Kakamatliwakglhniw xtakanajlakan amakgapitsin

Kimputumkan lakgatiyaw akxtum katatawilayaw amakgapitsin natalan xlakata lamakgpuwantiniyaw. Pero xlakata tlan chuna natlawayaw, ni kajwatiya talakaskin akxtum natawilayaw. Biblia wan pi kakamakgpuwantiniw amakgapitsin chu kakamatliwakglhniw xtakanajlakan (Rom. 1:​11, 12). ¿La tlan chuna natlawayaw?

Kakalimatliwakglhti mintachuwin. Akxni namastaya mintakgalhtin ktamakxtumit, ni wa lu kalichuwinanti tuku wix lakpuwana o tuku titaxtupat, wata kalichuwinanti tuku wan Biblia, tuku katsinipat xlakata Jehová chu tuku masiyaniyan xliʼakxilhtitkan xlakskujnin tiku ni makgxtakgkgo. Chu akxni nakatachuwinana natalan, kakalitachuwinanti tuku nakamatliwakglhni xtakanajlakan.

Kakalimatliwakglhti tuku tlawaya. Akxni natalan akxilhkgo pi wix skujnanipat Jehová putum kilhtamaku, maski max tuwa makgkatsiya, lu kamatliwakglha. Na kamakgpuwantini akxni akxilhkgo pi wix pina ktamakxtumit kxʼitat semana, maski max lu tlakgwanita kitaspita kmintaskujut o maski tatatlaya.

¿Kalimatliwakglha natalan tuku wana chu tuku tlawaya? Chu wix, ¿liskuja xlakata nalitamakgtayaya tuku xlakan wankgo chu tuku tlawakgo xlakata namatliwakglhnikgoyan mintakanajla?