Akxni nina kgalhtawakgaya, ¿tuku pulana militlawat?

Akxni likgalhtawakgayaw Biblia, lakaskinaw pi tuku katsinimaw xlakata Jehová nalakgpali tuku lakpuwanaw, tuku makgkatsiyaw chu tuku tlawaputunaw. Lu tlan nakitaxtu komo nastalaniyaw xliʼakxilhtit Esdras. Xla «lakkaxwililh xnaku xlakata nalakputsanani xLimapakgsin Jehová» (Esd. 7:10). ¿La tlan nachuna natlawaya?

Katlawa oración. Akxni nakgalhtawakgaya, pulana katlawa oración. Kaskini Jehová pi kamakgtayan naʼakgatekgsa chu nalilatapaya tuku nakatsiniya (Sal. 119:​18, 34).

Kataktuju. Dios kamatsekgni xaxlikana tiku laktlankajwa chu lipawankgo xliskgalalakan (Luc. 10:21). Ni kalakputsanani tuku likgalhtawakgapat kaj xlakata kaks nakalimalakawaniya amakgapitsin. Chu komo akxni kgalhtawakgapat naʼakxilha pi wi tuku tsankganiyan nalakgpaliya kmilatamat, kataktuju chu kalakgpali tuku talakaskin.

Kakgaxpatti takilhtlin nema kgalhiyaw. Tatlakgni tlan nalakgpali tuku lakpuwanaw, tuku makgkatsiyaw chu tuku tlawaputunaw, chu kinkamakgtayayan xlakata nakakninaniyaw Dios. Komo akxni nakgalhtawakgaya, pulana nakgaxpata akgtum takilhtlin, namakgtayayan tlakg nalilakpuwana la likatsi Jehová chu tlakg nalilatapaputuna tuku nalikgalhtawakgaya.