Hulda makgantaxti tuku xlakpuwanit

KOMO wix xtilakgapaxialhnanti Isla Sangir Besar (Indonesia) max xkatatanokglhti kgalhtutu natalan lakpuskatin kplaya. Nina lhuwa kata titaxtunit xlakan anta akxtum xlatapulikgo. Maski umakgolh natalan kalilakgapaskan xlakata kamakgtayakgo latamanin naʼakgatekgskgo tuku masiya Biblia, akxni x’ankgo kplaya ni kaj xʼankgo lichuwinankgo Dios. ¿Tuku xtlawakgo anta?

Pulana, umakgolh natalan xtajukgo kpupunu xlakata xputsakgo laklanka chiwix nema max xtachuna xlilaklanka xwankgonit la akgtum pelota xla futbol, xkukalinkgo asta kxkilhtun pupunu. Alistalh xtawilakgo klaktsu silla xakiwi chu akgtum martillo xlilakgpakglhkgo chiwix asta akxni laktsu laktsu xtlawakgo. Alistalh, xmujukgo chiwix kkgaxi chu xtawakakgo kʼescaleras xlakata nalinkgo kxchikkan. Xmujutilhakgo umakgolh chiwix klaklanka kuxtalh, alistalh laklanka putlaw xminkgo tiyakgo umakgolh kuxtalh chu xlimaklakaskinkgo chiwix xlakata natlawakgo carreteras.

Chatum uma tala wanikan Hulda. Xla tlan tlakg lhuwa kilhtamaku kskuja kxkilhtun pupunu. Tumin nema kxokgonikan akxni ksta chiwix xlimakgtaya xfamilia. Pero ama kilhtamaku xla xmaklakaskimputun xtumin xlakata wi tuku xtamawalh: maktum tableta xlakata tlan xmaktilh aplicación JW Library^®. Hulda xkatsi pi videos chu tuku min kʼaplicación xʼama makgtaya xlakata tlakg tlan xlichuwinalh Dios chu tlakg liwana xʼakgatekgsli tuku masiya Biblia.

Akgtum papa’ aitat, Hulda skujli akgtiy hora akgatunu tsisa. Chiwix nema mastokgli tlan litatsamalh akgtum aktsu putlaw. ¡Chu chuna maʼakchanilh tumin xlakata tlan xtamawalh xtableta!

Hulda wan: «Xlikana pi lu xaktlakgwanit chu xakkatsanajwama xlakata klakgpakglhwililh chiwix. Pero akxni kkgalhilh kintableta kakxilhli pi tlan xakmaklakaskilh xlakata tlakg tlan xaklichuwinalh Dios chu tlakg lakapala xaklakkaxwililh tuku xʼamaka akxilhkan ktamakxtumit chu uma kimakgtayalh nakpatsankga kintakatsanajwat». Hulda na wan pi xtableta lu makgtayalh akxni aku xtsukuma pandemia, akxni putuminika taskujut nema xtlawayaw kcongregación tsukuw tlawayaw kvideoconferencia. ¡Lu lipaxuwayaw pi Hulda makgantaxtilh tuku xlakkaxwilinit!