Tuku katsiputunkgo tiku likgalhtawakgakgo
¿Tuku “tapuwan” nawili Jehová kxnakujkan kachikinin nialh makgas kilhtamaku?
Wa uma tuku wan Apocalipsis 17:16, 17 xlakata akxni amaja tsuku nawan lhuwa tapatin: «Chu akgkaw akgalokgot nema akxilhti chu xaluku lapanit, xlakan nialh naʼakxilhputunkgo puskat tiku sta xmakni chu namakglhtikgo putum tuku kgalhi chu xalhtantala namakgxtakgkgo, chu nawakgo xliwa chu putuminika nalhkuyukgo. Xlakata Dios wililh anta kxnakujkan namakgantaxtikgo xtapuwan, uma wamputun, namakgantaxtikgo xtapuwankan akxni namaxkikgo xaluku lapanit xaxlikana limapakgsin nema kgalhikgo». Makgasa, kilikgalhtawakgakan xlichuwinan pi uma “tapuwan” xkilhchanima akxni Jehová x’ama wili kxnakujkan kachikinin pi xmasputukgolh putum ni xaxlikana takanajla.
Pero talakaskin nalakgpaliyaw la x’akgatekgsaw uma. “Tapuwan” nema Jehová nawili kxnakujkan kachikinin wa pi xlakan «namaxkikgo xaluku lapanit xaxlikana limapakgsin nema kgalhikgo». ¿La nakgantaxtu umakgolh tachuwin? Xlakata na’akgatekgsaw, kakgalhtiw makgapitsi takgalhskinin.
¿Tiku kalichuwinankan k’uma profecía? Lichuwinankan «puskat tiku sta xmakni», nema na lilakgapaskan «xaLanka Babilonia», chu kakilhchanima putum ni xaxlikana takanajla. Na lichuwinankan «xaluku lapanit nema lu spinini», chu kilhchanima organización nema lakkaxwilika kkata 1919 xlakata xwililh takaksni kxlikalanka katiyatni. Uma organización limapakuwika Sociedad de Naciones, chu la uku lilakgapaskan Organización de las Naciones Unidas (Apoc. 17:3-5). Chu lichuwinankan «akgkaw akgalokgot», nema kakilhchanima putum mapakgsinanin tiku tatayakgo xaluku lapanit.
¿La latalalin puskat tiku sta xmakni chu xaluku lapanit? Puskat tiku sta xmakni “kgewi” xaluku lapanit. Uma limasiya pi puskat tataya xaluku lapanit, wi tuku matlawi chu asta mapakgsiputun.
¿Tuku na’akgspula puskat tiku sta xmakni? Xaluku lapanit chu akgkaw akgalokgot nialh katiʼakxilhputunkgolh «puskat tiku sta xmakni». Wa xlakata, namakglhtikgo putum tuku kgalhi chu namasiyakgo putum tuku nitlan tlawanit. Chu namakgantaxtikgo tuku Jehová wanit: namalakgsputukgo (Apoc. 17:1; 18:8). Uma xlisputni nawan putum ni xaxlikana takanajla. Pero akxni nina masputukan, Jehová natlawa pi kachikinin natlawakgo tuku nikxni tlawakgonit.
¿Tuku nakamatlawi Jehová mapakgsinanin? Chuna la akxilhwi, Jehová nawili «xtapuwan» kxnakujkan mapakgsinanin. Uma tapuwan wa pi namaxkikgo «xlitliwakgakan chu xlimapakgsinkan» xaluku lapanit, uma kilhchanima Naciones Unidas (Apoc. 17:13). Kalilakpuwanti tuku nala. ¿Xʼakstukan nalakpuwankgo mapakgsinanin namastakgo xlimapakgsinkan? Nichuna, xlakata Biblia lichuwinan pi wa Jehová tiku chuna nakamatlawi (Prov. 21:1; katamalakxtupi tuku wan Isaías 44:28). Chu ¿tsinu tsinu namastakgo xlimapakgsinkan mapakgsinanin? Ni, wata kaj lakapala chuna natlawakgo. Akxni xaluku lapanit namakglhtinan uma limapakgsin, namakgantaxti tuku lakkaxwilinit Jehová xpalakata ni xaxlikana takanajla: makgtuminika nakamalakgsputu.
Wa xlakata, ¿tuku kilikgalhkgalhitkan nala kkilhtamaku nema aku mima? Ni kililakpuwanatkan pi knoticias natasiya pi mapakgsinanin tsinu tsinu natatayakgo Naciones Unidas. Wata liwana katsiyaw pi Jehová nawili kxnakujkan mapakgsinanin pi kaj lakapala namaxkikgo xlimapakgsinkan xaluku lapanit. Akxni chuna nala, nakinkalimasiyaniyan pi amaja tsuku lhuwa tapatin. Xlakata nina chin uma kilhtamaku, «skgalalh katawilaw chu kakgalhiw tlan talakapastakni», xlakata uma ¡nialh makgas chuna nala! (1 Tes. 5:6).