«Wix lanka xtapalh litaxtuya»

1, 2. ¿Tuku nakinkamakgtayayan nakanajlayaw pi xtapalh litaxtuyaw kxlakatin Jehová?

JEHOVÁ xtapalh kaliʼakxilha putum xlakskujnin, pero wilakgo tiku lakpuwankgo pi nichuna, max xlakata wi tiku nitlan kalikatsininit chu kamalakpuwaninit pi nitu litaxtukgo. Komo nachuna akgspulaman, ¿tuku namakgtayayan nakanajlaya pi xtapalh litaxtuya kxlakatin Jehová?

² Pulaktum tuku tlan natlawayaw wa pi nalakputsananiyaw tuku wan Biblia xlakata la lakaskin Jehová pi kalalikatsiniw. Jesús tlan kalikatsinilh latamanin chu kalimasiyanilh kakni. Akxni chuna tlawalh, limasiyalh pi xla chu xTlat xtapalh kaliʼakxilhkgo latamanin tiku taktujukgo chu tiku lakpuwankgo pi ni xtapalh litaxtukgo (Juan 5:19; Heb. 1:3). Kʼuma artículo, nalichuwinanaw la kamakgtayalh Jesús latamanin naʼakxilhkgo pi Jehová xtapalh kaliʼakxilha chu tuku tlan natlawaya wix xlakata nakanajlaya pi na xtapalh litaxtuya (Ageo 2:7).

¿LA KAMAKGTAYALH JESÚS LATAMANIN NAKATSIKGO PI XTAPALH LITAXTUKGO?

3. ¿La kalikatsinilh Jesús latamanin xalak Galilea?

³ Akxni Jesús xlimakgtutu xʼanit lichuwinan Dios kʼGalilea, lhuwa latamanin makglhuwa talakatsuwinikgolh xlakata xkamasiyanilh chu xkamapaksalh. Jesús akxilhli pi umakgolh latamanin «niti xkakuentajtlawama chuna la borregos nema ni kgalhikgo xmapuchwayaninakan» (Mat. 9:36; na kaʼakxilhti nota de estudio xaʼespañol). Xpulalinanin takanajla xlakpuwankgo pi umakgolh latamanin nitu xkatsikgo, ni xtapalh xlitaxtukgo, chu asta xwankgo pi “Dios nitlan xkaʼakxilha” (Juan 7:​47-49; nota de estudio xaʼespañol). Pero Jesús tlan kalikatsinilh chu kalimaxtunilh kilhtamaku xlakata xkamasiyanilh chu xkamapaksalh (Mat. 9:35). Nachuna, xlakata tlakg lhuwa latamanin xkamakgtayalh, kamasiyanilh xʼapóstoles la xlichuwinankgolh Dios chu kawanilh: «Kakamapaksatit tatatlanin» (Mat. 10:​5-8).

4. ¿Tuku kinkamasiyaniyan la kalikatsinilh Jesús tiku xtaktujukgo?

⁴ Akxni Jesús tlan kalikatsinilh chu kamaxkilh kakni latamanin tiku xkalakgmakgankan, limasiyalh pi xla chu xTlat lu xtapalh kaliʼakxilhkgo. Wa xlakata, komo wix skujnanipat Jehová pero makgkatsiya pi ni lhuwa xtapalh litaxtuya, kalakapastakti la Jesús kalikatsinilh tiku xtaktujukgo chu xlakgapasputunkgo. Uma namakgtayayan nakatsiya pi Jehová lu xtapalh liʼakxilhan.

5. ¿Tuku xʼakgspulama puskat tiku tatanokglhli Jesús kʼGalilea?

⁵ Jesús ni kajwatiya kamasiyanilh chu kamakgtayalh latamanin akxni lilhuwa xtalakatsuwinikgo, wata na kalilakgaputsalh xchatunukan. Akxni xlichuwinama Dios kʼGalilea, tatanokglhli chatum puskat tiku akgkutiy kata lata xlakgstajma o xmakgama kgalhni (Mar. 5:25). Ama kilhtamaku tiku xkgalhi uma tajatat xataxkajwani xlitaxtu, chu kaxatikawa tiku kxamalh na xataxkajwani xʼama litaxtu. Wa xlakata, uma puskat nila akxtum xkatatawila amakgapitsin. Nachuna, nila akxtum xkatakakninani Jehová amakgapitsin latamanin anta ksinagoga, chu nipara akxni xtlawakan pascua (Lev. 15:​19, 25). Uma puskat ni kajwatiya xmakgalipuwan xtajatat, wata na nitlan xlimakgkatsi xlakata amakgapitsin max ni xpaxkikgo (Mar. 5:26).

6. ¿La paksli puskat tiku xtatatla?

