlakata nakalakgmaxtu latamanin. ¿Tuku xlakata? Xlakata talakgmaxtut limasiya la xlilhuwa kinkapaxkiyan Jehová (Mat. 20:28; Juan 3:16). Pero xlakata Satanás kaj xʼakstu paxkikan, nila limasiya uma tapaxkit. Wa xlakata, ¿tuku kitaxtulh xlakata Jehová mastalh talakgmaxtut? Akxni naʼakgasputa 1,000 kata, xkamanan Adán tiku nakgalhakgaxmatnankgo chu nialh nakgalhikgo talakgalhin, nalatamakgo kKatiyatni akxni akgtum Paraíso nawan chuna la Jehová xlakaskin lata xapulana. Ama kilhtamaku, naʼakgasputa tuku Jehová xlakkaxwilinit (Omega).

¿TUKU NAKINKAMAKGTAYAYAN TLAKG NALIPAWANAW PI JEHOVÁ NALIMIN PARAÍSO?

18. ¿Tuku pulaktutu kinkalimasiyaniyan Jehová pi namakgantaxti xtamalaknun? (Na kaʼakxilhti recuadro «Pulaktutu tuku xlakata tlan nalipawanaw xtamalaknun Jehová»).

¹⁸ Kʼuma artículo lichuwinanitaw makgapitsi tuku kinkamakgtayayan nakanajlayaw pi Katiyatni akgtum Paraíso nawan. ¿Tuku tlan nakawaniyaw amakgapitsin xlakata nakalimasiyaniyaw pi Dios namakgantaxti xtamalaknun? Pulana, pi wa Jehová tiku tlawanit uma tamalaknun. Apocalipsis wan: «Tiku xwi kpumapakgsin wa: “¡Kaʼakxilhti! Kmasastima putum tuku anan”». Xla makgantaxtiputun xtamalaknun chu kgalhi liskgalala chu litliwakga xlakata chuna natlawa. Xlipulaktiy, pi Jehová liwana katsi pi nakgantaxtu xtamalaknun chu wa xlakata akxni lichuwinan, lichuwinan xtachuna la komo kgantaxtunita. Wa xlakata wan: «Umakgolh tachuwin tlan lipawankan chu xaxlikana». Chu wampara: «¡Kgantaxtukgonita!». Xlipulaktutu, pi akxni Jehová wi tuku matsuki ankgalhin masputu. Tachuwin «Akit Kilhtsukut chu Lisputni» chuna limasiya. Jehová nalimasiya pi Satanás chatum akgsanina chu nila makgantaxti tuku litaya.

19. ¿Tuku tlan xtlawa komo chatum lataman tuwa makgkatsi nakanajla pi Katiyatni akgtum Paraíso nawan?

¹⁹ Kalakapastakti pi akxni wi tiku litachuwinana pi Dios namakgantaxti xtamalaknun namakgtayayan tlakg nalipawana uma tamalaknun. Wa xlakata, komo akxni nalikgalhtawakganiya chatum lataman tuku wan Apocalipsis 21:​4, nawaniyan: «Lu tlan takgaxmata pero ni xkatsi komo nakgantaxtu», ¿tuku tlan xtlawa? Pulaktum tuku tlan natlawaya wa pi nalikgalhtawakganiya chu nalitachuwinana versículos 5 chu 6. Kamasiyani tiku tachuwinampat pi Jehová liwana limasiyanit pi nakgantaxtu xtamalaknun. Xtachuna la komo firmarlinit maktum kapsnat niku litayanit pi chuna natlawa (Is. 65:16).