⁶ Uma puskat xlakaskin pi Jesús xmapaksalh, pero nikxni kskinilh pi chuna xtlawalh. ¿Tuku xlakata? Max xlakata xlimaxanan xtajatat. O max xpekuan xlakata xlakpuwan pi Jesús xʼama lakakilhni xlakata xataxkajwani xlitaxtu chu xkatalakatsuwininit latamanin. Wa xlakata, kajwatiya xamanilh xlhakgat xlakata xkanajla pi komo chuna xtlawalh xʼama paksa (Mar. 5:​27, 28). Chu chuna lalh, ¡xtajatat lakgsputli! Alistalh Jesús kgalhskininalh tiku kxamanit, chu uma puskat wa putum tuku xtlawanit. ¿La likatsinilh Jesús uma puskat?

7. ¿La likatsinilh Jesús puskat tiku xtatatla? (Marcos 5:34).

⁷ Jesús akxilhli pi uma puskat lu «xpekuama chu klhpipima», wa xlakata tlan likatsinilh chu limasiyanilh kakni (Mar. 5:33). Asta wanilh: «Kintsumat». Uma tachuwin limasiyalh pi lu xpaxki chu lu xlakgalhaman (kalikgalhtawakga Marcos 5:34). Kajwatiya makgtum tatsokgtawilanit kBiblia pi Jesús wanilh chatum puskat «kintsumat». Max chuna tlawalh xlakata akxilhli pi uma puskat lu xpekuama. ¡Uma puskat lu tlan limakgkatsilh xlakata tlan likatsinika! ¿Tuku xlalh komo Jesús nitlan xlikatsinilh? Max nitlan xlimakgkatsilh alistalh xlakata kxamanit klhakgat Jesús chu xkatalakatsuwininit latamanin. Wa xlakata Jesús ni kajwatiya mapaksalh, wata na makgtayalh na’akxilha pi xTlat xalak akgapun lu xpaxki.

8. ¿Tuku tuwa titaxtulh chatum tala xalak Brasil?

⁸ La uku, makgapitsi xlakskujnin Dios na kgalhikgo tajatat nema tlawa pi lu nalipuwankgo chu namakgkatsikgo pi nitu litaxtukgo. Kalichuwinaw Renata,a chatum precusora xalak Brasil. Akxni lakachilh, nitu xkgalhi xchaxpanin chu kgantum xpakgan. Xla wan: «Anta kʼescuela, ankgalhin xkilikgalhkgamanankgo chu xkilimapakuwikgo tukuwani nema nitlan xkimamakgkatsini. Asta tiku xalak kifamilia nitlan xkilikatsinikgo chu xkimamakgkatsinikgo pi nitu xaklitaxtu».

9. ¿Tuku makgtayalh Renata nakatsi pi lhuwa xtapalh litaxtu?

⁹ ¿Tuku tamakgtay makgamakglhtinalh Renata? Akxni xtatayana Jehová litaxtulh, natalan xalak xcongregación lu makgpuwantinikgolh chu makgtayakgolh naʼakxilhkan chuna la Jehová akxilha. Xla wan: «Komo xaktsokgwililh kʼakgtum lista xtukuwanikan putum tiku kimakgtayakgonit, ¡nikxnila xaktsokgwilikgolh! Xliputum kinaku kpaxtikatsini Dios xlakata congregación kifamilia litaxtunit». Putum tuku tlawakgolh natalan xpalakata Renata, makgtayalh naʼakgatekgsa pi Jehová lu xtapalh liʼakxilha.

10. ¿Tuku tuwa titaxtulh María Magdalena? (Na kaʼakxilhti dibujos).

¹⁰ Kalichuwinaw atanu puskat tiku Jesús makgtayalh, wa María Magdalena. Uma puskat xlaktanuma kgalhtujun demonios (Luc. 8:2). Demonios max xmatlawikgo tuku nitlan, chu wa xlakata latamanin ni xtalakatsuwinikgo. María lu xpatinama, lu xpekuan, xmakgkatsi pi niti xpaxki chu xlakpuwan pi nitila xʼama makgtaya. Max wa Jesús tiku laktamakxtulh demonios, chu María tsukulh stalani. Tuku Jesús tlawalh makgtayalh María naʼakgatekgsa pi lhuwa xtapalh xlitaxtu kxlakatin Dios. Pero ni kajwatiya uma tuku tlawalh Jesús xpalakata María.

11. ¿Tuku tlawalh Jesús xlakata xlimasiyanilh María Magdalena pi Jehová lu xpaxki? (Na kaʼakxilhti dibujos).

¹¹ Jesús wanilh María Magdalena pi akxtum xkataʼalh akxni xla chu xʼapóstoles xʼankgolh lichuwinankgo Dios kʼakgatunu kachikinin.b Xlakata María kastalanilh, kgaxmatli tuku Jesús xmasiyatilhama. Nachuna, akxni Jesús lakastakwanalh, na wa María Magdalena tiku pulana tasiyanilh. Asta wanilh pi xʼalh kamakatsini apóstoles pi xla xlakastakwananita. Putum tuku tlawalh Jesús limasiyanilh María pi Jehová lu xtapalh xliʼakxilha (Juan 20:​11-18).

12. ¿Tuku xlakata Lidia xmakgkatsi pi ni xpaxkikan?

¹² Xtachuna la María Magdalena, la uku lhuwa latamanin na kalakgmakgankan. Lidia, chatum tala xalak España, lichuwinan pi akxni nina xlakachin, xtse xlakpuwanit namakgan. Maski nichuna tlawalh, Lidia lakapastaka pi lata akxni aktsujku xwanit, xtse ni xlilakgaputsa chu xwani laklixkajni tachuwin. Lidia wan: «Tuku akit xaklakaskin wa pi tlan xkimakgamakglhtinanka chu xkimpaxkika, pero xaklakpuwan pi nikxni xʼamaka kimpaxkikan xlakata kintse ankgalhin xkiwani pi nitlan xaklikatsi chu pi ni xkilakgchan nakimpaxkikan».

13. ¿Tuku makgtayalh Lidia naʼakxilha pi lhuwa xtapalh litaxtu kxlakatin Jehová?

¹³ Akxni Lidia lakgapasli xaxlikana, talakgpalilh xlatamat. Oración, takgalhtawakga xalak Biblia chu xtapaxkitkan natalan makgtayalh naʼakxilha pi xtapalh litaxtu kxlakatin Jehová. Xla wan: «Kinchixku ankgalhin kiwani pi lu kimpaxki chu kimalakapastaka laktlan tayat nema kkgalhi, chu na kkgalhi amigos tiku nachuna tlawakgo». ¿Lakgapasa chatum tiku tuwa makgkatsi nakanajla pi lhuwa xtapalh litaxtu kxlakatin Jehová? ¿Tuku tlan xtlawa xpalakata?

¿TUKU TLAN NATLAWAYA XLAKATA NAʼAKXILHKANA CHUNA LA JEHOVÁ AKXILHAN?

14. ¿Tuku kinkamasiyaniyan 1 Samuel 16:7 xlakata la kinkaʼakxilhan Jehová? (Na kaʼakxilhti recuadro «¿Tuku xlakata Jehová lu xtapalh kaliʼakxilha xlakskujnin?»).

¹⁴ Kalakapastakti pi Jehová nichuna kinkaʼakxilhan la kinkaʼakxilhkgoyan latamanin (kalikgalhtawakga 1 Samuel 16:7). Latamanin xlakaskinka liʼakxilhkgo chatum lataman komo stlan tasiya, komo lhuwa tumin kgalhi o komo lhuwa kgalhtawakganit, pero Jehová nichuna lakpuwan (Is. 55:​8, 9). Wa xlakata, akxni nalilakpuwana komo lhuwa xtapalh litaxtuya o ni, kalakpuwanti la lakpuwan Jehová. ¿Tuku namakgtayayan? Kalikgalhtawakga kBiblia xpalakata latamanin tiku makgkatsikgolh pi nitu xlitaxtukgo, chuna la Elías, Noemí chu Ana, chu kaʼakxilhti tuku tlawalh Jehová xlakata xkalimasiyanilh pi lu xtapalh xkaliʼakxilha. Na tlan natsokgwiliya tuku titaxtunita kmilatamat niku Jehová limasiyaninitan pi paxkiyan chu xtapalh liʼakxilhan. Na tlan naputsaya kkilikgalhtawakgakan tuku namakgtayayan nakatsiya pi xtapalh litaxtuya.c

15. ¿Tuku xlakata Jehová wanilh Daniel, wix lanka xtapalh litaxtuya? (Daniel 9:23).

¹⁵ Ankgalhin kalakapastakti pi Jehová xtapalh liʼakxilhan xlakata ni makgxtakga. Milh kilhtamaku, akxni Daniel nina xmakgatsi 100 kata, lu taxlajwanilh chu lu xtlakgwanit (Dan. 9:​20, 21). ¿Tuku tlawalh Jehová xlakata xmatliwakglhli? Malakgachalh ángel Gabriel xlakata xwanilh pi xkgaxmatkanit xʼoraciones chu xlakata xwanilh: «Wix lanka xtapalh litaxtuya» (kalikgalhtawakga Daniel 9:​23, TNM). ¿Tuku xlakata Jehová lu xpaxki Daniel? Xlakata Daniel xpaxki tuku xaʼakgstitum chu nikxni xmakgxtakgli Jehová (Ezeq. 14:14). Dios matsokgninalh xliʼakxilhtit Daniel xlakata tlan xlitamakgtayaw (Rom. 15:4). Xtachuna la Jehová kgaxmatnilh Daniel, na kgaxmata miʼoraciones chu xtapalh liʼakxilhan xlakata paxkiya tuku xaʼakgstitum chu ni makgxtakga (Miq. 6:​8, notas; Heb. 6:10).

16. ¿Tuku namakgtayayan naliʼakxilha Jehová la chatum tlat tiku paxkiyan?

¹⁶ Kaliʼakxilhti Jehová la chatum tlat tiku paxkiyan. Jehová ni wa putsatawila tuku nitlan tlawaya, wata makgtayaputunan (Sal. 130:3; Mat. 7:11; Luc. 12:​6, 7). Lhuwa latamanin tiku lakpuwankgo pi nitu litaxtukgo, lu litamakgtayakgonit akxni liʼakxilhkgo Jehová la chatum xapaxkina tlat. Kalilakpuwaw xliʼakxilhtit Michelle, chatum tala puskat xalak España. Akglhuwa kata, xchixku lu nitlan likatsinilh chu xwani laklixkajni tachuwin. Uma tlawalh pi Michelle xtsukulh lakpuwan pi nitu xlitaxtu chu pi niti xpaxki. Xla wan: «Akxni kmakgkatsi pi nitu klitaxtu, ktsuku klakpuwan pi Jehová kinchaxlima, chuna la chatum aktsu tsumat, kilimasiyani xtapaxkit chu kinkuentajtlawa» (Sal. 28:9). Chu Lauren, chatum tala puskat xalak Sudáfrica, ankgalhin lilakpuwan: «Komo Jehová kimpaxkilh chu tlawalh pi xaktalakatsuwinilh, chu komo kimakgtayanit ni nakmakgxtakga putum umakgolh kata chu asta kimaklakaskinit xlakata nakkamasiyani amakgapitsin, uma wamputun pi lu xtapalh kiliʼakxilha» (Os. 11:4).

17. ¿Tuku namakgtayayan nakanajlaya pi Jehová tlan akxilhan? (Salmo 5:12; na kaʼakxilhti dibujo).

¹⁷ Kakanajla pi Jehová tlan akxilhan (kalikgalhtawakga Salmo 5:12). David wa pi Jehová kapaxki tiku xaʼakgstitum litaxtukgo chu kalitaxtuni la akgtum lanka escudo nema kakuentajtlawa. Komo liwana nakanajlaya uma, namakgtayayan akxni natsukuya lakpuwana pi nitu litaxtuya. Chu ¿la nalikatsiya pi Jehová tlan akxilhan? Chuna la akxilhnitaw, limaklakaskin xTachuwin xlakata nalimasiyaniyan pi paxkiyan. Nachuna, kalimaklakaskin lakgkgolotsin xalak congregación, miʼamigos chu amakgapitsin natalan xlakata namalakapastakayan pi lhuwa xtapalh litaxtuya kxlakatin. Pero ¿tuku militlawat akxni wi tiku namatliwakglhputunan?

18. ¿Tuku xlakata milikanajlat tuku nawanikana?

¹⁸ Komo tiku lakgapaskgoyan chu paxkikgoyan nawanikgoyan lakstlan tachuwin, ni kalakpuwanti pi uma ni xlikana. Kalakapastakti pi max Jehová kalimaklakaskima xlakata nalimasiyaniyan pi tlan akxilhan. Michelle, tiku lichuwinaw kʼatanu párrafo, wan: «Maski tuwa kmakgkatsinit, lu kliskujma xlakata nakkanajla akxni kiwanikan lakstlan tachuwin, xlakata kkatsi pi Jehová lakaskin pi chuna kaktlawalh». Lakgkgolotsin na lu xatapaxuwan makgtayakgonit Michelle, chu la uku precursora litaxtu chu lata kxchik makgtlawama taskujut nema tlawakan kBetel.

19. ¿Tuku xlakata tlan nalipawana pi Jehová xtapalh liʼakxilhan?

¹⁹ Jesús kinkamasiyanin pi kinTlatkan xalak akgapun lu kinkalilakgaputsayan (Luc. 12:24). Wa xlakata, tlan nalipawana pi lu xtapalh litaxtuya kxlakatin Jehová, chu ankgalhin kalakapastakti pi uma xlikana. Nachuna, katlawa putum tuku matlaniya xlakata nakamakgtayaya amakgapitsin naʼakxilhkgo pi lhuwa xtapalh litaxtukgo kxlakatin Dios.